ليه نور الشريف فنان مثالي؟

27/04/2020

كتبت: نوران عاطف

لو انت من محبي السينما المصرية ومتابعينها وحاولت تجاوب على سؤال مين أفضل ممثل مصري؟ ممكن يجي في بالك أسماء كتير بناء على الموهبة أو الجماهيرية أو حتى ذوقك الشخصي، لكن لو حاولت تدي لقب المثالية لواحد من الفنانين فيمكن من العيب إن ما يكونش الفنان ده نور الشريف.

على الرغم من استهلاك كلمة مثقف وإساءة استخدامها أحيانًا إلا إن "نور" يستحقها بمعناها الأصلي واللامع، لو شوفت أي حوار تليفزيوني أو صحفي له هتلاقي إنسان شغوف ومُدرك عظيم لمعنى الفن ودوره وقيمته، مش هتلاقي كلام "كليشيه" ولا حكايات نميمة واعترافات ليلية، هتلاقي حد بيحاول يفهمك بالمعلقة إزاي تشوف فيلم وإزاي تقيّمه وتنقده حتى عشان تنقده هو شخصيًا.

هوسه بالتفاصيل الفنية وشغفه إن الناس تفهمها يخليه مثلًا في حوار يتكلم عن مشيته في فيلم "كتيبة الاعدام" واللي كان صورها وقرر يعملها قبل "داتسن هوفمان" في فيلم "Rain man" وكان أكبر لحظة تقدير له وقتها لما سايس في موقف عربيات سلم عليه وقاله قد إيه الفيلم عظيم "بالذات المشية يا أستاذ.. قطعت قلبي" فنزل من العربية سلم عليه وحضنه وحس إن القدر بعتهوله بعد ما كان محبط بسبب الهجوم الكبير على الفيلم.

في أول عرض لفيلم "ليلة البيبي دول" واللي هو واحد من أبطاله، لما اتسأل عن رأيه في الفيلم قال أنا أول مرة أشوفه على بعضه بعد ما خلص النهاردة وملحوظتي بس إني شايف إنه فيه تطويل شوية! ما قالش رد معتاد ترويجي من اللي أي فنان ممكن يقوله في احتفال زي ده، لكن مستمر على نفس موقفه إنه يلفت نظر المشاهد إزاي يتفرج ويقيّم ومش بيتكلم غير اللغة دي.

لما اتسأل "نور" عن أحمد زكي قال ببساطة إنه الأكثر موهبة بينهم لأنه الأكثر طبيعية، وكان تعليق "زكي" على كلامه إنه قادر يقول كده لأنه واثق في نفسه وعنده أكتر يقدمه، وده بالفعل اللي قاله "الشريف" في سياق آخر وفي حوار تاني بعد سنين لما اتسأل هل هو بيغير من حد؟ قال إن عنده اللي خليه ما يحسش بالغيرة أبدًا، وهو إنه عارف إن كل واحد "له حتته".


ووضح ده أكتر لما اتسأل هل اتضايق لما اسم عادل إمام اتكتب قبله في "عمارة يعقوبيان" وقال إن القاعدة معروفة في عالم الاحتراف الأعلى أجرًا اسمه يتكتب الأول وفي السبعينات كان اسمه بيتكتب قبل "عادل" فـ عادي إنه يقبل ده دلوقتي،  عادل إمام الأكبر أجرًا لأنه كوميديان لكن هو مثلًا الأكثر تمكن بين ابناء جيله في آداء عمل باللغة العربية زي "عمر بن العزيز" وهكذا من حاجات كل واحد أحسن فيها من غيره.

نور الشريف مُحب للتجربة بمعنى متنوع للوصف، رصيده هتلاقي فيه الكوميدي والتراجيدي، البسيط والتقيل، المتقن والرديء، هتلاقي فيه بطولات فردية ومُطلقة وفيه بطولات جماعية مع ألمع نجوم وقته، ودي حاجة بيتجنبها أو بيخاف منها فنانين كتير بعد ما بيتحولوا لنجوم.

بيحكي "نور" عن حبه للنوع ده من التجارب إن في السبعينات كانت المنافسة الفنية بينه وبين محمود ياسين في أوجها، وكان "محمود" وقتها هيعمل فيلم "سونيا والمجنون"، وطلب "نور" إنه يعمل فيه دور المحقق رغم صغر مساحته بالنسبة لدور البطل  وبالنسبة لنجوميته وقتها، لكن هدفه يعمل مبارزة فنية وبيقول "المشاهد اللي بيني وبين محمود ياسين تتدرس لحد دلوقتي".

من ناحية تانية ومن أشكال حب "نور" للتجربة هو إقدامه على تشجيع مخرجين جدد في أول أفلامهم أصبحوا من أبرز وأكبر أسماء في السينما المصرية، زي سمير سيف في "دائرة الانتقام" ومحمد خان في "ضربة شمس" واللي مش بس كانوا من بطولته لكن كمان إنتاجه، ده بجانب عدد من الأفلام مع مخرجين زي عاطف الطيب ويوسف شاهين، واللي مش بس جزء كبير منها كان مش مضمون نجاحه جماهيريًا وتجاريًا لكن كمان فيه منه كان ممكن يبقى سبب هجوم كبير عليه أو أزمة في مسيرته الفنية زي "ناجي العلي" و"كتيبة الإعدام".

في نفس السياق وعلى مدار حياته الفنية هتلاقي تجارب كتير خفيفة وكوميدية واجتماعية، من أيام "الحفيد" و"والكل لازم يحب" و"البعض يذهب للمأذون مرتين" لحد "لن أعيش في جلباب أبي" اللي يعتبر من أيقونات الدراما، و"عائلة الحاج المتولي"، و"عيش أيامك" وده إن دل على شيء فهو يدل على إنه كان شخص حقيقي جدًا مش "مدعي ثقافة أو عمق" وقضيته الفن للفن بكل أشكاله وأهدافه.

مش من "العيب" إننا ما نختارش نور الشريف كأفضل فنان أو كفنان مثالي نوع من المحاباة له، أو لأنه صاحب موهبة استثنائية، أو عنده رصيد فني كله مميز وعظيم، بالعكس يمكن فيه مواهب أكبر ويمكن فيه ناس عملت نفس عدد أعماله ومجهوده بس بطريقتهم، لكن "نور" بمشواره صعودًا وهبوطًا استثناء لأنه مُدرك جدًا لموهبته وحجمها والفرق بينها وبين غيرها، ومُدرك لرسالته ودوره وليه بيعمل ده وليه ده نجح وده لا، ودي عملة نادرة في قاعدة عامة من الفنانين حتى لو كانت مواهبهم فذة.


 

Comments: