سُنة الحياة.. إزاي تعمل أغنية إعلان في رمضان يحبها الناس

07/05/2020

في الموسم الرمضاني كل سنة إنتظار إعلانات كل براند بقى زي إنتظار المسلسلات، وأنهي شركة هتعرف تكسب حب الناس وتعلقهم بإعلانها أكتر، وشركات الموبايل كل سنة بتتنافس على مين أغنيته في الإعلان هتقفل السباق بدري وتركب الصدارة لأخر الشهر، ومن أول 10 أيام في رمضان أورانج عملت كدة بأغنية "سنة الحياة" اللي تعاونت فيها مع الفنان حسين الجسمي بصوته المحبوب لكل المصريين وكلمات الشاعر أيمن بهجت قمر وألحان محمود العسيلي.

"لو طالت المسافات 

وبعدتنا الأيام

ما بينا ألف حاجة تبين الاهتمام"

"سنة الحياة" أغنية لعبت  بذكاء على الوضع الحالي اللي فرضته جائحة كورونا العالمية واللي بعدت ناس كتير عن بعض وفرضت على ناس كتير الغربة عن أهل أو أصدقاء، وكوطن عربي وإسلامي عامة وبلد زي مصر لما يدخل شهر "رمضان" اللي دايمًا بيبقى فرصة للقاء بين الأحباب لو ما شافوش بعض طول السنة أو لسنين ويبقى صعب علينا لأول مرة نعمل كدة حماية ليهم ولينا كانت طبعًا لحظة صعبة جدًا على الجميع وهنا "سنة الحياة" جات تهون على ناس كتير وبتقول بتفاؤل للجميع إننا أكيد هنرجع تاني مهما طال الوقت.

"مين قال إن التلاقي

لُقا وسلام بالإيد

فيه قلوب بتحس بينا

لو حتى من بعيد"

الأغنية عملت ريكورد على جميع المنصات في التفاعل معاها، أي إعلان البراند ممكن يفرح به لو أرقامه عالية، بس الأرقام ممكن تكون خداعة وتيجي بدون تفاعل كبير يذكر من الناس ولكن المرة دي الحالة مختلفة، "سنة الحياة" قدرت تحقق المعادلة المفضلة لأي براند وهي أرقام وتفاعل كبير من الجمهور وحب وإشادة بيها وترند مكمل لحد دلوقتي.

"دايماً جوانا كلام

قصص محتاجه تتقال

وناس غاليين علينا

مابيروحوش م البال"

على يوتيوب أورانج كانت أول شبكة إعلانها يوصل لـ 30 مليون مشاهدة في أول 10 أيام من رمضان و 149 ألف لايك ودلوقتي بتقترب من كسر حاجز الـ 40 مليون مشاهدة في نص الشهر

"ده مافيش للدنيا معنى

لو ما انتش لاقي ليك

حد اما تغيب عليه

يفضل يسأل عليك"

وبقت ترند رقم 1 على أبلكيشين "أنغامي" واتلعبت في أول 10 أيام أكتر من 600 ألف مرة.

"ودي سُنة الحياة

نبعد نتوه ونمشي

في مليون اتجاه" 

 وعلى فيسبوك كسرت كل الأرقام، في أول عشر أيام من رمضان وصلت لـ 140 ألف شير ضعف أرقام تاني منافس ليها ودلوقتي قربت من كسر حاجر الـ 150 ألف شير وتجاوزت الـ 30 مليون مشاهدة و500 ألف ريأكشن وأكتر من 70 ألف كومنت وهو تفاعل ضخم جدًا من الجمهور على إعلان خاصة على منصة زي فيسبوك!

"ودي سُنة الحياه

الغالى بيفضل غالى

وانت بقلبك معاه"

وبجانب الأرقام اتحولت الأغنية لترند واتعمل عليها فيديوهات كتير كوميكس ربطت الأغنية وكلماتها بحاجات كتير واحشنا زي الكورة أو قعدة القهوة أو لمة الصحاب أو تكريم لاعب ما أو ذكرى حد بنحبه وخرجت من كونها إعلان إلى أغنية لمست كل جوانب حياتنا اليومية دلوقتي وساعد ده لما أورانج عملت موقع صغير يقدر الناس من خلاله يعملوا الفيديوهات اللي يحبوها على الأغنية بسهولة ويشاركوها مع أصدقائهم وكل ده كان تحت شعار حملتها #وحشتنا_اللمة.

"نتمنى لحظه

تجمعنا بحبايبنا

لا بعاد ولا غربة

ولا شوق في قلوبنا

ده لُقائنا بميعاد"

Comments: