وكالة ناسا هتوريك إيه الصور اللي لقطها تلسكوب "هابل" يوم عيد ميلادك

12/04/2020

برغم كل اللي بيحصل في 2020 ده إلا إنها سنة مهمة جدا في اكتشاف الفضاء، خصوصا لإن تلسكوب "هابل" بيحتفل بعيد ميلاده الـ 30 في سنة 2020.

تلسكوب "هابل" كان من أشهر الحاجات اللي أرسلتها وكالة "ناسا" للفضاء، من حوالي 30 سنة، وخلال الـ 30 سنة دول التلسكوب "هابل" صور عدد غير طبيعي من المشاهد في الفضاء، وللاحتفال بعيد ميلاد "هابل" ناسا قدمت خدمة جديدة تقدر من خلالها تشوف إيه الصورة اللي التلسكوب صورها يوم عيد ميلادك.

كل اللي عليك عشان تعمله إنك تختار تاريخ عيد ميلادك شهر ويوم على موقع وكالة ناسا، وهتعرف وقتها إيه اللي حصل يوم عيد ميلادك في الفضاء وإنت بتحتفل بعيد ميلادك وبتنفخ في الشمع.

وعن طريق الرابط ده ممكن تشوف إيه الصور اللي لقطها "هابل" يوم عيد ميلادك 

وبدأ بالفعل الناس يشاركوا الصور اللي ظهرت لهم من موقع ناسا على مواقع التواصل الاجتماعي بالذات في تويتر وانستجرام تحت هاشتاج #Hubble30 .

بيتم وصف تلسكوب "هابل" إنه قد أتوبيس مدرسة، وأطلقته وكالة ناسا في سنة 1990، ومن وقتها ولحد دلوقتي سجل حوالي 1.4 مليون ملاحظة على كتير من النجوم والكواكب، ووفقا لـ " ScienceAlert" فهو بيدور حوالين الأرض بسرعة 27000 كيلو متر في الساعة وممكن للتلسكوب ده إنه يشاور على الأجسام البعيدة عن طريق أشعة الليزر وممكن تبقى بعيده عنه بمسافة 320 كيلو، وقادر كمان إنه يراقب الأحداث اللي حصلت على الأرض قبل كده من حوالي 13.4 مليون سنة ضوئية.

ووفقا لوكالة ناسا فالتلسكوب "هابل" بيستكشف الكون لمدة 24 ساعة 7 أيام في الأسبوع، وده معناه إنه أكيد لاحظ وصور عجايب الكون في كل يوم من أيام السنة واللي من ضمنهم يوم عيد ميلادك.

Comments: