٩ حاجات بتخلي الأشخاص الهادية يبقوا ناجحين

04/05/2020

كلنا بنقول جملة "أصله بارد وهيعرف ياخد حقه" وبالرغم من إننا عارفين إن الأشخاص الباردين أو الهاديين بيعرفوا ياخدوا حقهم أو ينجحوا في حياتهم أحسن سواء كانت الشخصية أو العملية إلا إن البرود صفة نادرة جدا، وأغلب الناس خصوصا في العصر الحالي بسبب الضغوطات المتنوعة بتاعني من العصبية وقليل لما بيبقوا أشخاص هادية في أي موقف ليهم.

ويمكن الهدوء كمان غير إنه بيخليك قادر تتعامل مع الموقف بثبات وعقل فهو برضه بيحافظ   لك على صحتك النفسية وأعصابك عموما، وكل ما تيجي تتنرفز افتكر موقف الشناوي في حلقة "رامز مجنون رسمي" وهو بيتعامل مع كل المرمطة بهدوء غير أي ضيف تاني.

خلينا نقولك شوية حاجات الأشخاص "محمد الشناوي" في نفسهم بيعملوها عشان كده بيبقوا ناجحين في حياتهم حسب موقع "psychology today":

1- بيتصرفوا مع الأمور أول ما بتحصل زي ما هي:

الأشخاص الهادية مابيقعدوش يفكروا كتير في المشكلة قبل ما تحصل، وبمجرد ما المشكلة بتحصل بيتعاملوا معاها ومابيأجلوهاش، لكن الأشخاص اللي بيتوتروا أو بيتعصبوا بسرعة بيحسبوا كتير للمشكلة قبل ما تحصل وبيقلقوا منها.

2- بيعاملوا نفسهم بلطف:

الأشخاص الهادية مابيجلدوش نفسهم بسبب غلطاتهم أو إنهم ضعفا في موقف ما.

3- مابتضايقوش من الحظ السئ:

بالرغم إن فكرة الحظ عموما بتضايق أي شخص خصوصا لو كان حظ سئ إلا إن الأشخاص الهادية مابيتضايقوش من الحظ السئ وده عشان هما عارفين إن في وقت ما الحياة هتساعدهم يعلوا تاني، ده غير إنهم مؤمنين بقدرتهم على التعامل مع الاحظ السئ والأحداث العرضية اللي بتحصل فاجأة.

4- بيوقفوا عشان يستمتعوا بنجاحهم:

الأشخاص الهادية مش مستعجلين على حاجة ولا بيحطوا نفسهم في مقارنة مع أشخاص تانية وخايفين حد يسبقهم، عشان كده بيوقفوا حياتهم أوقات عشان يسمتعوا بطعم نجاحهم في الحياة.

5- مدركين إن الناس بيتصرفوا بطريقة غريبة في أوقات كتير:

الأشخاص الهادية مابيتعبوش نفسهم في التفكير ليه ممكن حد يبقى اتصرف معاهم بطريقة غريبة، طول ما هما عارفين إنهم ماعملوش حاجة، فلو حد اتصرف بطريقة غريبة تجاهم مابيفكروش إن ده بسبب حاجة غلط هما عملوها.

6- توقعاتهم في نفسهم على قدهم:

الأشخاص الهادية مابيحطوش معايير لنفسهم غير قابلة للتحقيق وبيبقوا متوقعين إنهم حتى لو عملوا أقصى جهدهم في حاجة ممكن مايوصلوش للي عايزينه بالظبط.

7- بيعرفوا يمسكوا العصاية من النص:

الأشخاص الهادية بيعرفوا يمسكوا العصاية من النص مش لازم يخسروا كل حاجة وفي نفس الوقت مش لازم يكسبوا كل حاجة، فمثلا لو ماعندهمش وقت كفاية عشان يعملوا حاجة هيبدوأ في جزء منها كل يوم بس مش هيتجنبوها خالص.

8- بيبقوا نشطا حتى لو مش كويسين نفسيا:

بيعرفوا يبقوا نشطا حتى لو حاسين بالاحباط، عشان بيبقوا عارفين إنهم لازم يدوا نفسهم مساحة عشان يخرجوا من الحزن وخيبة الأمل اللي حاسينه ومابيتجهوش لعزل نفسهم.

9- بياخدوا وقت عشان يستريحوا ويتبسطوا:

الأشخاص الهادية بيعرفوا يستفادوا بالوقت اللي بيبقوا بعاد فيه عن الشغل إنهم يستريحوا أو يتبسطوا في حجة بيحبوا يعملوها.

Comments: