٥ بدايل لقراءة الكتب.. لو انت مالكش فيها أوي

11/05/2020

القراية بكل تأكيد لها فضل كبير على محبيها، ومش بس بسبب معلومات جديدة بتضاف لحصيلتهم نقدر نحصي عددهم، لكن فعل القراية نفسه، إثارة الخيال، وحضور الذهن، وتنمية مهاراتك الحياتية عمومًا حتى لو كنت بتقرا قصة بسيطة، لذلك فالموضوع ده مش جحود ناحية القراية لكنه تنبيه إن نعمة تطور الشخصية والثقافة ده مش حكر على القراء فقط، لكن فيه بدايل تانية لو انت ما اتعودتش تمسك كتاب أو الموضوع ممل بالنسبة لك، تقدر تتجه لها.

ببساطة احنا بنحاول نقول إن القراية اختيار شخصي لكن المعرفة ضرورة لازم نشوفلها سبل تانية لو دي طريقة مش مناسبة ليك وده مش عيب، وبفضل التكنولوجيا أصبح فيه 5 بدايل ممكن تتجه لهم:

1- الكتب المسموعة

لو استثمرت في سماعات كويسة عازلة لكل الدوشة اللي حواليك، هتستمتع بتجربة الكتب المسموعة وهتقدر تركز معاها، هتلاقي حاجات متاحة مجانًا على "يوتيوب" أو "ساوند كلاود" بجهود ذاتية من أصحابها، وفيه تطبيقات دلوقتي بتقدم الموضوع بشكل منظم وأكثر احترافية.

فيه ملحوظة هنا ممكن نقف عندها فيما يخص الروايات اللي بتتحول أفلام، الفيلم مش بديل للرواية، لأنه بتبقى معالجة سينمائية ممكن تبقى أفضل وممكن تبقى أسوأ من الكتاب لكن في النهاية هي مش نفس رواية الكاتب ومش نفس التجربة، وبشكل واقعي وفي أحوال كتير بيتجنب السينمائيين النواحي الشائكة من الحكايات أو اللي هيكون صعب شرحها بصريًا، لذلك فإنت محتاج تقرا الرواية أو تسمعها وما تعتبرش مشاهدتك للفيلم أو المسلسل بديل.

2- Ted Talks أو مؤتمرات تيد

تيد مؤسسة غير ربحية، بتعمل مؤتمرات بتستضيف فيها أشخاص مؤثرين أو لهم تجارب ملهمة على مستوى العالم، ممكن يكونوا رؤساء دول، أصحاب شركات أو اختراعات، جوايز مرموقة...إلخ، بيتكلموا عن تجاربهم وقصتهم خلال وقت زمني محدد، والفيديوهات متاحة أون لاين.

3- الـ Podcasts أو المدونات الصوتية

أشخاص مدونين، بدل ما بيكتبوا، بيسجلوا الموضوعات اللي حابين يناقشوها، وممكن توصلهم بسهولة عن طريق إنك تنزل أبلكيشن على موبايلك وتختار التخصصات اللي حابب تسمع فيها.

4- نوادي الشعر والندوات والمسارح

المراكز الثقافية بتعمل بشكل دوري ندوات شعر ممكن تروح تسمع بدل ما تقرا، وممكن تحضر مسرحيات زي عالميًا أعمال شكسبير أو من الحاجات المصرية أعمال توفيق الحكيم.

5- الوثائقيات

ودي بقى حدث ولا حرج، المنصات الإليكترونية كلها دلوقتي زي ما بتقدم أفلام ومسلسلات، بتقدم أفلام وسلاسل وثائقية قيّمة للغاية، وبتمثل مختلف الثقافات والقضايا والاهتمامات، بجانب إنك ممكن تلاقي محتوى مش قليل متاح على المنصات المجانية.

Comments: