٩ خطوات هتساعدك في التخلص من الإحباط 

16/04/2020

بسبب الحجر الصحي اللي في العالم كله، أغلب الناس بدأت تقعد في البيت منهم اللي بيشتغل من البيت ومنهم اللي قعد من شغله خالص ومنهم اللي دراسته وقفت واللي دراسته اتأجلت، وده سبب إن ناس كتير بعدت عن حياتها اللي كانت مسحولة فيها وناسية مشاكل كتير عندها، بس العزل خلى ناس كتير تحس إن حياتها مالهاش لازمة وده اللي سبب إحباط في الجو العام.

يمكن الإحباط مش مش أسوأ حاجة ممكن تعدي بيها وممكن يبقى تجربة حلوة وتحول حياتك بنسبة كبيرة بس بشرط تعرف تتعامل معاه إزاي عشان يبقى تجربة شكلت لك وعي أكتر ونمو في شخصيتك، موقع positivity blog قال في 9 خطوة إزاي تتعامل مع الإحباط بطريقة صح وهما:

1- اقبل اللي إنت حاسس بيه:

الإحباط شعور مؤلم مفيش داعي إنك تخبيه ، من الأحسن إنك تسيب مشاعرك تطلع على طبيعتها عشان كل ما هتسرع في إنك تقبلها كل ما هيبقى اسهل إنك تعالج الإحساس ده، ولو فضلت ترفض الشعور ده الشعور ده العواطف هتظهر في وقت غير متوقع وممكن تخليك مزاجي أو عدواني أو شخص متشائم.

2- خليك فاكر إنك مش فاشل:

مش شرط عشان ماعرفتش توصل لحاجة كنت عايز توصلها أو خططك انتهت أو إنت ثابت مكانك مابتتحركش لفترة يبقى إنت شخص فاشل خصوصا إن الوضع ده مش هيستمر طول العمر، ومش معنى إنك محبط النهاردة إنك هتفضل محبط بكره كمان، فلو بدأت فعلا تاخد إجراءات ضد الإحباط هتتحسن والإحباط هيروح.

3- اتعلم منه:

بدل ما تضيع في المشاعر السيئة اللي بسبب الإحباط ممكن تركز إيه أكتر حاجة ممكن تتعلم منها وإنت محبط، وممكن تعمل ده عن طريق إنك تسأل نفسك شوية أسئلة زي إيه الحاجة الوحيدة اللي ممكن اتعلمها من الفترة دي؟، إزاي ممكن اغير حياتي عشان اتفادي الإحباط في مستقبلك؟ وأكيد هتلاقي إجابات للأسئلة دي تعلمك تعمل حاجات معينة وتطبل أفعال تانية برضه بتعملها.

4- خليك فاكر إنك ممكن تحس بخيبة أمل لما تخرج من الـ"كومفرت زون":

أي شخص ناجح فهو أكيد جرب مرة على الأقل إنه يحس بالإحباط وده عشان خرج أكيد من الـ"كومفرت زون" بتاعته، وعموما الشعور بالإحباط وفقدان الأمل هو عبارة عن جزء من حياتك ومشاعر لازم تجربها عشان تكبر وتنضج، ولما تفتكر الحقيقة دي هتساعدك تبقى أقوى عشان هتديك أمل.

5- ركز على الحاجات اللي موجودة معاك في حياتك:

ركز على الناس اللي باقية في حياتك ومشاعرك والحاجات اللي واخدها من المسلمات، وده هيساعدك تحط الأمور في مكانها الحقيقي.

6- خلي شخص قريب منك يساعدك:

لما يبقى فيه حد معاك هيساعدك تبص للأمور بصورة أوسع وهيساعدك تتعامل مع إحباطك بصورة أفضل، فلو الشخص اللي بتتكلم معاه فاهمك كويس هيساعدك تتخلص من الضغط الداخلي اللي جواك وهتتقبل كمان اللي حصل لك بدل ما تحاول تبعده عنك، وفي آخر كلامكوا كمان ممكن توصلوا لخطط واقعية تخليك تتخلص من اللي حصلك ده.

7- لو كانت توقعاتك مثالية فحاول تعدلها:

لو كنت متوقع من أشخاص أو حاجات تبقى مثالية فأكيد هيتم إحباطك في أوقات كتير، عشان كده حاول تخلي توقعاتك واقعية على قد ما تقدر، وحاول تفتكرإن مفيش حد حياته كاملة.

8- استريح من أي ضغوطات عليك وقلل مستوى توترك:

مجرد ما بتركز على أهدافك وبتبدأ تشتغل عليها فإنت كده بتضغط نفسي، فبلاش تضغط نفسك على طول من الأحسن إنك تستريح الأول عشان تشحن طاقتك من الأول، بعد كده ارجع اشتغل على أهدافك تاني.

9- حسن من صورتك قدام نفسك:

حاول تبطل تنتقد نفسك وتحسس نفسك بالذنب لإنك محتاج تبقى كويس قدام نفسك وتقدر نفسك، وده هيساعدك تتعامل مع الإحباط بعقل أكتر من غير أي مشاعر أو عواطف مضطرة، ومن الأحسن برضه ماتلومش حد وتعمله شماعة لك إنت بتتعلم من الموقف عشان تتعامل مع بعد كده بطريقة صح أكتر .

Comments: