فيتامينات وعادات يومية هتحتاجها لتقوية جهازك المناعي!

01/04/2020

منظمة الصحة العالمية أعلنت أكتر من مرة إن تطوير لقاح فيروس كورونا هيستغرق سنة على الأقل، عشان كده أحسن وسيلة لمقاومة الفيروس لحد ظهور اللقاح هي الوقاية اللي ممكن كلنا نحققها من خلال بعض العادات اليومية سواء كانت عادات صحية أو غذائية، وده الطريق الوحيد اللي قدامنا حاليا، حسب تأكيدات وزارة الصحة المصرية ومنظمة الصحة العالمية.

جهاز المناعة هو خط الدفاع الأول للجسم ضد أي مواد ضارة زي البكتريا أو الفيروسات، اهتمامك بتقوية جهازك المناعي هيخليه يقوم بوظيفته على أكمل وجه عن طريق العادات الغذائية والأكل خصوصا الأكل اللي بيحتوي على فيتامينات زي فيتامين "أ" وفيتامين "ب" وفيتامين "ج" وفيتامين "د" وفيتامين "هـ" والأكلات اللي بتحتوي على عناصر زي الزنك والسيلينيوم والحديد، بس خلينا نقولك بالتفصيل كل فيتامين أو عنصر فيهم مفيد لإيه بالظبط حسب تقارير لوزارة الصحة المصرية:

1- فيتامين "أ":

بيحافظ على تركيب خلايا الجلد والجهاز التنفسي والأمعاء، وبيساعد كمان في صنع الأجسام المضادة.

وأهم مصادر فيتامين "أ" بتكون موجودة في الأسماك الزيتية زي التونة، والكبدة سواء كانت في الفراخ أو اللحوم وصفار البيض والجزر والبطاطا وقرع العسل.

2- فيتامين "ب":

مجموعة فيتامينات "ب" أو B خصوصا  B1, B6, B9, B12 بتساعد على استجابة الجسم الأولى بمجرد ما بيتعرف على العامل اللي بيسبب المرض عن طريق التأثير على إنتاج ونشاط الخلايا "الطبيعية القاتلة" اللي بتخلي الخلايا المصابة تنفجر، وبيطلق عليها العملية دي اسم عملية موت الخلايا المبرمج.

وأهم مصادرB1 و B6 هي الحبوب الكاملة والبقوليات والخضار اللي ورقه أخضر داكن، وفي الفاكهة والمكسرات والسمك والفراخ واللحوم.

وأهم مصادر فيتامين B9، الخضروات الورقية والبقوليات والمكسرات والبذور زي الحلبة المنبتة.

وأهم مصادر فيتامين B12 أو (سيانوكوبالامين) هي المنتجات الحيوانية زي البيض واللحوم ومنتجات الألبان.

Paid partnership with Eva Pharma

3- فيتامين "ج" وفيتامين "هـ":

بيساعد على حماية الخلايا من الإجهاد التأكسدي اللي بيحصل لما الجسم بيحارب العدوى واللي بينتج عنه بعض "الشوادر الحرة" اللي بتتسبب في التهاب الأنسجة لكن فيتامين "ج" بيساعد على إزالتها.

أهم مصادر فيتامين "ج" هي البرتقال والليمون والجوافة والكيوي والبروكلي والطماطم والفلفل، وأهم مصادر فيتامين "هـ"، هي المكسرات والخضروات الورقية.

4- فيتامين "د":

بيساعد الخلايا المناعية في تدمير مسببات الأمراض اللي بتؤدي للعدوى، وبيساعد كمان في الحماية من التهابات الجهاز التنفسي الحادة.

أهم مصادر فيتامين "د" هي البيض والأسماك، بس كمان له مصدر تاني مهم وهو في أشعة الشمس.

5-  عناصر الزنك والحديد والسيلينيوم:

بيساعدوا على تعزيز الخلايا المناعية، ده غير إن الحديد بيساعد على تنظيم تفاعلات الإنزيمات الضرورية للخلايا المناعية عشان يتم التعرف على مسببات المرض واستهدافها، والزنك بيساعد على الحفاظ على سلامة الجلد والأغشية المخاطية، والزنك والسيلينيوم بيساعدوا في التخلص من بعض الضرر الناتج من الإجهاد التأكسدي لإنهم بيشتغلوا كمضادات للأكسدة.

أهم المصادر اللي بيبقى موجود فيها الحديد هي اللحوم والكبدة والفراخ والبقوليات والأسماك، أما الزنك فهو موجود في المحار والقشريات البحرية والمكسرات، والسيلينيوم موجود في اللحوم والحبوب الكاملة وفطر عيش الغراب (المشروم).

Paid partnership with Eva Pharma

أما بالنسبة للعادات الصحية اللي هتساعدك على الوقاية من "كورونا" وزارة الصحة المصرية قالت:

1- غسل الإيد بالمياه والصابون أو فركها بمطهر كحولي عشان يقتلوا أي فيروسات ممكن تبقى موجودة عليها

2- لو بتعطس أو بتكح، حافظ على إنك تكح في منديل أو في كوعك وهو متني، واتخلص من المنديل بعد كده في سلة مهملات مقفولة، وطهر إيدك بالمياه والصابون أو بمطهر كحولي

3- خليك محافظ على مسافة بينك وبين أي شخص خصوصا لو كان بيعطس أو بيكح حوالي 3 متر أو متر واحد حتى على الأقل.

4- حاول ماتلمسش وشك بإيدك، وبالتحديد عينك ومناخيرك وفمك

وده الفرق في الأعراض عشان تعرف تفرق فيروس كورونا عن أعراض الأنفلونزا العادية:

1- فيروس كورونا أهم أعراضه بتشمل الحمى والسعال الجاف وضيق التنفس، وآلام العضلات والشعور بالإعياء، وصداع في الرأس وإسهال

2- في بعض الحالات بيحصل سيلان في الأنف والتهاب في الحلق، لكن العرضين دول من علامات عدوى الجهاز التنفسي العلوي عشان كده ممكن تكون أعراض إنفلونزا عادية

3- فيروس كورونا بيأثر على الجهاز التنفسي السفلي ومعظم المصابين بيه بيبقى عندهم سعال جاف أو ضيق في التنفس أو التهاب رئوي لكن مابيكونش فيه التهاب في الحلق

Paid partnership with Eva Pharma

Comments: