لو عندك شخص في البيت صعب السيطرة عليه وعلى التزامه بالحجر المنزلي.. تتعامل معاه إزاي؟

14/04/2020

في الأيام الأخيرة وفي ظل تفشي انتشار كورونا.. لجأت معظم الدول لمطالبة الناس بالتزام الحجر المنزلي للحد من انتشار المرض وتطور الأمر لفرض حظر تجوال كامل، وفي بعض الدول حظر تجوال جزئي ومنهم مصر..

بعض الناس التزمت بالاجراء وطبقته بشكل كامل، وبعض الناس كانت مضطرة تنزل لأسباب زي الشغل مثلًا ودول كان ليهم عذرهم.. لكن موضوعنا النهاردة عن اللي مالوش عذر وواخد الموضوع بهزار واستهتار وبيعرض حياته وحياة اللي حواليه لخطر الإصابة بفيروس كورونا..

ودول فئة كبيرة أغلب الأسر المصرية بتعاني منها.. يعني مثلاً ممكن يكون البيت كله ملتزم بالعزل المنزلي ومحافظ على الاجراءات الوقائية بشكل تام.. لكن فيه شخص واحد مصمم ينزل دايمًا ويعيش حياته بشكل طبيعي ولا كأننا بنعاني من وضع كارثي يستحق التضحية برفاهيات الحياة اليومية عشان نحافظ على صحتنا وصحة أسرنا ونقلل فرص انتشار المرض في المجتمع..

طيب نتعامل إزاي مع الشخص ده؟

- في البداية نحاول نفهم الشخصية اللي بنتعامل معاها.. وايه الدوافع اللي خليتها تتصرف بالشكل ده وليه رافضة المشاركة في حاجة كلنا بنعملها وملتزمين بيها

- اما تبدأ تفهم الشخصية.. حاول تتعامل معاها بطريقة كويسة وتجنب تمامًا العنف والغضب، عشان هيزودوا المشكلة مش هيحلوها

- متحاولش تركز على عناد الشخصية اللي قدامك وتجنب تتكلم عن النقطة دي وانت بتتناقش معاها

- غيّر من نفسك واتصرف قدام الشخصية دي دايمًا بالتصرفات اللي نفسك تخليها تتصرفها زيك

- اقترح أفكار جديدة وبدايل مُقنعة تخلي الشخصية العنيدة تتخلى عن عندها وتوافق تحاول تجرب البدايل دي

- خاطب العواطف في الشخصية دي واظهر دايمًا اهتمامك بمشكلتها وأكد أكتر من مرة إنها مشكلة عامة وكلنا مضطرين نتعامل معاها

- ومهم جدًا أختيار التوقيت المناسب للمناقشة.. وإنك تمهد بشكل بسيط للحوار اللي هيدور بينكم

- ده بجانب التزامك بالاجراءات الوقائية في البيت وانت بتتعامل مع الشخصية دي، زي عدم استخدام نفس أدوات الأكل والفوط الشخصية وهكذا

- أخيرًا إنك تتحلى بالصبر وتدعي ربنا يعدي الأيام دي على خير..

















 

Comments: