٥ أخبار ماتهمكش لو عايز تفصل عن أخبار الكورونا

29/03/2020

1- الإعلامية اللبنانية "جويل" طلعت في لايف على إنستجرام قالت فيه إنها مرة من المرات كانت مزنوقة وعايزة تدخل الحمام وهي قاعدة مع أصحابها بس وهما بيتكلموا ضحكت وعملت بيبي على نفسها من كتر الضحك والناس في اللايف دخلوا يشتموها وهي بتحكي الموقف ده.

2- اتحاد الكورة المصري قرر يوقف الحكم "سعيد حمزة" ويحيله للتحقيق عشان اتكلم في وسائل الإعلام بدون إذن مسبق من لجنة الحكام، وده احتمال يدمر خطة مصر المستقبلية لتطوير قطاع الرياضة.

3- في الحلقة الجديدة من برنامج الواقع التلفزيوني Keeping Up With The Kardashians اتخانقت "كيم كارداشيان" مع أختها "كورتني" وضربوا بعض بالأقلام وكانت خناقة للي مايشتري يتفرج بسبب إن كيم اتهتم أختها إنها كسلانة ومابتساعدهمش في الشغل فقامت أختها اتعصبت وضربتها، وحاجة كده في مستوى خناقاتنا العائلية واحنا قاعدين في البيت اليومين دول بسبب الحظر.

4- راجل في بريطانيا اتقبض عليه عشان سرق البتاعه اللي بتبقى فوق عربية الشرطة اللي بيصدر منها صوت الانذار وبتطلع ألوان أزرق فأحمر، والحقيقة دي حادثة مريبة جداً ليه شخص ممكن يسرق حاجة زي دي وهيعمل بيها إيه؟

5- عيلة في أفغانستان كانوا بيصطادوا بطة أثناء وقت فراغهم فحصلت خناقة بينهم بسبب البطة دي انتهت بإن 4 منهم قتلوا بعض عشان البطة.

وبكده تكون خلصت نشرة النهارده من الأخبار اللي مالهاش لازمة واللي ماتهمش أي حد، أتمنى تكونوا ماستفادتوش أي حاجة لأن ده هو المطلوب، واستنونا في نشرة أخبار جديدة بأخبار برضو ماتهمكوش!

Comments: