بعد إخلاء سبيلها: مين مودة الأدهم وملخص حكايتها في خرق حظر التجول

30/03/2020

يوم الثلاث اللي فات 24 مارس أعلنت الحكومة المصرية تطبيق قرار حظر التجول في مصر واللي بيبدأ من الساعة 7 مساءاً للحد من انتشار فيروس كورونا في مصر، وشددت الأجهزة الأمنية على حظر التجول طول الأسبوع اللي فات.

إمبارح 29 مارس قبضت الأجهزة الأمنية في القاهرة الجديدة على "اليوتيوبر" مودة الأدهم وصاحبتها عشان اختراق حظر التجول وتم حجزهم في نقطة شرطة مدينتي، بعد ما بلغ واحد من أهالي مدينتي عن "اليوتيوبر" مودة الأدهم وواحدة صاحبتها بسبب وجودهم في الشارع وبلغ كمان عدد من مستخدمين السوشيال ميديا عنهم لإنهم بينشروا فيديوهات ليهم أثناء حظر التجول بتتضمن تحريض المواطنين على خرق حظر التجول.

وقالت المصادر الأمنية بعد كده  إن تم القبض عليهم بسبب خرقهم لحظر التجول وإنهم كانوا في الشارع عشان بيصوروا فيديوهات وينشروها على مواقع التواصل الاجتماعي، وأكدت المصادر الأمنية إن هيتم تغريمهم كفالة مادية، وفعلا ده اللي حصل وأمرت نيابة القاهرة الجديدة بإخلاء سبيلهم بكفالة 20 ألف جنيه وأمر النائب العام باستكمال تحقيقات القضية قبل تحويلها للمحكمة الجنائية 

لكن فيه ناس كتير كانت أول مرة تسمع عن "اليوتيوبر" مودة الأدهم، فخلينا نقولك شوية تفاصيل عنها لو دي:

1- مودة الأدهم "يوتيوبر" مصرية تقريبا عندها 22 سنة، من اسكندرية ولكن عايشه حاليا في القاهرة 

2- في 2015 شاركت في مسابقة "Miss Eco Egypt" لدعم السياحة المصرية 

3- وبدأت رحلة شهرتها عن طريق برنامج "ميوزكلي" واللي اتحول اسمه بعد كده لـ "TikTok"، وحققت شهرة كبيرة على TikTok وبقى عندها أكتر من 3 مليون متابع على حسابها الرسمي.

4- وحققت شهرة برضه على انستجرام وعندها على حسابها أكتر من مليون ونص متابع.

5- وعلى اليوتيوب عندها على قناتها حوالي 225 ألف مشترك، ودي كانت أخر فيديوهاتها على اليوتيوب

6- ظهرت مودة مع الإعلامي معتز الدمرداش في حلقة بتتكلم فيها عن استقلالها عن أهلها، لكن في الحقيقة إن كلامها ماوضحش استقلال أوي زي ما بتقول

Comments: