مبادرات المؤسسات الخيرية للمساعدة في أزمة "كورونا" 

15/04/2020

للوقاية من الكورونا العالم كله فرض حظر التجول سواء كان جزئي أو كلي وده عشان الناس تقلل اختلاطها ببعض وبالتالي عدد الإصابات يقل والفيروس يقل انتشاره، وعلى قد ما الموضوع بينعكس بشكل إيجابي على العالم كله إلا إنه سبب مشاكل كبيرة بالنسبة لبعض الناس وهما الأشخاص اللي شغلهم معتمد على اليومية ومعتمد على نزولهم للشارع والتعامل مع الناس.

ونظراً للضرر المادي اللي أثر على عائلات كتير خصوصا العائلات اللي دخلها معتمد على اليومية، وصعوبة الوصول لأجهزة تنفس صناعها ونقصها لإنها غالية فيه مبادرات كتير اتعملت من مؤسسات خيرية لمساعدة الناس والمستشفيات يعدوا الفترة دي.. المبادرات دي زي:

1- مبادرة صناع الحياة (الناس لبعضها):

مبادرة صناع الحياة اتطبقت لحد دلوقتي على 2800 أسرة، وعشان مايفرضوش منتجات معينة على الأسر عملوا مبادرة  الناس لبعضها وهي عبارة إن الأسر اللي معمولها بحث قبل كده ومضمون إنها تستحق بيجيلهم رسالة على موبايلاتهم برقم سري، وفيه متطوع بيتابع معاهم بالتليفون وبيعرفهم أقرب منفذ من ضمن 50 ألف منفذ وسوبر ماركت على مستوى الجمهورية، وبيشتروا اللي محتاجينه حسب رصيدهم اللي في الكود أو الرقم السري اللي اتبعت لهم، ده غير مساهمات المؤسسة في في توفير أجهزة تنفس صناعي في الفترة الحالية لمستشفيات العزل.

2- مبادرة بنك الشفاء المصري:

بنك الشفاء المصرى عامل مبادرتين أول مبادرة هي "بيحمونا ادعمهم" وهي لدعم الدكاترة وحماية الطواقم الطبية في مصر، والمبادرة التانية هي "اتنفس إهزم المرض" وهدفها هو تجهيز مستشفيات العزل بأجهزة تنفس صناعي لمواجهة الأزمة الحالية وإنقاذ حياة المصابين.

3- مبادرة بنك الطعام المصري "دعم العمالة اليومية مسؤولية":

مبادرة  "دعم العمالة اليومية مسؤولية" قدرت تخدم 2 مليون مصري واللي هما حوالي 350 أسرة مصرية في 22 يوم عن طريق تجميع مساعدات وزكاة وعملوا كراتين فيها المستلزمات اليومية لأسر العمالة اليومية، عشان يساعدوا الناس تفضل في بيوتها الفترة دي.

4- مبادرة مصر الخير:

مصر الخير عملت مبادرتين أول مبادرة لدعم الأسرة المتضررة من أزمة "كورونا" عن طريق جمع تبرعات من أشخاص أو مبادرات زي تحدي الشركات بتشجع الشركات على التبرع وده بيوصل للأسر على هيئة فلوس ومنتجات غذائية ومطهرات وأدوية طبية ووصلت التبرعات لأكتر من 500 ألف مستحق، ومبادرة تانية لدعم وتزويد مستشفيات العزل الصحي بأجهزة تنفس صناعي وبالفعل تم دعم المستشفيات بـ 10 أجهزة تنفس صناعي.

5- مبادرة جمعية رسالة "تحدي الخير":

في بداية الأزمة انتشر تحدي بين المشاهير من فنانين ولاعبين كرة إنهم كانوا بتحدوا بعض لدعم الأسر المتضررة، وهدف الحملة هو دعم 100 ألف أسرة من العمالة اليومية اللي اتأثرت من الظروف الحالية عن طريق توزيع كراتين فيها الاحتياجات الأساسية، وعملوا حملة كمان لتوزيع مطهرات وأدوات تعقيم على عمال النظافة، ولحد دلوقتي الحملة قدرت تدعم 40 ألف أسرة.

Comments: