٣ خطوات هتساعدك تحمي نفسك من "كورونا" من غير ما تتصاب بالوسواس القهري

01/04/2020

مع زيادة انتشار فيروس كورونا وأعداد الإصابات في العالم كل يوم بقى كل شخص خايف الفيروس يتنقل له وخايف أكتر على الناس اللي حواليه أكتر منه، عشان كده العالم كله على قد ما يقدر بيحاول ينفذ إرشادات الوقاية سواء كانت غسيل الإيد أو تطهير وتعقيم نفسك والبيت بالكحول والكلور.

لكن فيه فرق كبير بين إنك تنفذ إرشادات الوقاية عشان تحمي نفسك من المرض وبين إنك تبقى مفرط في تنفيذها لدرجة إن الخوف والقلق يتحولوا لوسواس قهري، وده اللي قاله دكتور اسمه "كريج جاكسون"  وهو دكتور علم نفس في جامعة برمنغهام سيتي في بريطانيا لما حذر من التعليمات اللي قالتها منظمة الصحة العالمية عن غسيل الإيدين لإن ممكن السلوك ده من غير قصد يعزز الوسواس القهري.

وده لإن كل الحكومات في العالم نصحت الناس بغسيل الإيد أكتر من المعتاد بالمياه والصابون وتطهيرها بالكحول، لكن دكتور "كريج جاكسون" قال إن بالنسبة للناس اللي عندهم وسواس قهري أصلا فالموضوع حاليا أصعب عليهم من الوضع الطبيعي لإن الفيروس زود بعض السلوكيات المهووسة للنضافة عشان يمنع تفشي المرض.

وقال دكتور "كريج جاكسون" كمان إن كلنا عندنا اختيار إننا نستخدم عقلنا وممكن نفكر قبل أي خطوة بنعملها إحنا عايزين إيه وهنتصرف إزاي وإيه الحاجات اللي هتزعجنا أو هتتسبب لنا في مشاكل وإيه أفضل طريقة نعملها عشان لو حاسس بخوف، ولما الذعر يتملك مننا مش هنبقى قادرين نسيطر على أفعالنا ولا عارفين إحنا بنعمل إيه، عشان كده من الأفضل إنك تستبدل الشك والقلق وعدم اليقين بحقايق ومعلومات مؤكدة.

موقع "times of india" قال شوية نصايح عشان ماتخليش الوقاية تتطور عندك لوسواس قهري زي:

1- ماتغسلش إيدك من غير سبب:

اغسل ايدك لما ترجع من برا، أو لما تلمس سطح حد لمسه قبلك، أو قبل الأكل وبعد استخدام الحمام اغسلها لمدة 20 ثانية أو أكتر بس مش كل شوية تقوم تغسلها وخلاص.

2- بلاش تفرط في تعقيم كل حاجة:

الافراط في تعقيم الحاجات من علامات الوسواس القهري، عشان كده لو لقيت نفسك بتعقم الحاجات المعقمة أصلا فلازم توقف ده، خصوصا لإن التوتر والقلق دفع الناس إنهم يعملوا سلوكيات ماكنتش ضمن عاداتهم اليومية وبقى فيه سلوكيات كمان مش ضرورية.

3- ثقف نفسك:

اقرأ كويس عن المرض وطرق العدوى وطرق الانتقال واعرف إيه هي أحسن الطرق للنضافة والوقاية من غير ما تنفذ خلطات ووصفات غريبة للوقاية.

منظمة الصحة العالمية كمان أصدرت شوية نصايح عن الحفاظ على صحتك العقلية وحالتك النفسية الفترة دي بما إن أغلب الناس في العالم كله حاسين بخوف وذعر ده غير إنهم قاعدين في البيت ومفيش فرص إنهم يشتتوا تفكيرهم عن اللي بيحصل أو عن الأخبار السيئة، ودي كانت نصايح منظمة الصحة العالمية للحفاظ على حالتك النفسية وصحتك العقلية:

1- تجنب سماع وقراءة الأخبار طول الوقت خصوصا اللي بتحسسك بقلق أو خوف وافصل منها شوية 

2- دور على طرق عن إزاي تحمي نفسك وتحمي اللي بتحبهم من الفيروس

3- مش كل شوية تقرأ الأخبار العاجلة، خلي فيه وقت معين مرة أو مرتين بس في اليوم اللي بتشوف فيهم الأخبار.

أخيرا خلينا نقولك إن وزارة الصحة المصرية كمان أعلنت عن خطين ساخنين للدعم النفسي للمواطنين في البيوت في خلال فترة مواجهة فيروس كورونا وهما (0220816831 )و( 0808880700) فلو حاسس بأي مشاكل نفسية بسبب الضغط والجو العام الفترة دي ممكن تكلمهم.

Comments: