بنفكرك بيه.. قايمة بـ 10 مسلسلات قديمة تلحق تشوفهم على يوتيوب مجانًا

12/04/2020

كتب: كابتن بسلة

قد يبدو لك الموضوع ده غريب وهتسأل نفسك إيه الجديد ماهو كل حاجة قديمة موجودة على يوتيوب أكيد، المفجأة بقى للأسف مش كل حاجة قديمة هتلاقيها على يوتيوب زي زمان، نظرًا لزيادة منصات العرض الديجتال وشرائها لحقوق ملكية حاجات كتير ففي محتوى كبير من المسلسلات العربي بدأ يختفي من اليوتيوب، والمسلسل اللي شوفته النهاردة وكنت بتتفرج عليه ببلاش ومأجل تعيد مشاهدته تاني بحجة إنه ماهو قاعد أهو قدامي هيروح فين ممكن بكرة تلاقيه اتشال من يوتيوب كله ومش موجود منه إلا مقاطع نادرة ولو حبيت تشوفه تاني لازم تعمل أكونت على واحد من المنصات اللي اشترته دي.

عشان كدة قولنا نفكرك بكام مسلسل قديم وكلاسيكي من الدراما المصرية لسه متوفرين مجانًا على يوتيوب وبجودة كويسة جدًا كمان تقدر تشوفهم في الفترة دي وتكسر بيهم زهق قعدة البيت شوية وممكن كمان تشارك مشاهدتهم مع عيلتك وتسترجعوا لحظات لطيفة سوا.

1- مسلسل الضوء الشارد

الملحمة الدرامية الصعيدية الخالدة للمخرج مجدي أبو عميرة واللي كانت إنتاج سنة 1998 وفتحت بعدها الباب لترند مسلسلات الصعيد اللي حاولوا يقربوا من حلاوتها ولكن مقدروش يهزوها من على عرشها طول السنين دي وفضل الضوء الشارد بأداء الفنان ممدوح عبد العليم-الله يرحمه- العبقري وموسيقى ياسر عبد الرحمن العظيمة مسيطرين على الدراما الصعيدية بلا منازع.

المسلسل متاح كامل على قناة "ماسبيرو دراما" ودي البلاي ليست بتاعته..

2- مسلسل حكاية ميزو

مسلسل كوميدي كلاسيكي خفيف لطيف من بطولة سمير غانم وإسعاد يونس وفردوس عبد الحميد من إنتاج سنة 1977 و13 حلقة فقط للناس اللي خلقها ضيق ومابتحبش المسلسلات الطويلة ومتاح على قناة "ماسبيرو زمان" ودي البلاي ليست بتاعته..

3- مسلسل أوبرا عايدة

يحيى الفخراني في واحد من أروش وأتقل أدواره (سيد أوبرا) اللي حبب ناس كتير في مهنة المحاماة، أوبرا عايدة إنتاج سنة 2000  مسلسل درامي بتاتش كوميدي معمول بمزاج في 27 حلقة موجود برضه على قناة "ماسبيرو دراما" ودي البلاي ليست بتاعته..

4- مسلسل مبروك جالك قلق

التهييسة الألفينية الغنية عن التعريف إنتاج 2005 وواحد من أفضل أدوار غادة عادل في الكوميديا ودويتو هاني رامزي مع طلعت زكريا ومن أفخم أنواع السف على العصابات الشريرة التقليدية بدويتو حجاج عبد العظيم وإنتصار.

المسلسل متاح مجانًا على قناة "العدل جروب" بكواليتي كويسة جداً

5- مسلسل غاضبون وغاضبات

مسلسل كوميدي إجتماعي  إنتاج سنة 1993 بطولة شريف منير وشيرين سيف النصر في فترة قمة تألقهم الدرامي لما كانوا دويتو تليفزيوني رايق جدًا وكان نفسي أرشحلهم طبعًا مسلسل "اللص الذي أحبه" لأنه أحلى بكتير بس للأسف اتشال من على يوتيوب فعلى طريقة عاطف في الناظر مالقتش عيش جبتلك جرجير ممكن تسلي نفسك في المسلسل القصير ده، هو 12 حلقة منفصلة كل واحدة بقصة مختلفة وموجود على قناة "ماسبيرو دراما" بجودة شغالة يعني بنت حلال، ودي البلاي ليست بتاعته..

6- مسلسل مطعم تشي توتو

تعاون على كبر بين فاروق الفيشاوي -الله يرحمه- وسمير غانم في مسلسل كوميدي جميل جدًا أشبه بمسلسلات السيت كوم الأمريكية، البطل فيها "مطعم تشي توتو" والحلقات كل واحدة بقصة مختلفة بمغامرات واسكتشات كوميدية طريفة جدًا في المطعم ده.

المسلسل 24 حلقة وعلى قناة "محمد فوزي فيلم" ودي البلاي ليست بتاعته

7- مسلسل لن أعيش في جلباب أبي

وهل يخفى القمر؟! للأسف آه ممكن يخفى بكرة من اليوتيوب، لن أعيش في جلباب أبي مش محتاج أي تعريف طبعًا بس قولت أرشحهولك في الليستة دي لأنه ترند بقاله فترة كبيرة وأكيد عاجلاً أم أجلاً حد هيشتريه ومش هيبقى متاح للمشاهدة المجانية، فاللحق شوفه ومتع نفسك بواحدة من جواهر تاج – الله شايف التعبير البلاغي؟!- الدراما المصرية وقصة الحب الخالدة لفاطنة وعبد الغفور البرعي.

المسلسل 36 حلقة ومتاح على قناة "عرب دراما" ودي البلاي ليست بتاعته..

8- مسلسل محمود المصري

من أكتر المسلسلات شعبية للفنان الراحل محمود عبد العزيز –الله يرحمه- في الألفينات وبتيمة قصة الكفاح المحببة لينا كلنا وكان عودة درامية قوية جدًا له، المسلسل إنتاج 2004 و33 حلقة وموجود بكواليتي كويسة جدًا على قناة "العدل جروب" ودي البلاي ليست بتاعته..

9- مسلسل ساكن قصادي

من أجمل المسلسلات الكوميدية في التسعينات إنتاج 1995 وحاجة أشبه بتجربة سيت كوم كدة مصرية ظريفة جدًا، المسلسل منفصل متصل كل حلقة بقصة وموقف جديد متوفر منه الجزء الأول 30 حلقة بكواليتي كويسة على قناة "الهيئة الوطنية للإعلام" ودي لينك البلاي ليست بتاعته

10- مسلسل الرجل العناب

برغم إنه إنتاج 2013 ويعتبر حديث نسبيًا عن باقي مسلسلات القايمة دي بس بما إنه ترند اليومين دول وكمان اتفاجئت إنه موجود HD مجانًا على اليوتيوب على قناة "أوسكار بيكتشرز" فقولت ماينفعش نفوت الفرصة دي ونرشحه قبل ما يطير هو كمان في أي منصة تانية وتلحق تشوف واحد من أجمل عبثيات الثلاثي هشام ماجد وشيكو وأحمد فهمي ومعاهم بيومي فؤاد وواحد من آخر أعمال الكوميديان العبقري يوسف عيد –الله يرحمه- في جرعة كوميدية عظيمة هتهون عليك كتير من قعدة الحظر وأخبار الكورونا الكئيبة.

المسلسل 30 حلقة على قناة "أوسكار بيكتشرز" ودي البلاي ليست بتاعته

كدة تبقى خلصت قايمتنا نتمنى مشاهدة ممتعة لو لسه أول مرة تتفرج على أي حاجة فيهم ومشاهدة مليانة بذكريات حلوة لو بتشوفهم لتاني مرة وخد بالك لو لاقيت أي مسلسل منهم مشتغلش أو اتمسح فده معناه إن ده حصل بعد كتابة الموضوع ده للأسف لأنه كان شغال وحياة غلاوتك عندي أيها القارىء الكريم..

تحياتي..

Comments: