قلة الأحضان والتلامس بتسبب الـ"Skin hunger".. اعرف إزاي تتخطاه في زمن "الكورونا"

09/04/2020

آخر كام سنة انتشرت ظاهرة كده عند الأجانب إن حد بينزل الشارع وبيكتب على ورقة كبيرة "Hugs for free" بمعنى أحضان مجانية، يمكن لإن الأحضان فعلا ليها تأثير كويس على الطرفين اللي بيحضن واللي بيتحضن فلما الظروف كانت بتدخل في مرحلة سيئة الناس أول حاجة بيعرضوها على بعض هي الحضن.

وبالرغم إن البشرية حاليا في مرحلة صعبة ومليانة مشاعر قلق وخوف بسبب فيروس كورونا إلا إن لنفس السبب محدش قادر يطمن اللي بيحبهم وبيحبوه بنفس الطريقة البديهية اللي اتعودنا عليها أو حتى يقدر يسلم عليهم بنفس الطريقة.

موقع women working قال إزاي ممكن قلة الأحضان تأثر علينا عن طريق ظاهرة اسمها الـ "Skin hunger" أو جوع الجلد، وتأثير الظاهرة دي عليك إنك هتحس نفسك وحيد وعندك رغبة إن كل أهلك وصحابك يبقوا جنبك لإن الظاهرة دي بتكون ناتجة عن عدم التواصل الجسدي بين البشر، وعموما مش لازم تكون الظاهرة دي ناتجة بسبب عدم التواصل أو التلامس الجنسي بينك وبين شخص ما، ويمكن كل اللي هتبقى محتاجة وقتها هو إنك تلمس شخص ما، حتى لو كان طفل صغير عن طريق الاهتمام والرعاية به أو حضن حد من أهلك، ولو اتعرضت للظاهرة دي ممكن تتعرض لبعض الأثار الجانبية.

الأثار الجانبية لظاهرة الـ "Skin hunger" هي إحساس الوحدة والاكتئاب والتوتر وضعف الصحة العامة، وعلى حسب كلام الموقع إن نقص التلامس والأحضان بيسبب اضطرابات القلق ونقص المناعة وأنواع مختلفة من اضطرابات المزاج.

وفي الحالات اللي على المدى البعيد ممكن يسبب السمنة أو عدم القدرة على تفسير المشاعر وعدم القدرة على التعبير عنها بالشكل السليم.

عموما أكيد الفترة دي عرفتك قد إيه التواصل الجسدي والأحضان كانوا شئ مهم وإنت مش واخد بالك منه، بس لو حسيت إنك بدأت تدخل في حالة الـ "Skin hunger" خلينا نقولك ممكن تعالجها إزاي في زمن الكورونا:

1- ربي حيوان أليف:

الحيوانات ممكن تبقى طريقة فعالة عشان تعالج بيها إحساسك بالوحدة لإنك ممكن تحضنهم ولإنهم بيحسوا بيك ووقت ما تكون زعلان، وعلى غير البشر إنت ممكن آخر كل يوم تحضنهم من غير ما تطلب منهم ده أو يحسوا إنك بتخترق مساحتهم الشخصية، الفترة دي هي أحسن فترة يبقى عندك فيها حيوان أليف ولأسباب كتير.

2- اعمل مساج:

خد إجراءات الوقاية الكافية عن طريق إنك تخلي شخص يغسل ايده كويس ويعقمها ويلبس جوانتي ويبقى حد من دايرتك الآمنة اللي قاعد معاك في البيت يعملك مساج، عن طريق إنه يدلك لك كتفك أو إيدك حتى.

3- خلي بالك من طفل:

لو فيه طفل في حياتك وبترعاه غالبا هتبقى بتلسمه وبيلمسك غصب عنك خصوصا لو إنتي أم، وهيبقى من ضمن الحلول اللي تواجه بيها الـ "Skin hunger"، بس المهم إنك تخليك في البيت وماتحولش تختلط بحد تاني وخد كل الإجراءات الوقائية عشان تخلي بالك من الطفل قبل نفسك.

Comments: