هل النيكوتين يقلل خطر الإصابة بفيروس كورونا؟

28/04/2020

بيعمل حاليًا عدد من العلماء الفرنسيين على اختبار فرضية إن النيكوتين ممكن يساعد الجسم على محاربة فيروس كورونا، وده استكمالًا لدراسة فرنسية اتنشرت الشهر ده بتقول إن الأشخاص المدخنين احتمال إصابتهم بفيروس كورونا أقل 80% من غير المدخنين من نفس العمر والجنس، وده بناء على بيانات الصحة العامة.

افترض العلماء في دراستهم إن مادة النيكوتين اللي بتدخل في صنع السجاير ممكن تأثر على قدرة جزيئات الفيروس على الالتصاق بالمستقبلات في الجسم.

الخطوة الجاية لاستكمال الدراسة هتكون على مجموعة من العاملين في قطاع الصحة، وهتبقى بوضع لاصقات نيكوتين على جزء منهم، والجزء التاني هيحط لاصقات وهمية، وهيشوفوا فرق تعامل جسم كل واحد فيهم في التعامل مع الفيروس في حالة إصابته بيه.

التجربة هتتعمل على حوالي 1500 واحد من القطاع الطبي، وهيتم كمان دراسة 400 حالة من المصابين بالفعل بكورونا عشان يشوفوا هل النيكوتين كان له تأثير على تطور الفيروس في جسمهم ولالا.

التجربة هتبدأ في خلال 3 أسابيع لكن الباحثين أعلنوا إنهم هيتوخوا الحذر عشان بحثهم ما يشجعش الناس على التدخين لما له من آثار ضارة على الصحة وحاجة زي دي ممكن تبقى كارثية!




 

Comments: