ليسته" بأفلام عن الصداقة تسلي بيها نفسك وتعرفك قيمة الصداقة"

16/04/2020

محدش يقدر يعترض على أهمية الأصحاب في الحياة، وبالنسبة للبعض الصحاب بيبقوا أهم وأغلى من علاقات الدم، يمكن لإنهم قادرين يطلعوك من أي ضغط في حياتك وتقدر تتكلم معاه من غير ما تحس بقيود وأحكام وبتكتشف نفسك وبتتطور وتكبر معاهم ولأسباب كتير ويمكن بتختلف من شخص للتاني الصداقة مهمة لصحتنا النفسية والعقلية زيها زي الأكل الصحي والرياضة.

عارفين إنك الفترة دي بعيد عن صحابك وصعب تشوفهم أو تقابلهم باستمرار زي قبل كده، وفي الغالب لو اتجمعتوا ممكن يبقى في بيت حد منكوا عشان مفيش أماكن تقعدوا فيها أصلا، وممكن تتكلموا "فيديو كولز"، لكن فيه اختيار جديد ممكن تعملوه مع بعض وهو إنكوت تتفرجوا على أفلام عن الصحاب سوا وغالبا ده هيأثر فيكوا ويخليكوا تتعلقوا ببعض أكتر الفترة دي خصوصا لإن أصحابك هما اللي هيخلوك تقدر تعدي الفترة دي.

خلينا نقولك "ليسته" عن أفلام الصحاب تتفرجوا عليها سوا وهي:

1- سلام يا صاحبي:

مرزوق وبركات بيتقابلوا صدفة، وبيبقوا صحاب، وبتبان مواقف الصداقة والجدعنة بينهم لحد ما بيبقوا رجال أعمال كبار وبيضحي مرزوق بحبه عشان صاحبه.

2- The Perks of Being a Wallflower:

تشارلي (لوجان ليرمان) مراهق بيواجه صعوبة في التكييف مع مدرسته الجديدة، لحد ما بيقابل اتريك (عزرا ميللر) وسام (إيما واتسون) وصداقتهم ببعض بتغيير كل حاجة.

3- The Intouchables:

 فيليب (فرانسوا كلوزت) رجل أعمال بعد ما بقى قاعد على كرسي متحرك عين شب (عمر سي) عشان يبقى قائم على رعايته، وبيغيروا حياة بعض.

4- The Help:

في الستينات كاتبة (إيما ستون) ومدبرة منزل (فيولا ديفيس) قرروا يتعاونوا سوا ويكتبوا كتاب وبينتهي بيهم الحال إنهم بيتحدوا المجتمع العنصري.

5- The Boy in the Striped Pajamas:

قصة الفيلم بتدور عن أحداث الهولوكوست، وصداقة نشأت بين ابن ساذج لظابط نازي برونو (آسا باترفيلد)، وشموئيل (جاك سكانلون) وهو ولد دايما لابس بيجاما مخططة وقاعد ورا السلك الشائك.

6- أحلى الأوقات:

بيحكي الفيلم عن 3 بنات كانوا مع بعض في المدرسة وعايشين في منطقة شعبية "شبرا" وبعد كده عزلت "حنان ترك" وهي واحدة منهم لحي المعادي وعلاقتهم اتقطعت ببعض، وبيحصل موقف بيخلها تدور عليهم تاني وترجع علاقتهم ببعض برغم اختلاف طريقة حياتهم.

7- The Sisterhood of the Traveling Pants:

الفيلم بيحكي عن قصة 4 بنات صحاب من صغرهم لحد ما بيبقي عندهم 16 سنة وبيقضوا أول صيف سوا، وعشان يحافظوا على صداقتهم طول عمرهم قرروا يبدلوا في بنطلونين هما ال 4.

8-   Thelma and Louise:

قصة الفيلم هي واحدة من أشهر القصص السينمائية عن تمكين الستات، بتدور أحداث الفيلم عن هروب ثيلما (جينا ديفيس) ولويز (سوزان ساراندون) من البطريركية

9- Miss You Already:

قصة الفيلم بتتكلم عن صديقتين وهما  جيس (درو باريمور) وميلي (توني كوليت) صحاب جدا من صغرهم، لكنهم بيكبروا وبيواجهوا الحياة سوا زي الجواز والأولاد وسرطان الثدي.

10- Girl, Interrupted:

بتدور أحداث الفيلم في سنة 1967، وبتحكي عن سوزانا (وينونا رايدر) اللي اتعرضت لتدخل نفسي مشبوه وتم إرسالها ضد إرادتها إلى مستشفى للأمراض النفسية، وفضلت معزولة عاطفيا لحد ما لقت راحة في الصداقة مع مرضى تانين.

11- بنات وسط البلد:

بتدور أحداث الفيلم عن بنتين بيكافحوا ويشتغلوا سوا وبيواجهوا مشاكل كتير مع بعض سوا، وزي ما الأغنية بتقول "يتخانقوا ساعات ويتصالحوا ساعات".

12- Now and Then:

الفيلم من التسعينات وبتدور أحداثه عن صحاب اتقابلوا بعد 25 سنة وبيفتكروا إجازة كانوا قضوها سوا في السبعينات لما كان عندهم 12 سنة.

13- أصحاب ولا بيزنس:

بتدور أحداث الفيلم عن صحاب من أيام الجامعة وبيكبروا سوا في شغلهم وكل واحد منهم بيلاقي إغراءات وبيتنافسوا، وبيحاولوا يحفظوا على صداقتهم في الرحلة، في الطريق.

14- Clueless:

قصة الفيلم في التسعينات في مدرسة بتدور عن 3 صديقات وهما شير (أليسيا سيلفرستون) وديون (ستايسي داش) وتاي (بريتاني ميرفي).

15- إبراهيم الأبيض:

عشري وإبراهيم 2 مجرمين وصحاب جدا وكل حياتهم مع بعض، بس للأسف عشري خان إبراهيم صاحبه وهو مضطر في جملة من أكتر الجمل المشهورة في السينما المصرية "بعت صاحبك بكام يا عشري" لكن النهاية إنهم بيلاقوا نفس مصيرهم سوا كنوع من تكفير عشري عن الذنب.

Comments: