أفضل 5 تترات في مسلسلات رمضان 2020

06/05/2020

كتب: كابتن بسلة

الموسم الرمضاني دايمًا بجانب المنافسة بين المسلسلات وبعضها على تحقيق أفضل نسبة مشاهدة بيبقى في منافسة تانية بتبدأ دايمًا قبل المسلسل نفسه، وهو التتر اللي هيعلم مع الناس وهينجح في جذب انتباهم بمزيكته إذا كان أغنية حلوة أو موسيقى تصويرية مميزة جدًا أول ما تسمعها تعرف إن مسلسلك المفضل وصل.

وبقى في تنافس بين شركات الإنتاج في إن التتر دلوقتي يطلع مميز جدًا من أول تصميمه وشكله لحد مزيكته إذا بقى هيكون بغنا مطرب ومغني مشهور وتقيل ولا هيبقى موسيقى تصويرية لموسيقار برضه الناس بتحبه وشغله علم معاهم.

ورمضان السنة دي تقريبًا اتحسمت المنافسة على أكتر مسلسلات مشاهدة وكمان التترات بنسبة كبيرة من أول 15 يوم فالمركز الأول فبالنسبة لتترات الغنائية مسلسل بـ 100 وش بجانب قدرته على جذب حب الناس له بالكوميديا الجميلة المعمولة فيه قدر كمان يجذب الناس بالتتر المبهج بتاعه اللي اختار إنها تكون من النوع الشعبي وخاصة المهرجانات وعرف يكسب الناس بجرعة بهجة وزقططة معتبرة بأغنية "مليونير"  اللي من بيغنيها "المدفعجية" وكلمات "شيندي – كنكا" وتلحين "ديزل" وتوزيع "المدفعجية" برضه.

وبالنسبة للتترات الغير غنائية واللي بموسيقى تصويرية فقط تتر مسلسل "الاختيار" يعتبر الأفضل في رمضان السنة دي واللي من تأليف الموسيقار "تامر كروان"، تامر كروان عامل موسيقى تصويرية بديعة في المسلسل عمومًا بطابع ملحمي يليق بقصة بطولة عظيمة زي قصة الشهيد "أحمد المنسي" وزملائه، وبداية من التتر بيقدر يدخلك في موود المسلسل وأحداثه بشكل هادي ووقور وبيحطك على وضع الاستعداد لجرعة إدرينالين قوية في كل حلقة، واللي ممكن ما تعرفهوش بقى إن "تامر كروان" هو برضه اللي عامل الموسيقى التصويرية لمسلسل "بـ 100 وش"، فالراجل السنة دي يعني عرف يبسط ودان ومشاعر المشاهدين من كل الجوانب، إذا كان ملحمي وبطولي أو كوميدي ولايت ومبهج، عظمة على عظمة يا فنان.

ويجي بعدهم تتر مسلسل "لعبة النسيان" لدينا الشربيني بالمركز التالت، وهو تتر موسيقى تصويرية فقط برضه مش غنائي ومعمول بشكل مناسب جدًا لحالة المسلسل في الغموض والتشويق والتتر والموسيقى التصويرية للمسلسل من تأليف "أسامة الهندي" وخرجت من استديو "ناي" لعمرو دياب فتاتش الهضبة هتلاقيه واضح جدًا فيها وأنت بتسمعها.

وفي المركز الرابع نروح للخيال العلمي وتتر مسلسل "النهاية" من تأليف "هشام خرما" اللي برضه مألف الموسيقى التصويرية للمسلسل وهو مع شهرة المسلسل السنة دي بقى من المزيكا الرسمية في أغلب البيوت السنة دي، و"هشام خرما" عامل مزيكا لطيفة جدًا فيه بميكس بين فوكال لصوت بشري وهو صوت أنثوي وبين العود والستايل الغربي، فطالع مناسب جدًا لأجواء المسلسل وقصته.

والمركز الخامس مع الزعيم عادل إمام يجي الموسيقار "خالد حماد" اللي يعتبر بجانب موسيقته الجميلة في أعمال كتير ولكنه بقى محترف موسيقى الأعمال الكوميدية المصرية بيعمل مزيكا حلوة جدًا لتتر مسلسل "فلانتينو" السنة دي بياخد فيها استايله في المزيكا الكوميدي لحتة أعلى شوية عن اللي فات بالحفاظ على كام جملة موسيقية في شغله بتميزه دايمًا تخليك أول ما تسمعها تعرف إن ده "خالد حماد"

اللي فات كان أفضل 5 تترات ويجي بعدهم محاولات كويسة ولكنها تقليدية شوية فممكن ما تعلمش أوي بعد نهاية الموسم ولكن تظل محاولات كويسة.

فمثلا اختيار "أنغام" لغناء تتر مسلسل "جمع سالم" من بطولة زينة كان موفق، المسلسل اللي تقريبًا مر مرور الكرام في الموسم ومحدش حس به ولكن الأغنية بتلعب على النوستالجيا ومن كلمات أمير طعيمة فممكن تتسمع لوحدها من غيره.

وفي تتر مسلسل "ونحب تاني ليه"  لياسمين عبد العزيز من غناء مدحت صالح

وتتر مسلسل "فرصة تانية" لياسمين صبري من غناء رامي صبري، هل يا ترى القافية دي مقصودة؟! 

وتتر مسلسل "خيانة عهد" ليسرا من غناء مصطفى خاطر

Comments: