١٠ أسباب منطقية عشان ماتكلمش الإكس في فترة الحجر الصحي مهما حسيت بوحدة

26/03/2020

قعدة البيت وحشة، الفراغ بيخلي دماغك زي ما الفنان مروان بابلو قال "دماغ شغالة مش بتنام"، ده غير إن كل ما الفراغ وقعدة البيت بيطولوا كل ما المشكلة بتبقى مش في دماغك بس ومابتقفش عند مرحلة التفكير، المشكلة بتتطور وبتدخل في مرحلة التصرفات.

احنا عارفين من غير ما تقول إنك فكرت اليومين اللي فاتوا بدل المرة 20 مرة إنك تكلم الإكس -إن ماكنتش عملت كده أصلا- هتبقى بتفرك وعايز تكلمه لأي مبرر، الفراغ بيعمل كده عادي، بس طول ما إنت في مرحلة التفكير إنت في أمان، وحاول على قد ما تقدر ترمي الموبايل أو تمسح رقمه أو تعلمه بلوك أو تربط نفسك في رجل الكرسي أو تقرأ الموضوع ده للآخر عشان ماتتهورش وتندم على قرارك بعد ما ربنا يفرجها علينا وفترة الحجر الصحي دي تخلص.

عارف ماتكلمش الإكس ليه اليومين دول؟ خلينا نقولك شوية أسباب منطقية:

1- إنت اليومين دول مابتفكرش بشكل سليم:

قعدة البيت المرة دي مش أي قعدة قبل كده، المرة دي كلها أخبار فيها توتر وفيروس بيقضى على العالم، وناس بتقول إن دي نهاية العالم، ومشاكل اقتصادية، وأزمات كبيرة، فماتخليش كل الحاجات دي تلهيك عن إن الإكس هو أسوأ شخص في العالم وإنك لو شوفته هتضربه.

2- العلاقة دي انتهت لسبب واضح ومعروف:

العلاقة انتهت وفشلت وماقدرتوش تقاوموا في الأيام اللي كانت حلوة وعادية، هتقدروا تنجحوا وتقاوموا والعالم كله بينهار كده!! صباح الفل.

3- زيه زيك زهقان ووحيد برضه:

فيه احتمال كبير إنكوا إنتوا الاتنين لا تكونوا وحشتوا بعض أصلا ولا بتفكروا في بعض ولا عايزين بعض تاني، إنتوا بس زهقانين وعايزين شوية دراما وأحداث اليومين دول عشان يعدوا.

4- لو دي نهاية العالم مش هتقضيها معاه:

يمكن كلنا حاسين اليومين دول إنهم نهاية العالم، وعايزين أي حد وخلاص عشان نقضي معاه وجنبه النهاية دي، بالرغم إن ده مش حقيقي، إلا إنت متأكد إن الإكس اللي كنت بتشتمه كل الشتايم دي، وطلعتوا عين بعض هتعوز تقضي معاه آخر كام يوم ولا كام ساعة ليك؟؟ فكر تاني ربنا يرزقك العقل

5- يمكن هو كمان يبقى بعت لإكس تاني:

ممكن يبقى الإكس بتاعتك بعت للإكس بتاعه قاله نفس الكلام اللي إنت بتقوله عشان زي ما اتفقنا إن الموضوع مالوش علاقة بالمشاعر والخوف والتفكير، الموضوع كله زهق وملل وإحساس وحدة.

6- احتمال أكبر الموضوع ينتهي ليك بإحباط أكتر:

ممكن يبقى هو شخص واعي أكتر وممكن يبقى شاف حياته مع شخص تاني، وبالتالي هيرد عليك ردود صعبة وقاسية أو ممكن يبقى فاقد الأمل في علاقتكوا فهيرد ردود محبطة، وكده يا هتعيط وتلمس وشك أو هتخبط على وشك اللي منظمة الصحة العالمية قلبها اتنحر من كتر ما بتقولك ماتلمسهوش.

6- خلي قعدة البيت فرصة جديدة ليك:

من ضمن الأسباب الكبيرة اللي بتخلي أي علاقة تفشل هو إننا بنفقد طاقتنا، استغل اليومين دول إنك تقعد في البيت وتريح نفسك ومشاعرك وطاقتك وتتخلى عن أي أفكار تأذيك وتأذي مستقبلك، أو بمعنى أصح عيد ترتيب أولوياتك.

7- جدد وكفاية ملل:

لو علاقتكوا كانت نجحت في وقت ما قبل كده كان زمانه قاعد جنبك وبتتفرجوا على "نتفليكس"، مش هاممكوا العالم ينتهي ولا يكمل، لكن اللي حصل قبل كده هو اللي خلاك في مكانك ده دلوقتي وقاعد حاسس بوحدة، ماتستناش أحداث جديدة وناجحة ممكن تعملوها لما تتكلموا تاني.

8- ممكن تتعرف على ناس جديدة أحسن:

مش الإكس بس هو اللي هيطلعك من خزان الأحزان والوحدة اللي إنت فيه، العالم حاليا فيه 7 مليار بني آدم قاعدين في البيت زهقانين زيك، اتعرف على ناس جديدة من الـ 7 مليار دول، وابدأ علاقات جديدة مناسبة ليك أحسن.

9- كبيرك هتكلمه ومش هتشوفه ولا هتلمسه:

حظر التجول بيخلي الناس تنزل تجيب طلباتها بالعافية، مفيش وقت ومافيش محلات فاتحة عشان تشوفوا بعض وتتقابلوا ومافيش حد هيعرف يسلم على حد ولا حد هيحضن حد ولا حد هيمسك ايد حد، ومافيش داعي أصلا.

10- فيه حاجات أهم وأفيد من كده ممكن تعملها اليومين دول:

فيه عروض كتير اليومين دول محتاج تستغلهم، زي الكورسات الأونلاين والحفلات اللايف وإنك تشوف وتقرأ كتب أونلاين ببلاش، فيعني ماتسبش كل الفرص دي وتروح تدور على فرصة فاشلة..حرام عليك بجد.

Comments: