٦ تطبيقات مجانية لمكالمات الفيديو الجماعية عشان تتسلى مع أصحابك وقت الحظر!

26/03/2020

في فترة العزل المنزلي الذاتي ومع قرار حظر التجول فأحنا هنقضي وقت كتير في البيت الفترة الجاية أكتر ما كنا أصلاً مأنتخين في البيت علطول، ولو وحشتك تجمعاتك وسهراتك مع أصحابك اللي بتسفّوا فيها على نفسكم وبتقضوها نميمة وضحك على العالم كله، فاحنا جمعنالكم تطبيقات مكالمات فيديو جماعية روشة تقدروا تستخدموها وأهو ياكش تقعدوا في البيت بقا وتلتزموا بالحجر الصحي والحظر لحد ما الأزمة دي تعدي بسلام!

1- HouseParty

ده أبلكيشن مش واخد حقه بصراحة، استعماله سهل وبسيط جداً وميزته إنه سريع ومش بس بتعملوا المكالمة لأ فيه Options ألعاب جماعية تلعبها مع أصحابك أثناء وقت المكالمة، عدد الأشخاص اللي بيتيح إنك تعمل مكالمة جماعية معاهم هما 8 وبيبعتلك Notfications لما أصحابك يبقوا أونلاين في أي وقت.

2- Zoom

ده من الأبلكيشنز المعروفة والسهلة جداً في الاستخدام، بيقدر يخليك تعمل مكالمات جماعية مع عدد ممكن يوصل لـ100 شخص في نفس الوقت، ميزته إنه بسيط بس مافيهوش Features أو ألعاب، فانت هتدخل عليه عشان تتكلم مع أصحابك سواء تهزروا وممكن طبعاً يبقى وسيلتك في التواصل مع زمايلك في الشغل لو حابين تعملوا اجتماع مثلاً، بس عيبه إن النسخة المجانية منه بتخليك تتكلم لمدة 40 دقيقة بس وبعدها بيقطع عنك المكالمة وتضطر تعمل مكالمة من أول وجديد وتتدخل الناس فيها تاني.

3- Lifesize

ده أبلكيشن مش منتشر برضو بس هو من التطبيقات المجانية اللطيفة اللي تقدر تعمل بيها مكالمة فيديو جماعية مع عدد بيوصل لـ25 شخص في المكالمة، مافيهوش مميزات عن غيره بس هو سهل وبسيط في الاستخدام.

4- Imo

التطبيق ده يعتبر أقدم من التطبيقات اللي اتكلمنا عنها لحد دلوقتي لكنه ماخدش انتشار كبير رغم إنه برضو بيقدم خدمة مكالمات الفيديو الجماعية بشكل متاح لأنظمة الأندرويت والـIOS، وأهم مميزاته هو أنه مش بيستهلك انترنت كتير وانت بتستخدمه فده ممكن يبقى أنسب اختيار لو الإنترنت عندك في البيت ضعيف أو لو عايز توفر في الباقة بتاعتك.

5- JusTalk

وده يعتبر من التطبيقات اللي بتوفر جودة صوت ونقاء صورة عاليين أثناء المكالمة الجماعية بس ده معناه  إنه بيسحب إنترنت كتير فلازم يكون النت عندك كويس، تقدر من خلاله كمان تبعت لأصحابك ملفات وصور وفيديوهات، وفيه لعب كمان زي إنك ترسم على الشاشة وتحط ستيكرز وحاجات روشة تعملها مع أصحابك.

6- Skype

ده طبعاً معظمنا عارفينه وسمعنا عنه لأنه من أشهر وأقدم التطبيقات اللي استخدمناها في مكالمات الفيديو والمكالمات الجماعية، لكن يمكن التطبيقات اللي ظهرت بعده أسهل وأبسط فبقت الناس بتلجأ لها وقل شوية استخدام التطبيق ده لكن لسه بالتأكيد بعض الناس بتستخدمه خاصة إنه بيتيحلك إنك تتكلم مع 25 شخص في نفس الوقت بجودة صوت وصورة كويسة.

Comments: