مين المفروض يدفع؟ أسئلة أزلية في المواعيد الغرامية

15/04/2020

كتبت: نوران عاطف

لو اللي خارجين مع بعض ولد وبنت، مين المفروض يحاسب؟ طب لو معاد غرامي؟ لو أول مرة؟...إلخ، أسئلة مطروحة طول الوقت وعلى الرغم من الثورة النسائية في معظم دول العالم إلا إن النوع ده الموضوعات مازال على ترابيزة المفاوضات!

موقع "Money.com" عمل استطلاع رأي للموضوع على 4447 مشارك، كانت النتيجة إن 78% قالوا إن الراجل المفروض يدفع في المعاد الغرامي، و20% رفضوا الفكرة، 

والـ 2% اللي فاضلين رفضوا الإجابة!

على الرغم من خروجنا من عصر النسوية الكرتونية اللي كانت بتيجي في الأفلام إن الست عايزة تبقى راجل بمعنى إنها تاخد كل أدواره، وإلى حد ما بردو خرجنا من عصر الذكورية المفرطة اللي نقدر نقول عليه عصر "سي السيد" إلا إن مازال فيه ستات ذكوريين أكتر من الرجالة نفسهم، ومازال فيه نسويات متطرفات يعني يا ندفع إحنا كل حاجة يا بلاش!

خلينا نتخيل لو إنت ولد وخارج مع واحد صاحبك، ولو إنتِ بنت وخارجة مع صاحبتك، الأمور مش هتبقى بالتعقيد ده! ممكن في يوم تفكر تعزمه، ممكن تقوله بصراحة يدفع هو، أو تتقبل منه إنه يعزمك من غير ما الموضوع يبقى متعلق بـ "رجولة" أو بشخص له الإيد العُليا على التاني. 

المشكلة في النصايح إن ناس كتير ممكن تنفذها حبًا في إنهم ما يبانوش رجعيين أو ذكوريين، وده في العلاقات ممكن يعمل حاجز كل طرف يخاف يتكلم عنه، يعني البنت ممكن تفقد إعجابها بالشخص اللي بتحبه أو تحسه قليل أو بخيل لأنه قبل يخليها تدفع، والراجل ممكن يحس البنت مسترجلة عليه أو بتقلل منه.

موقع "Scientific American" بيقول "الحل الوحيد إنكوا تتكلم بصراحة في الموضوع، ولو المعاد غرامي لازم على الأقل تعزم إنك تدفع حاجة"، واحنا بننصح إن اتعاملوا مع الموضوع ببساطة، وخليك فاكر إن دلوقتي بقينا في عصر كلنا بنشتغل، كلنا موظفين، كلنا متعلمين، مفيش مبرر يخلي حد مسؤول عن التاني وإلا هتبقى مسؤولية وهمية، ومفيش مبرر بردو يخلي واحدة تربط شعورها بالاحتواء من الشخص اللي بتحبه بإنه بيصرف عليها!

Comments: