للخيانة أسباب.. هل هي عادة ولا صفة مكتسبة؟

28/04/2020

إحساس إن الشخص يبقى عارف إنه مش مكفي شريكه وإنه مهما عمل برضه للطرف التاني، الطرف التاني هيستغنى عنه ببديل شعور سئ جدا، لكن الطرف التاني اللي بيخون أو بيستغنى فيه منه كذا نوع، فيه اللي مابيقدرش يستغنى عن الأصلي بس لازم يكون في تنوع أو بيفضل يتنقل من شخص للتاني لمجرد إنه مش عارف هو عايز إيه أصلاَ، بس اللي محتاجين نعرفه مع تعدد المبررات وأنواع الخاينين، هل الشخص الخاين ده طبع فيه ولا صفة اكتسابها من تجربة صعبة أو مشاكل وخبرات عائلية أثرت عليه؟

مفهوم الخيانة في الأساس بيختلف من شخص للتاني حسب البيئة والعادات والاعتقادات اللي الإنسان كبر لقى نفسه محاط بيها، يعني في ناس بمجرد إنها تعرف إن شريكها بيكلم حد غيرها دي بيعتبرها خيانة أو في الزمن الحديث الـ like و love على السوشيال ميديا فيه أشخاص بتعتبرها خيانة، فممكن يعمله خناقات للصبح عليها، وفيه ناس تانية مفهوم الخيانة عندها هي تغيير المشاعر أو لما تبقى الخيانة عبارة عن خيانة جنسية.

علماء النفس وخبراء العلاقات قعدوا سنين عشان يقدروا يفهموا أسباب الشخص اللي بيخون، ودراسة من الدراسات الي جمعها موقع Business Insider اللي اتعملت على 2800 شخص أعمارهم بين الـ18 لـ 32 أكدوا إن الشريك لو مسؤول مسؤولية كاملة عن التزماتك المادية هنا بتبدأ أول مراحل البعد والخيانة زي مثلاً لما الست هي اللي بتبقى متكفلة بكل المصاريف فالراجل بيبدئ يحس بإنه مستبعد وبعده كده بيبدأ يخونها.

فيه أسباب تانية للخيانة وهي زي فكرة المثل الأعلى أو إنك تلقائياَ تقلد الشخص ده لأنه بيعمل كده جايز يكون ده مش طبع فيك بس ساعتها اللي بيسطر عليك هو حبك للشخص اللي بتقلده فبيتغلب على شعورك لظلم الطرف التاني اللي معاك.

أو سبب تاني وهو زي إن الطرف التاني يبقى اتخان قبل كده وماقدرش ياخد رد فعل حتى لو لمجرد إنك عاتب او واجه الشخص ده فقررت إنه هينتقم في كل الناس اللي هيقابلهم عشان يشبع الحقد والكراهية اللي فضلت متحوشين جواه. 

وقالت الدراسة في الآخر تعريف للخيانة وإن الخيانة ما هي إلا عبارة عن نقص في خانة معينة لكن مش حل لأي أزمة وبتتحط تحت شمسية النزوة، والشخص الخاين مش دايماَ يكون ده طبع في يعني صفة اكتسبها وممكن تتغير فدور الطرف التاني إنه يعرف يميز ويحدد الفرق ما بينهم عشان يساعد نفسه ويكمل أو ينفد بجلده ويهرب.

Comments: