٦ أسباب بتخلي الست تخون أو تصاحب اتنين في نفس الوقت 

16/04/2020

أغلب السوشيال ميديا دلوقتى بتتكلم عن مسلسل "حكايات بنات" خصوصا "جميلة" لإنها كانت مصاحبة 2 ويمكن الأربع بنات أصلا اللي في آخر جزء للمسلسل كل واحدة فيهم مصاحبة 2 وأغنية المسلسل بتقول عكس كده "معظمكو صنف عنيه فارغة وهي واحد مالي عينها".

الحقيقة إن أغلب الناس على السوشيال ميديا بتشتم جميلة أو الأربع بنات أو بيتريقوا عليهم، بس ليه ممكن شخص يصاحب 2 على بعض في نفس الوقت أو إيه دوافعه ورا الفعل ده، موقع psychology today قال الأسباب اللي ممكن تخلي شخص يصاحب 2 في نفس الوقت وبالشكل ده تبقى خاينة.

في الأول الاعتقاد الأساسي عند كل الناس إن الرجالة هما اللي بيخونوا أكتر وإن الستات دايما مخلصين عشان كده بتبقى صدمة لما حد بيعرف إن ست ممكن تبقى خانته، الأبحاث حسب موقع psychologytoday بتقول إن نسبة 10 لـ 20 % من العلاقات ملتزمة بعلاقة تانية غير العلاقة الأساسية اللي هما فيها، عشان كده الموقع عمل بحث وسأل أزواج كتير عن هل بيخونوا شريكهم ولا لا، لكن لإن في العصر الحالي صعب نحدد خيانة لأي درجة زي ممكن حد يبقى "بيستوك" على شخص على السوشيال ميديا أو "بيفليرت" مع شخص على السوشيال ميديا فهل ده ممكن يبقى اسمه خيانة ولا لا!

ولكن الموقع حدد للأزواج دول معيار محدد وهو مفهوم الخيانة وهو إنك تكسر الثقة اللي بينك وبين شخص تاني وغنك تخبي عليه سر كبير ممكن يأثر على علاقتكوا.

وعلى أساسه قالو الأسباب اللي تخلي الست تخون شريكها:

1- لما يحسوا بعدم التقدير والتجاهل والإهمال، وبيدورا على مصدر تاني يحسسهم إنهم كويسين.

2- الستات أغلب الوقت بتدور على شريك يبقى بيحتويها عاطفيا ويتفاعل معاها كمان يسمعها ويتكلم معاها، ولما مابيلاقوش ده بيدوروا عليه في مكان تاني.

3- الأبحاث بتقول إن الستات اللي بتخون شريكها بالرغم من إنها بتبقى بتحبه وممكن تبقى عايزة تكمل معاه بقيت عمرها إلا إنهم بيخونوهم برضه، وغالبا مابيوصفوا شعورهم وقتها بعدم الدعم والإرهاق.

4- بيحسوا بالوحدة، ساعات الستات بتحس بالوحدة نظرا لإن شريكها بيكون مش متاح عاطفيا أو مشغول أغلب الوقت أو بيسافر باستمرار، أو مابيدهاش المشاعر الكافية اللي محتاجاها وبيحاولوا يملوا فراغ الوحدة اللي عندهم.

5- بيتوقعوا أكتر من العلاقة الأساسية، فيه ستات بتبني توقعات غير معقولة عن الحاجات اللي المفروض الشريك الأساسي يقدمها في العلاقة، بيتوقعوا إن شريكهم يفضل جنبهم يلبي احتياجاتهم 24 ساعة 7 أيام 365 يوم في السنة.

6- بيعيدوا تمثيل الصدمة اللي عانوا منها في وقت مبكر من حياتهم خصوصا لو كانوا عانوا من صدمة عميقة.

وزي ما أي حد بيخون بيبقى مش مدرك مدى تأثير خيانته على العلاقة اللي هو فيها أو على الطرف التاني، فخليكي فاكرة إن الخيانة بتسبب الم للرجالة زي ما الستات بتتألم، فالخيانة مضرة ومرهقة نفسياً بغض النظر عن نوع الجنس.
 

Comments: