فوائد لا تعرفها عن الوحدة!

07/04/2020

وسط سرعة وزحمة ايقاع حياتنا الطبيعي.. مابيكونش في وقت للواحد إنه يقعد لوحده شوية.. بس حالياً في وسط الظروف اللي بنمر بيها والحجر الصحي.. جاتلنا فرصة إجبارية نقعد مع نفسنا لوقت أطول

"الوحدة" ممكن تبقى أكبر كوابيس لناس كتير في الدنيا.. بس الحقيقة إنها مش دايماً كابوس بالعكس هي ممكن تبقى صحية ومفيدة جداً

عشان تقدر تشوف  أي عمل فني زي لوحة  أو عمل نحتي بشكل أحسن.. بتحتاج تبعد عنه  شوية عشان عينيك تلقط كل تفاصيه.. لأن طول ما إنت قريب هتتوه عنك بعض التفاصيل.. لأن العين البشرية ما بتقدرش تشوف أكتر من زاوية في وقتٍ واحد
حياتك بقى عاملة زي العمل الفني ده.. وإنت مسحول جواها
عمرك ما هتقدر تشوفها بشكل واضح.. بس تجربة زي
اللي بنمر بيها حالياً ممكن تبقى فرصة نشوف كل حاجة  كانت مسببالنا “قلق، خوف، احباط” والحاجات والناس اللي متضايقين منهم.. كل حاجة هتبان أصغر لأنك شايفها من بعيد وده هيخليك تقدر تتعامل معاها بشكل أسهل من أي وقت قبل كده

 الوحدة هتديك فرصة تصاحب نفسك  وتكتشفها بشكل أعمق  

وتكسب الصاحب الوحيد اللي مش هيفارقك طول عمرك اللي هو "إنت"

الوجود في وسط ناس طول الوقت بيستنزف طاقة ومشاعر وده اللي بيسبب لنا الإحساس إننا مش قادرين نعمل حاجة لأن طاقتنا مستنزفة..  قعدتك لوحدك هتبقى الفرصة إنك تفصل وترجع تشحن الطاقة دي عشان تعرف تكمل 

وجودك لوحدك هيخليك تقدر القيمة الحقيقية للحاجات وتحط كل شيء في مكانه الطبيعي.. هيساعدك ترتب أولوياتك وتعرف إنت فعلا عايز إيه من غير ضغوط أو أي مؤثرات خارجية ممكن تشتتك وتأثر على تفكيرك .. لأن معظم الوقت آراء اللي حوالينا بتأثر بشكل كبير على قراراتنا واختياراتنا

صحيح الوحدة دي مفروضة علينا بسبب الظروف.. بس كلنا من فترة للتانية محتاجين ناخد بريك ونقف شوية ناخد نفسنا
ونشوف إحنا واقفين فين في الدنيا.. ورايحين فين!

Comments: