مواليد التسعينات.. 30 حاجة المفروض تعملها قبل ماتكمل الـ30

11/05/2020

تعتبر سنة 2020 هي عتبة مواليد التسعينات لبلوغ التلاتين سنة، وعلى رغم من وقع الجملة والرقم الغريب لكنها للأسف الحقيقة! واللي بنشوف دلائلها كل يوم في مسؤوليات جديدة، خبرات إنسانية مختلفة عن حياة الطفولة والمراهقة زي إنك تسمع خبر مرض أو وفاة صديق، تلاقي نفسك أب أو أم مسؤول عن ناس تانيين غيرك، يجيلك ذعر لو كنت ما عملتش إنجاز كبير من اللي كان نفسك فيه أو ماكونتش أسرة.

لكن خلينا نقول التلاتين مش آخر الدنيا، لكن هي مرحلة مفترض إنها تكون أكثر استقرار ورزانة من اللي قبلها، ولإضفاء بعض البهجة هنقول شوية حاجات مناسبين للعقد الرابع من الحياة، زي ما ذكرهم موقع "Thrive global" ومجلة "EllE".

1- جرب تسافر في رحلة لوحدك، حتى لو كنت مرتبط أو عندك أصحاب متاحين.

2- اتعلم حاجة جديدة، سواء حاجة يدوية، أو حاجة فيها حركة زي الرقص بأنواعه.

3- اتعلم تطبخ لنفسك التلات وجبات الأساسية بشكل متقن.

4- ابدأ حوش من مرتبك.

5- جرب تعيش في مكان تاني غير بيتك ومدينتك أو بلدك كلها على الأقل مرة.

6- خاطر وجرب حاجة كنت دايمًا بتخاف منها زي الغطس أو الطيران أو حتى ركوب الملاهي.

7- حاول تتخلص من عاداتك السيئة أو حتى اختار حاجة معينة اشتغل عليها.

8- التزم بنظام أكل وحاول تقلل من الحاجات اللي مالهاش لازم اللي بتزود الوزن.

9-اتعلم لغة جديدة.

10- اشتري لنفسك حاجة غالية كان دايمًا نفسك فيها، أو حتى خروجة في مطعم فاخر.

11- اخرج في Date مع حد مختلف عنك، أو نوع من الناس كنت دايمًا بتتجنبه وعارف إنه مش مناسب ليك، ده هيخليك يا تتأكد من فكرتك عن الشخص المناسب، يا تكتشف حاجات ماكنتش تعرفها.

12- اتخلص تمامًا من أي ضغائن جواك أو مشاعر سلبية ناحية حاجات حصلت في الماضي، انت بقيت ناضج كفاية إنك تتفهم إن كل حاجة كان لها ظروفها وخلاص كله خلص وانتهى وما يستحقش إنك تفتكره كل شوية وتحس بالإحباط والزعل.

13- اتعلم تقول آسف، الاعتذار الحقيقي وإدراك الغلط والاعتراف بيه حاجة مش سهلة ومش أي حد بيعرف يعملها لكن مجرد ما هتحصل هتشوف قد إيه الأمور بتاخد شكل مختلف.

14- اعمل قايمة كتب حابب تقراها وابدأ فيها واحدة واحدة، القراية بتوسع الخيال، وبتزود مهاراتك في التواصل، وبتخلي ذهنك دايمًا حاضر، لكن لو هي حاجة انت مش بتحبها تمامًا ممكن تعمل بدلها تجربة معرفية جديدة، زي قايمة أفلام وثائقية، أو محتوى مصور بيتكلم عن أي حاجة عملية، تاريخية، فلسفية...إلخ.

15- ارجع اتفرج على كل الحاجات اللي ماكنتش بترضى تشوفها عشان "mainstream" وكل الناس بتحبها.

16-  اعمل التاتو اللي كان نفسك فيه.. بس دور ورا الموضوع كويس قبل ما تقرر!

17- احضر في الستاد مباراة مهمة للعبتك المفضلة.

18- صفي دايرة أصدقائك وقرر مين الحقيقيين اللي يستحقوا اهتمامك وقربك منهم وتقدر تعتمد عليهم.. وفكك من الهيصة!

19- نظم رحلة تلف فيها المدن اللي جوه بلدك استخدم فيها الطرق البرية ما تختصرهاش بطيران أو أي بديل.

20- اتبرع لقضية انت فعلًا مؤمن بيها، وياريت لو تتطوع بمجهودك كمان عشان تقدم حاجة.

21- طوّر ذوقك في الأكل والشرب، جرب حاجات جديدة، وشوف حاجات تجمع بين المذاق وبين إنها ما تبقاش مجهدة لصحتك.

22- اكتب يومياتك، واكتب عن الحاجات الجميلة اللي بتحصل في حياتك، بغض النظر عن إنك تبقى بتعرف تكتب بشكل إبداعي أو لا، المهم إنك بتعرف الكتابة أصلًا.

23- اعرف قيمة العلاقات العاطفية الحقيقية وطويلة الأمد وكفاية تنطيط!

24- حسّن معرفتك بالأمور السياسية وأحوال الدنيا.

25- قلل تأثير السوشيال ميديا على حياتك وحاول إنها ما تبقاش السبب إنك تعمل أي حاجة لمجرد إنك هتكتبها أو هتحط صورك وانت بتعملها.

26- ما تخليش عليك ديون.

27- اهتم بصحتك وخد الموضوع جد!

28- اتأكد إن عندك تأمين صحي.

29- حاول توصل لرضا وسلام مع نفسك وما تقارنش اللي وصلتله باللي أي حد تاني عمله.

30- اعمل لنفسك أجمد حفلة عيد ميلاد اتعملت في حياتك واحتفل بمرحلة جديدة من حياتك أكثر استقرار ونضج.

Comments: