٥ أخبار ماتهمكش لو عايز تفصل عن أخبار الكورونا!

01/04/2020

1- سيدة بريطانية استخدمت منتج من المنتجات اللي بتترش على وش عشان تعمل Tan لكنها اتفاجئت تاني يوم لما صحيت إن المنتج ده خلى وشها لونه أخضر تماماً، وفضلت محبوسة في أوضتها لحد ما بعد يومين اللون الأخضر ده اختفى ورجع شكلها طبيعي تاني وقررت إنها مش هتعمل كده تاني في حياتها.

2- الفنان الكويتي نبيل شعيل طلع لايف على إنستجرام بالغلط ومكانش عارف يتصرف إزاي لإنه مالهوش أوي في التكنولوجيا فقعد يلعب في الفلاتر لحد ما ظهر بالشكل المريب ده ومكانش عارف يشيل الفلاتر إزاي، والصور انتشرت بين نشطاء مواقع التواصل في الخليج وقعدوا يسفوا عليه وعملت ضجة تضاهي ضجة نزول أغنيته القديمة "ما أروعك!".

3-الحكم الدولي جهاد جريشة عمل شكوى رسمية لاتحاد الكرة ضد إبراهيم نور الدين عشان إبراهيم اتهمه بإنه خد Screenshots لجروب على الواتساب بيجمع بين جهاد وإبراهيم وبعض الحكام التانيين ومشكلة كده في مستوى خناقات جروبات دفعة سنة تالتة في كلية إعلام جامعة القاهرة.

4-المغني "حاتم فهمي" صاحب الأغنية الأيقونية "مش من حق تحلم بيا أو بعنيا" قرر بعد اختفاء طويل إنه ينزل قريباً أغنية جديدة اسمها "شُفت"، والحقيقة الناس مستنيه الأغنية عشان "تشوف" لإن ده هيبقى الحدث الفني الأهم في 2020 بكل تأكيد لأن بالشكل ده مفيش أحداث فنية هتحصل السنادي.

5- الإعلامية البريطانية "كارول فوردرمان" صرحت إنها متضايقة جداً من التعليقات اللي بتجيلها للناس اللي معجبة بشكلها وبالأخص بـ"مؤخرتها" زي ما قالت.. وكانت شايفة إن ماينفعش الناس تتجاهل إنجازاتها الإعلامية والخطوات اللي بتاخدها في توعية الناس ومساعدة الأطفال بالحملات اللي بتعملها ويركزوا في الأخر في المؤخرة، هي عندها حق بصراحة، بس لو "سما المصري" عرفت الخبر ده هتضايق أوي.

وبكده تكون خلصت نشرتنا من الأخبار اللي ماتهمش أي حد دي، أتمنى تكونوا ماستفادتوش أي حاجة لأن ده المطلوب بصراحة، واستنوا النشرة الجاية بأخبار أتفه من دي بكتير!

Comments: