معاناة الشخص اللي دوره "سماح أنور" الشلة.. وإزاي يتخلص من الدور ده 

21/04/2020

"كلموني بعد الساعة 12 وهرد عليكوا بنفسي" جملة سماح أنور الأشهر على الأطلاق وده بسبب إعلان عملته عملته لخط ساخن ممكن أي حد يكلمها عليه بعد الساعة 12 ويتكلم معاها عن مشاكله العاطفية وياخد رأيها في استشارات عاطفية ونفسية.

وبالرغم إن الإعلان ده فات عليه سنين إلا إن الجملة لسه مستخدمة وبيستخدمها أكتر الأشخاص اللي بيسمعوا الناس كويس، فغالبا هتلاقي في كل شلة عضو واخد لابق سماح أنور لإنه أي حد متضايق أو عندم مشاكل عاطفية أو أسرية أو نفسية بروح يتكلم معاه، واحتفالاً بعيد ميلاد الفنانة سماح أنور خلينا نقولك معاناة الأشخاص اللي بياخدوا دور أو لقب سماح أنور شلتهم.

إنك تبقى شخص بيسمع كويس لكل اللي حواليك دي ميزة ومهارة كمان لكن للأسف في دراسة لجامعة هارفارد أطلقوا اسم "المعالجين المؤذيين" على الأشخاص اللي بيعرفوا يحتوا الناس في مواقف صعبة في بيئة العمل واللي غالباً بيكونوا أقدم من المؤسسة نفسها وبيعرفوا يحتوا مشاكل الموظفين اللي فيها، لكن بالرغم من إن الدراسة أو البحث اتكلمت على بيئة العمل بس إلا إنك هتقابل النوع ده في حياتك من الناس اللي بتقدر تسمعك و"تهندلك" إنت ومشاكلك في أماكن مختلفة سواء في صحابك أو في عيلتك.

الأشخاص اللي زي كده في شلتك أو حياتك عموما على قد ما بيكونوا قادرين يحتوا مشاكلك ويمتصوا غضبك ويحوله لطاقة إيجابية إلا إنه في الحقيقة ده بيكون خطر عليه لإنه أكيد هيعاني من الإرهاق بسرعة وهيتعب وده هيأثر على حياته وشغله وممكن كمان الموضوع يبقى فيه جزء من التعب الجسدي فممكن يسبب الصداع النصفي مثلا أو النوبات القلبية.

كلنا مش مثاليين وكلنا عايزين نحط مشاكنا على حد وهو يسمعنا ويشيل عننا سواء كان سماح أنور بجد أو سماح أنور الشلة، لكن من المهم تعرف حدود طاقة الشخص اللي بتحكيله، ولو كنت إنت سماح أنور شلتك خلينا نقولك تعمل إيه عشان ماتخليش الدور ده يأذيك في حياتك:

1-  وقت ما تكون حاسس إن فيك اللي مكفيك فعلا وحد جيه يتكلم معاك قوله إنك مش فاضي تسمع دلوقتي وهو هيفهم إنه مش أولوياتك في الوقت ده فهيبعد شوية.

2- ولو طلب ده منك تاني حاول تقوله بصراحة إنك مش قادر تسمع فعلا وإن سمعاك لمشاكل الناس التانية بيأثر عليك بالسلب.

3- لو كان حد بيتصل بيك على طول أو بيبعتلك عشان يحكي لك ويشتكيلك فممكن تقوله يحكي لحد تاني لإنك مش المفروض تبقى دايما متاح في سماع مشاكل.

4- لو كان رفض طلبات الناس بالنسبة ليك مشكلة كبير ومابتعرفش تعملها، فممكن جدا تتعلم تقول لا في حاجات بسيطة وبأسلوب مؤدب أو تقول معلش كمان شوية أو المرة الجاية وغيرهم من الجمل اللي هتخليك ترفض بالذوق بس ماتستحملش حاجة مش قادر عليها.

5- اعرف الفرق بين إنك تبقى صديق كويس ويبقى اسمك صديق كويس بيعرض نفسه وصحته للخطر، لكن حاول تحقق توازن بي المسميات دي على قد ما تقدر عشان تريح وتسريح.


 

Comments: