إزاي تحمي نفسك من شخص مصاب بفيروس "كورونا" وتدعمه نفسياً

07/04/2020

مع استمرار تطور الأعداد المصابة بالكورونا في العالم كله وانتشار تعليمات الوقاية في كل الأماكن في وسائل الإعلام المختلفة إلا إن كل التعليمات بتتكلم عن وقاية الشخص لنفسه من فيروس الكورونا وطبعا على قد ما ده شئ مهم إلا إن فيه شئ مهم تاني كلنا معرضين نتحط فيه وهو إننا نبقى عارفين حد اتصاب بالفيروس.

أكيد طبعا أول حاجة هتيجي في دماغك إزي تحمي نفسك من إن الفيروس يتنقل لك وده مش لسلامتك بس، ده لسلامتك ولسلامة كل الدايرة المحيطة بيك والأشخاص اللي بتتعامل معاهم، بس خلينا نقولك إزاي تتعامل مع الشخص المصاب بالفيروس عشان تحمي نفسك، وحاجة كمان هي إنك إزاي تدعم شخص اتصاب خصوصا إنه بيبقى في حالة نفسيه سيئة.

أولا إزاي تتعامل أو تاخد بالك من شخص مصاب بالكورونا عندك في البيت وفقاً لمنظمة الصحة العالمية:

1- خليك في أوضة منفصلة عن الشخص المصاب واستخدم حمام مختلف عن الحمام اللي بيستخدمه.

2- ماتقبلش بوجود أي زيارات ولا ناس في البيت مش ضروريين.

3- احتمال كبير المريض مايبقاش قادر يتنفس فصعب يلبس الكمامة عشان كده البس إنت كمامة أحسن وغطي عنيك وإيدك

4- اغسيل ايدك دايما بالمياه والصابون لمدة ماتقلش عن 20 ثانية أو استخدم دايما كحول وافرك إيدك ويبقى تركيز الكحول فيه ما يقلش عن 60% 

5- مفيش داعي إنك تسيب البيت أو تروح في أي حته خصوصا إنك لو اتعديت منه ولسه ماظهرش عليك أعراض ممكن تنقل الفيروس لمكان تاني.

6- نضف الأسطح بتاعت البيت باستمرار خصوصا الاسطح اللي بيتم لمسها دايما.

7- استخدم جوانتي وإنت بتلمس الغسيل وبعد ما تقلع الجوانتي اغسل ايدك فوراَ

8- اتجنب لمس وشك بايدك خصوصا عينك ومناخيرك وبوقك

تاني حاجة بقى لو تعرف حد عزيز عليك (بعد الشر يعني) واتصاب فممكن، فهو أكيد هيبقى حاسس بقلق على نفسه، فإنت ممكن تقدم له دعم معنوي حتى لو مش هتقدر تقعد معاه في نفس الأوضة ولا هتقدر تحصنه فممكن تعمل الخطوات عشان تخليه أحسن:

1- كلمه على الموبايل:

هي أكتر طريقة بديهية ممكن تيجي على بالك لما تبقى مش عارف تشوف حد أو تقعد معاه هي إنك تكلمه وتطمن عليه، بس هي مهمة عشان هتخلي الشخص مايحسش إنه لوحده ومايحسش بعزله، وطبعا يبقى أحسن لو استخدمت "فيديو كول" عشان تقدر تتواصل معاه ويحس إن فيه حد قاعد معاه بجد.

2- اسمعه كويس واسأله على الطريقة المناسبة اللي تقدر تساعده بيها:

أحسن وسيلة تحسس الشخص إنه مش لوحده وجنبه ناس هي إنك تسمعه للأخر مهما كان اللي بيتكلم فيه، وممكن تعرض عليه شوية حاجات تسليه أو إنك تجيب له حاجات تسليه، زي إنك تجيب له كلب مثلا أو تقترح عليه أفلام ومسلسلات يقدر يشوفها.

3- تابعه دايما على السوشيال ميديا:

تخيل حياتك كده في وسط الوباء ده من غير ما يبقى فيه سوشيال ميديا، فخليك مع الشخص المصاب على السوشيال ميديا وتابع الحاجات اللي بيكتبها، وحاول تبعت له حاجات دمها خفيف أو حاجات تسليه وتضحكه، ويمكن دي الصورة الحلوة للسوشيال ميديا اللي بتظهر في الأوقات اللي زي كده عشان الشخص اللي في الحجر الصحي بيحتاج اهتمام وآخر حاجة بيحتاجها إنه يحس إنه وحيد.

4- هاتله الحاجات اللي محتاجها:

سواء كان الشخص العزيز عليك معزول في بيت أو في مستشفي، فهو مستحيل يخرج قبل ما حالته تتحول من إيجابية لسلبية وطبعا هيبقى أحسن خدمة ممكن تعملها له هي إنك توصل له الطلبات أو تجيب له حاجات محتاجها سواء كان أكل أو شرب أو حاجات للعناية بنفسه أو علاج لإن ده هيحسسه إن حد بيخاف عليه وبيدعمه.

5- اعمل معاه نشاط مشترك:

الأنشطة المشتركة من أكتر الحاجات اللي بتحسس الواحد إنه في ونس، مثال على الأنشطة المشتركة دي هي إنكوا تتفقوا تقروا كتاب سوا أو تتابعوا مسلسل مع بعض عشان تتكلموا في أحداثه مع بعض، أو تلعبوا مع بعض "أونلاين جيمز".

6- خليك بالنسبة له مصدر أخبار موثوق فيه:

بما إن الإشاعات كتير على السوشيال ميديا فخليك إنت مصدر أخبار موثوق للشخص المصاب لإنه هيبقى محتاج يسمع أخبار حقيقة تمنع عنه أي قلق أو توتر متصدر له من مواقع التواصل الاجتماعي.

7- ساعدهم يتبعوا روتين يومي:

الروتين اليومي على قد ما هو بيزهق إلا إنه بيضمن للشخص إنه ينام كويس وياكل كويس وإن صحته العقلية تبقى كويسة، وعموما ممكن تساعد أي شخص في حياتك بيعاني من تعب نفسي في فترة الحجر الصحي إنه يبقى عنده روتين لإن ده هيخليه أحسن.

Comments: