٥ أخبار ماتهمكش لو عايز تفصل عن أخبار الكورونا!

16/04/2020

1- جوني ديب انضم لـ "إنستجرام" وعمل أكونت رسمي عليه وفي أول ربع ساعة بس بقا عنده أكتر من 175000 فولورز! وده خبر يحسر صاحبتك الفاشونيستا اللي تحت كل صورة بتعمل 50 هاشتاج عشان يجيلها فولورز وبيزيدوا كل أسبوع 7 بس!

2- أعلنت والدة لاعب كرة القدم البرازيلي "نيمار" على حسابها على انستجرام إنها ارتبطت بشاب عنده 22 سنة، وأصغر منها بحوالي 33 سنة بحالهم، ونيمار دخل عملهم كومنت باركلهم فيه على ارتباطهم بس الغريب إن أبو نيمار هو كمان دخل باركلهم، يعني روح معنوية عالية نتمنى تكون موجودة بيننا وبين إكساتنا!

3- حلا شيحة عملت عملية تجميل في شفايفها، وظهر ده في صورها الأخيرة وكمان في برومو مسلسلها الجديد "خيانة عهد" اللي هيكون بطولة يسرا وهيتعرض في رمضان الجاي، وبعض الناس انتقدت ده وشافوها مش محتاجة أصلاً عمليات تجميل، لكن بعيداً عن ده نتمنى تمثيلها السنة دي مايبقاش بنفس البرود اللي كانت فيه في مسلسل "زلزال" اللي كان أول بطولة لها بعد رجوعها للتمثيل مع محمد رمضان السنة اللي فاتت.

4- سيدة من "براجواي" بعد ما الدكتور بلغ جوزها وبنتها  وأكدلهم إنها توفت خلاص، وبدأوا يغطوها ويحطوها في الصندوق اللي بينقل الموتى، وهي في عربية النقل لقوها بتتحرك جوا الصندوق فالكل اتصدم لحد ما فتحوا واكتشفوا إنها لسه صاحيه مماتتش، وبعدين تم نقلها للمستشفى مرة تانية وصحتها بدأت تتحسن!

5- بطريقين ذكور في حديقة حيوان في أستراليا قرروا يكسروا القواعد المجتمعية البطريقية ويبقوا أول بطريقين ذكور مرتبطين، مش بس كده ده العاملين في الحديقة قرروا يدعموهم ويدولهم بيضة عشان البطريقين يرقدوا عليها ويتبنوها وتبقى كأنها أول طفل ليهم، لكن البيضة لسه مافقستش ادعولهم بقا بالذرية الصالحة!

وبكده تكون خلصت نشرة الأخبار اللي ماتهمش أي حد خالص دي، أتمنى تكونوا ماستفادتوش أي حاجة خالص لأن ده المطلوب بصراحة بس تكونوا فصلتوا شوية من أخبار الكورونا!

Comments: