٨ خطوات عشان تتخلص من القلق والاكتئاب في الحجر الصحي

29/03/2020

 من وقت بداية ظهور فيروس كورونا والعالم ظهر فيه حالة من القلق عند أغلب الناس، سواء كان قلق على حياتهم أو على مستقبلهم بسبب عدم وضوح خطتهم، أو قلق على حياة اللي بيحبوهم، لكن بعد ما الوضع اتطور أكتر وبقى لازم الناس تقعد في البيت وأغلب الدول فرضت حظر التجول الموضوع اتحول لكابوس بالنسبة للناس ومابقاش قلق بس، بقى فيه كمان ملل وإحباط وضغوطات نفسية ومادية واكتئاب.

يمكن من بداية الحجر الصحي والناس بتهزر على السوشيال ميديا إن المشاكل النفسية اللي هتحصلهم بسبب الوضع الحالي أصعب من مواجهة كورونا، ولكن الحقيقة الحالتين صعبين، وده اللي خلى "هانز كلوج" مدير فرع منظمة الصحة العالمية في أوروبا يقول يوم 26 مارس 2020 إن العزلة والبعد الجسدي وإغلاق المدارس والأشغال دي تحديات كبيرة بالنسبة لنا ومن الطبيعي إننا نحس بقلق وخوف ووحدة، وقال كمان إن من الضروري معالجة الحالة النفسية عند الناس الفترة اللي جايه.

بس ممكن تحافظ على صحتك النفسية على قد ما تقدر الفترة دي وتحاول تقلل الخساير النفسية عن طريق شوية نصايح قالهم موقع RTE وموقع DW وهما:

1- خلي عندك خطة واضحة ومحددة:

لما بتحط خطة حتى لو روتينية لشكل يومك وحياتك لفترة معينة ده بيرتبط معاك بهدف وإنك بتتقدم عشان توصل لهدفك، خلى عندك خطة يومية وقول للي حواليك على الخطط دي وشاركوا بعض لإنك لما هتشارك حد هيخليك تتمسك بالخطة أكتر، واتأكد إنك مقسم وقتك صح بين الشغل وبين أنشطة ترفيهية.

2- حاول تتحكم في مزاجك ومشاعرك:

خليك عارف إنك ممكن تتحكم في مشاعرك ومزاجك بس بشرط إنك تبقى عارف كويس إنت حاسس بإيه أغلب الوقت بمعنى إنك تبقى مركز مع نفسك، وتبقى فاهم إنت حاسس كده ليه دلوقتي، عشان تقدر تسيطر على مشاعرك.

3- خليك على اتصال مع الناس:

لو كنت شخص منطوي حتى فأكيد فيه أشخاص مهم بالنسبة لك التواصل معاهم زي صاحب أو صاحبة قريبين ليك أو أهلك، عموما التواصل له أثار إيجابية جدا على صحتنا النفسية لإنه بيحسنا إننا مهمين وفيه حد مركز معانا، سواء كان التواصل ده عن طريق التليفون أو السوشيال ميديا أو فيديو كول أو حتى مع أهلك اللي معاك في نفس البيت، خصوصا بقى لو هتشارك اللي بتتكلم معاهم المشاعر اللي إنت حاسس بيها زي الخوف لإن فيه أبحاث موثقة بتقول إن مشاركة المخاوف مع الأشخاص اللي بتثق فيهم ليها فوايد إيجابية كبيرة.

4- كل كويس:

في الوقت الحالي إحنا محتاجين ناكل كويس عشان نقوي جهاز المناعة لمواجهة الفيروس اللي منظمة الصحة العالمية قالت إنها مش هتلاقي له لقاح قبل سنة تقريبا، بس الأكل مش مفيد بس لصحة جسمنا هو مفيد كمان للصحة النفسية، لإن الأبحاث أثبتت إن النظام الغذائي الكويس بيحافظ على الجسم من خطر الإصابة بأمراض زي السمنة والضغط والقلب والقلق والاكتئاب، ومش لازم تتبع نظام غذائي معين بس حاول ماتكلش سكريات كتير.

5- نام بشكل سليم:

النوم ضروري لجسمنا عشان يتخلص من السموم وبيصلح الخلايا بيعالج المعلومات ويأكد على الذكريات، وفيه أبحاث كتير أكدت إن قلة النوم بتأثر على صحتنا وده بيأثر على التركيز وعلى الصحة النفسية بشكل عام، بالنسبة لكل الناس فالنوم من 6 لـ 9 ساعات كفاية في اليوم وإنك تنام وتصحي في نفس الميعاد كل يوم مهم عشان يحسسك بالحياة الطبيعية وعشان يساعدك تكمل في الخطط بتاعتك، بس لو كان صعب إنك تنام الفترة دي حاول على قد ما تقدر تقلل قرايتك للأخبار قبل ما تنام بوقت كفاية، وطبعا حاول تقلل من استهلاكك للشاشات والضوء الأزرق على قد ما تقدر مع إننا عارفين إن ده صعب جدا اليومين دول بالذات.

6- مارس رياضة:

التمارين أو الرياضة عموما أثبتت إنها بتطلق مواد كيميائية في الجسم بتخلينا نحس بتحسن وارتبطت كمان إنها بتخلي الشخص ينام أحسن وبتقلل التوتر والقلق وبتحسن الذاكرة والإدراك، طبعا حاليا مفيش فرصة إنك تمارس رياضة في أي مكان خارج بيتك بس تقدر تتمشي أو تجري الصبح حوالي نص ساعة زي ما بتوصي منظمة الصحة العالمية أو تقدر تنزل "أبلكيشن" يساعدك تعمل تمارين في البيت، أو تقدر تستفاد بالعروض الأونلاين اللي موجودة الفترة دي على الأنترنت من المدربين.

7- اعمل شوية أنشطة تهديك:

ناس كتير عندها نظرة إيجابية للفترة دي زي إنها بتخليك تاخد راحة من حاجات روتينية كنت ضاغط نفسك بيها، يمكن عندهم حق نوعا ما عشان كده استغل الفترة دي إنك تعمل أنشطة بطلت تعملها زي إنك تطبخ أو تتفرج على مسلسلات مكنتش شوفتها أو تتعلم هواية بطلتها من فترة تاني أو تقرأ وإنت هادي وعلى سريرك.

8- ادرك استهلاك الـ"سوشيال ميديا" بتاعك:

السوشيال ميديا على قد ما هي بتسلينا على قد ما بتزود مستويات الضعط عند الشخص، وده بسبب انتشار الأخبار عليها خصوصا لو كانت إشاعات أو أخبار مش صح فهي ممكن تزود القلق عندك أكتر.

في الآخر خليك فاكر نصيحة منظمة الصحة العالمية بإنك تفتكر المهارات اللي عندك قبل كده واستخدمتها عشان تطلع من أوقات صعبة كتير وعديت،  فلو كنت قاعد في البيت عشان العزل والحجر الصحي خليك فاكر إنك بتعمل كده عشان مصلحتك ومصلحة اللي بتحبهم وإنك بتقدم خير عشان هتحد من انتشار الفيروس وهتساعد إن أكبر عدد ممكن يبقى في أمان.

Comments: