"انستجرام" يطلق مبادرة "انستا الخير" الرمضانية للسنة التانية على التوالي 

23/04/2020

روحانيات شهر رمضان دايما بتحمس الناس إنهم يبدأوا يساهموا في أعمال الخير ويشجعوا غيرهم على العطاء والمساهمة في الخير، لكن السنة دي رمضان مختلف عن أي رمضان عشناه طول عمرنا بسبب فيروس كورونا والحجر الصحي اللي تم تطبيقه في العالم كله تقريبا وإجراءات الوقاية من الفيروس، وده طبعا هيأثر على شكل رمضان اللي اتعودنا عليه خصوصا إن صعب الناس تقابل الناس اللي بيحبوهم ويشاركوا بعض أجواء رمضان اللي كانت بتظهر في الخروجات والعزومات.

ونظراً لإن أحسن وسيلة للتواصل دلوقتي هو التواصل الأونلاين، أطلق "انستجرام" مبادرة خاصة برمضان للسنة التانية على التوالي وهي مبادرة "انستا الخير" ودعا العالم كله إنه يشارك الخير وروحانيات شهر رمضان في المبادرة دي عن طريق منصتهم الإلكترونية.

رمضان من أهم المناسبات على انستجرام عشان كده السنة اللي فاتت في 2019 فعل انستجرام مبادرة "انستا الخير" لأول مرة وكانت النتيجة إن تم استخدام كلمة "رمضان" 16 مليون مرة، وبالرغم إن السنة دي في 2020 لسه رمضان مابدأش إلا إن موقع إنستجرام سجل 4 مليون إشارة لكلمة رمضان في الشهر اللي فات بس.

وقالت ندى عنان رئيسة الشؤون الإعلامية في انستجرام الشرق الأوسط وشمال أفريقيا إن بياناتهم في انستجرام بتشير إن شهر رمضان هو أكتر شهر الناس بتحب تستخدم فيه انستجرام عشان تعبر عن مشاعر المحبة والعطاء وعن أفعال الخير اللي عملوها أو بيعملوها عشان يشجعوا غيرهم، وبالتالي لاحظوا زيادة استخدام كلمة "خير" في الفترة اللي بتسبق شهر رمضان بنسبة 40%، ومنها جاتلهم فكرة مبادرة "انستا الخير" عشان كده قرروا يعيدوا مبادرة "انستا الخير" للسنة التانية على التوالي.

السنة دي مبادرة انستجرام "انستا الخير" هتشمل أفعال خير محتاجينها في الوقت الحالي وهتكون متاحة وبسيطة وكل الناس تقدر تعملها زي مثلا إن أي حد يقدر يوجه الشكر للأطقم الطبية على مجهوداتهم أو مثلا مشاركة الصحاب والعيلة لبعض الفطار الافتراضي عن طريق انستجرام.

ده غير إن موقع انستجرام أطلق "فيلتر" رمضاني مخصوص للاحتفال بشهر رمضان، الـ"فيلتر" اسمه "Lantern" أو فانوس وهو عبارة أشكال مستوحاة من أجواء شهر رمضان وفيها بعض كلمات التهنئة بشهر رمضان بلغات مختلفة زي الإنجليزي والإندونيسي والتركي والفارسي، وهتلاقيه بسهولة في لو كتبت كلمة "Lantern" في البحث في الـ"Stories" بتاعتك.

وانضم للمبادرة "انستا الخير" النجم أحمد حلمي اللي هيشارك متابعيه على انستجرام رسائل وطرق مختلفة عن عمل الخير في رمضان في الوضع الحالي، وقال أحمد حلمي عن المبادرة دي إنها خطوة إيجابية فيها معاني وقيم الشهر الفضيل، وخلال الظروف الاستثنائية اللي بيمر بها العالم كله فهي مبادرة بتجمع مستخدمين موقع انستجرام عشان ينشروا قيم الخير والعطاء في الشهر الفضيل، وأضاف كمان إنه سعيد باختياره لإطلاق المبادرة في العالم العربي، وبيتمنى إن عجلة الخير تفضل شغالة من غير توقف في شهر رمضان.

والسنة  دي فعلا العالم كله محتاج إن كلنا نشارك في فعل الخير مهما كان حجم أو شكل الخير اللي هتعمله عشان أكيد هيبقى له تأثر كبير حتى لو عن طريق إنك تحسس اللي حواليك برمضان وتفرحهم فخلينا نقولك إزاي ممكن تستخدم مبادرة "انستا الخير" على انستجرام في الخير:

1- هني متابعينك على انستجرام بشهر رمضان عن طريق فيديو أو صورة ليك عشان تحسسهم بالأجواء الرمضانية واستخدم هاشتاج "انستا الخير"

2- أول يوم في رمضان فيه ناس كتير ممكن تفطر لوحدها بسبب الوضع الحالي والظروف اللي العالم بيمر بيها، أو فيه ناس اتعودت إنه تفطر في تجمعات عائلية كبيرة مش هيقدروا يعملوا ده، فممكن تشاركوا اللي بتحبوهم لحظات فطار أول يوم عن طريق مكالمات فيديو على انستجرام، أو حتى على السحور.

3- لو فيه بقالك كتير مابتكلمهوش، ممكن تحاول تفرحه وتفتكره عن طريق إنك تسيب له تعليق أو رسالة على ستوري هو حاططها أو "كومنت" على صورة له.

4- عشان كمان مش هتقدر تخرج مع صحابك بعد الفطار وتشوفوا بعض ممكن تستخدموا خاصية CO-Watch من خلال انستجرام.

5- لو شوفت أي "بوست" حد محتاج لمساعدة فيه ممكن تسأله إزاي ممكن تساعده وتقدر تقدم له إيه وخليك شخص إيجابي وتفاعل معاه.

6- لو إنت شاطر في مهارة معينة ممكن تساعد متابعينك إنهم يتعلموها عن طريق إنك تصور فيديو ليك وتستخدم خاصية IGTV.

7- ممكن تتبرع لأي جمعية خيرية مفضلة بالنسبة لك، سلط الضوء على أعمال الخير اللي بتحصل وانشرها عندك سواء كنت إنت بتعملها أو بتحصل حواليك من منظمات وأشخاص.

8- شارك مع صحابك صورك اللي من رمضان اللي فات، وافتكر بيها الأيام اللي كنتوا بتنزلوا فيها وبتفطروا سوا أو بتخرجوا مع بعض بعد الفطار، أو صور التجمعات العائلية بتاعت السنين اللي فاتوا على هاشتاج "انستا الخير".

Comments: