ترشيحات لـ 5 برامج وقنوات عربية على اليوتيوب تتعلم منهم سينما

19/04/2020

كتب: كابتن بسلة

قعدة البيت في الحظر أو من غيره عمومًا هي فرصة حلوة تبص بصة كدة على أي حاجة بتحبها ونفسك تبدأ تتعلمها، ولو بتحب السينما ونفسك تفهمها أكتر عشان تلاقي أجوبة على حاجات بتشوفها في الأفلام بتعجبك بس مش لاقي لها تفسير أو في يوم نفسك تبقى من صناع السينما في أي جزء فيها إخراج أو تمثيل أو تأليف أو تصوير إلخ فمعانا النهاردة كام ترشيح خفاف لطاف ظراف ينفعوا كمقدمة لعالم السينما وجماله عشان لو حبيت بعد كدة تدور أكتر وتتعمق أكتر في الموضوع ده.

وترشيحات الموضوع ده هتركز على بعض المحتوى العربي الموجود حاليًا ومتاح على اليوتيوب لأن المحتوى العالمي والأجنبي ضخم جدًا ومش صعب تلاقيه، قايمة النهاردة قصيرة ولكنها منوعة بين قنوات على اليوتيوب وبين برامج نزلت فعلاً كاملة أو لسه شغالة وفي بدايتها ولكنها مبشرة، وكفاية كدة مقدمة وما تيجوا نشوف؟!

1- برنامج "سينما وكدة":

برنامج نزل منه موسم واحد فقط على قناة مهرجان سينما دوت بكرة وجمع بين أتنين من أفضل اليوتيبرز العرب في مجال الحديث عن السينما والدراما وهم الناقد السينمائي محمود مهدي صاحب قناة (فيلم جامد) ومعاه الأفلامجي الرايق جدًا محمد أبو سليمان صاحب قناة (سينماتولوجي) والأتنين قدموا في 9 حلقات مكثفة دردشة مفيدة جدًا عن صناعة السينما وعناصر الفيلم السينمائية واستقبلوا فيها اسئلة وأجوبة كتير ردوا عليها، البرنامج قصير وخفيف ودي البلاي ليست بتاعته

2- قناة "الأفلامجية":

قناة على اليوتيوب بتعرض فيديوهات عن صناعة السينما من ورشة الأفلامجية اللي بدأها صناع سينما مصريين زي المخرج عمرو سلامة وخالد دياب ومحمد دياب، القناة منظمة بشكل كويس ومقسمة الكورسات بتاعتها في بلاي ليست مختلفة ودي البلاي ليست الافتتاحية للورشة ولما تخلصها هتلاقي الباقيين على نفس القناة

3- برنامج "قصة ولا مناظر":

برنامج جديد بيقدمه "أحمد عصام السيد"، وهو خريج معهد السينما، قسم إخراج. و من ساعة ما اتخرج و هو دخل في كذا حاجة، إخراج وكتابة وتمثيل وستاند أب كوميدي، كمان كان جزء من جلوكال شوو هنا عندنا.

وفي محاولة إنه يجمع كذا حاجة بيحبها في نفس المشروع، بيعمل برنامج "قصة ولا مناظر" على قناة البدروم على يوتيوب. بيدخل كتابة الكوميديا، وحبه للسينما في حلقات متنوعة منها التعليمي ومنها الحلقات الدردشة من حد بيحب السينما عادي، و منها الحلقات اللي هزار و هلس بس وبتنزل كل يوم خميس، ودي البلاي ليست للبرنامج..

4- قناة "حوس تريكس":

قناة عن السينما والتصوير عمومًا للفلوجر المصري "حسام سرحان" بيقدم فيها فيديوهات دمها خفيف بيشرح فيها بشكل بسيط تفاصيل في صناعة السينما زي الإضاءة والكادرات إلخ، القناة على اليوتيوب باسم Hoss Tricks ولسه في بدايتها ولكنها مُبشرة كمحتوى عربي قوي مستقبلًا في مجال التصوير والسينما، وده أحد فيديوهاتها..

5- برنامج "فيلم عربي":

هو برنامج عربي عُرض على قناة Film Independent العالمية وهي منظمة غير ربحية لدعم السينما المستقلة وصناعها والبرنامج كان بيتكلم عن السينما باستضافة مجموعة من صانعي السينما العرب المحترفين من مصر ولبنان والأمارات والمغرب وفلسطين وهو 24 حلقة مكثفين ومفيدين جدًا ودي البلاي ليست بتاعته..

كدة خلصت القايمة ونتمنى مشاهدة ممتعة ومفيدة.. سلامات.

Comments: