٤ أخبار ماتهمكش لو عايز تفصل عن أخبار الكورونا!

05/04/2020

1- أصدر المهندس إبراهيم عثمان، رئيس نادي الإسماعيلي قرار صادم ومفاجيء بمنع اللاعبين من الظهور الإعلامي خلال الفترة دي حفاظاً على سرية الأحداث اللي بتحصل في النادي الفترة دي اللي محدش مهتم يعرف إيه هي بصراحة.

2- فيه خناقة على إنستجرام دايرة اليومين دول بين ريهام سعيد وريم البارودي والاتنين بيلقحوا لبعض في ستوريز إنستجرام رغم إنهم كانوا أصحاب زمان، واتسربت Voice notes لريم البارودي بتشتم فيها ريهام وبتقول عليها "أصغر إعلامي برقبة ريهام سعيد، ومحدش فاهم سبب بداية الخناقة ولا متخيلين هتنتهي إزاي.

3- في ظل هذه الأجواء الكورونية، شيرين عبد الوهاب نزلت أغنية جديدة بعنوان "مش قد الهوى".. شافتنا قاعدين في البيت متنكدين خلقة فقررت تنكد علينا أكتر بأغنيتها.. بس الحق يتقال هي أغنية حلوة وبقت دلوقتي ترند رقم 3 على يوتيوب.

4- نادية الجندي دخلت في صراع دموي بعد ماكتبت كومنت على صورة لأحمد السقا بتباركله على برنامجه الجديد وقالتله "مبروك وبالتوفيق والنجاح"، ففيه واحدة من المتابعين ردت عليها قالت "سبحان الله هو لو مكانش فنان مشهور والله يا أستاذة نادية ماكنتيش هنأتيه، لكن عشان فنان ومشهور يبقى لازم تهنئة والله يا أستاذة أنا بتعصب لأن ربنا وعبيده مبيحبوش العنصرية"، تقوم بقا نجمة الجماهير ترد عليها وتقول "لا حضرتك مش كده لأني اتعاملت معاه عن قرب في المسلسل الجديد وفي غربة وسفر ‏خارج بلدنا ولمست فيه نموذج للفنان الملتزم المحترم اللي بيحب فنه وعمله وبيحترم جمهوره".. ودي خناقة كده مالهاش أي لازمة زي بقية الأخبار اللي قولناها.

وبكده تكون خلصت نشرة الأخبار اللي ماتهمش أي حد دي، أتمنى تكونوا ماستفادتوش أي حاجة وتكونوا ضيعتوا وقتكم لأن ده المطلوب، وإلى اللقاء في نشرة أخبار تانية مالهاش لازمة غير إنك تفصل عن أخبار الكورونا!

Comments: