ميدو زُهير . . . تسكر تبكي . . . زحمة . . . أزرق

27/04/2020

تخيل إن ملامح إنسان عايشة جواك من غير ما تعرف ملامحه وممكن حتى ما تكونش تعرفه كتير مننا عايشة جواه كلمات أغاني وأشعار يمكن ما عرفناش مين صاحبها إلا بعد فراقه لينا "ميدو زهير" شاعر غنائي مصري جداً ملامحه وروحه وكلماته اللي سايبة أثر جوه كتير مننا كشباب من غير ما نعرف صاحب أشهر كلمات لأغاني الاندرجرواند اللي محفورة جوانا، "ميدو زهير" كان بيكتب عشان نوعى مرة وعشان نحب مرة تانية وعشان نعيش.

صوت "ميدو زُهير" قصيدة "صاحبي يا عشرة سنين"/

كان مُقل الظهور، حتى إنه تقريباً يكاد يكون ما ظهرش في برنامج تلفزيوني أو طلع عمل فيديوهات  ولا له قناة على Youtube اليوتيوب لأشعاره أو كلمات أغانيه اللي حققت نجاح كبير لفئة موسيقى الأندرجرواند في مصر قبل في 2009 و 2010 وبعد ثورة يناير كمان.

"أملك فيها أنا فيها صغير شكلي اتغير ما عرفتوش كان في جيوبي مكعب سكر داب السكر ملاقتهوش" . . . الكلمات دي جزء بسيط جداً من كلمات "ميدو زهير" اللي فارق حياتنا وعو عمره 47 سنة يوم الأحد 26أبريل2020 بسبب هبوط في الدورة الدموية، أكتر من 10 سنين بيقدملنا "ميدو"  في أغاني وعمره ما سعى لظهور أو تألق أكتر ما كان سعيه إننا نستمتع بكلماته اللي هتبقى ورثه لكل من سمع كلام أغانيه بعد موته.

 "ميدو زُهير" أشعاره ليها صدى قوي عند جمهور وقتها وحتى لفترة أقل من سنتين لباندات زي "وسط البلد" و "بلاك تيما" أو حتى لمريم صالح اللي كان ليها النصيب الأكبر في تعاونها مع "ميدو" أو دينا الوديدي .

قصيدة أسطورة الفراعنة بصوت ميدو زاهر في حفلة لباند لبلاك تيما/

"ميدو زهير" يمكن الإسم مش مشهور لأنه صاحب الإسم عمره ما سعى للشهرة ده، وكان بعيد كل البعد عن فكرة الظهور كلماته كانت بتشبه أثره بالضبط، وبتظهر قد إيه كان شخص خفيف الظل وصادق ويمكن كان حالم بالأمل والأمان وببكره اللي مش هيبقى موجود فيه معانا، ونستعرض معاكم أشهر الأغاني اللي كان "ميدو زهير" كتبها أو كانت جزء من أشعاره واشتهرت و وصلتلنا بشكل أو بآخر/

1. أغنية "تسكر تبكي" لمريم صالح /

2. أغنية عانقيني لباند وسط البلد /

3. أغنية "زحمة" لباند بلا تيما /

4. أغنية مريم صالح طول الطريق /

5. أغنية تدور وترجع لدبنا الوديدي /

6. أغنية "مكعب سكر" لباند بلاك تيما /

7. أغنية "أنا مش بغني" لمريم صالح /

8. قصيدة "أزرق" من ديوان "حقنة هوا" لـ"ميدو زُهير" واللي مريت علينا كلنا من خلال ظهور خاص للممثل أحمد حلمي مع الممثل حسن الرداد في مشهد من مسلسل الجماعة/

9. وده أغنية الراوي من أشهر كلمات الشاعر الغنائي "ميدو زُهير" واللي غناها مطربنا الجميل محمد محي/

10. قصيدة أزرق حبينا تكون موجودة رغم إنه صورة الفيديو مش واضحة أوي، لكن كان لازم نشوف "ميدو زُهير" وهو بيقول ((أزرق))/

"ميدو زُهير" كشاعر غنائي كانت له مشاركة في ديوان إسمه "الصحبجية" وكان بيجمع ما بين أشهر شعراء العامية الشباب في مصر، ولكن له ديوانه الخاص بعنوان "حقنة هوا" اللي صدر قبل أكتر من خمس سنوات واللي هنختم كلامنا عنه بجزء من  كلماته/

العقل لو وزن الكلام…آخد الدوا

والمعني لو شرب الحكم..يبقي استوي

 والكلمة من غير الهدف..مشروع صداع

 والشعر من غير فلسفة…..حقنة هوا

"ميدو زُهير"

Comments: