٤ حلول لو حسيتي بمشاعر ناحية شريك صديقتك 

11/05/2020

أي حاجة ممكن تبقى محتارة فيها لما هتاخدي رأي صاحبتك بالذات هتعرفي تاخدي قرار بعدها، وده عشان رأي صاحبتك وذوقها دايما محل ثقة بالنسبة لك، وده من ضمن أهم الأسباب اللي بتخلي البنات تقع في الفخ الكبير بتاع ان اختيارات صاحبتها تعجبها في كل حاجة، حتى اختيارات صاحبتها في شريكها.

في الأول يمكن الموضوع بيبقى مريح لما تلاقي صاحبك أو شريكك وصاحبتك فيه كيميا بينهم في التعامل بتحسي إنك مبسوطة عشان الاطراف اللي في حياتك واخدين على بعض، لكن بيبقى فيه شعرة كده ساعات ممكن ماتريحكيش وتحسسك إن صاحبتك عاجبها اختيارك فعلا وعايزة تسيطر عليه، ومن هنا بتبدأ مأساه توجع القلب وبتحسي إنك في مسلسل "لأعلى سعر" بتاع نيلي كريم لما زينة صاحبة عمرها اتجوزت أحمد فهمي جوزها.

وبسبب الحكاية اللي انتشرت على السوشيال ميديا بتاعت "الانفلونسر" اللي اتجوزت جوز صاحبتها، خلينا نقولك -حسب موقع "elite daily" وخبيرة العلاقات " أنيتا أ. تشليبالا"- لو في وقت من الأوقات اتشديتي لشريك صاحبتك إزاي تبعدي نفسك عن الحوار ده عشان ماتبقيش زينة في الحكاية اللي ماكنش حد طايقها لو تفتكري:

1- احكي لواحدة صاحبتك تانية عن الحكاية أو حتى فرد من عيلتك:

لو احتفظت بالفكرة دي لنفسك مش أحسن حاجة لإن الأسرار بتغذي الشغف والفضول اللي عندنا، وهيخليك تحس إن ممكن المشاعر دي حقيقية بتزيد وعايز تخليها على أرض الواقع، بس لو حسيت إن الشخص اللي هتتكلم معاك هيحكم عليك اتكلم مع دكتور مثلا أو حد متخصص، لكن المهم إنك ماتسكتيش على المشاعر دي لإن عادي إحنا مانقدرش نتحكم في مشاعرنا مين ممكن يعجبنها أو بنحب مين وبنكره مين، لكن بنقدر نتحكم في مشاعرنا عشان ماتكبرش وتبلعنا.

2- خلي فيه مسافة بينك وبينه:

على قد ما تقدري حاولي تقللي التعامل بينكوا وتتجنبي تقضوا وقت سوا ولو اضطريتوا تخرجوا سوا ومع ناس كتير خلي فيه مسافة بينكوا في القعدة وماتقعدوش جنب بعض، على الأقل لحد ما مشاعرك دي تهدى، وحاول لما تكون قاعد في قعدة جماعية ماتحسيش بإحراج أو قلق، عشان ماتلفتيش نظر حد من صحابكوا للي إنتي حساه عشان ماتبقاش مشكلة.

3- اعرفي إيه العواقب بتاعت الخيانة لو خونتي صاحبتك:

يمكن مصطلح الخيانة على فكرة الإعجاب بشخص تبقى كبيرة أوي ومش على قد الموقف ولكن خليك فاكر إن أي مشكلة أو أي غلطة بتبدأ في الأول بفكرة صغيرة، بمعني إن الشخص ده هيعجبك هتبدأ "تفليري" معاه وتقولوا كلام حلو لبعض بعد كده ممكن تتكلموا عن مشاكلكوا مع بعض، بعد كده هيبدأ مشوارك في الخيانة.

بلاش تفتكري إن عمرك ما تخوني صاحبتك لإن عموما الناس بيتورطوا في المشاكل عشان بيقولوا إن عمرهم ما هيعملوا كده ومستحيل وأبدا وإنهم مش الأشخاص دي خالص، وبيحصل الـ"بلوت تويست" بتاع الأفلام، وحتى لو كنتي مابتقوليش مشاعرك دي فخليكي فاكرة إنها في السر والحاجة الوحيدة اللي ناقصاها هي الاتصال العاطفي اللي ممكن يقوم بينك وبين الشخص التاني، عشان كده مهم جدا تتكلمي مع حد عن مشاعرك زي ما قولنا في الاول.

4- ركزي إنك تلاقي شخص مناسب ليكي إنتي:

عيدي استثمار الطاقة دي مع حد إنتي عارفة إنك في علاقة بجد معاه ويبقى ليكي بس من غير أي مشاكل، وخلي بالك إن المشاكل اللي ممكن تدخلي فيها من إنك تبقى على علاقة بشريك صاحبتك ممكن تخليكي تخسري دايرتك القريبة كلها مش صاحبتك بس، ومهم برضه لما تتجنبي تقولي لصاحبتك أو شريكها أي حاجة من مشاعرك اللي حاسه بيها وده عشان ممكن الموقف يبقى أسوأ.

ومن المهم إنك تعرفي إنك تستاهلي تحسي بمشاعر حقيقية ناحية شخص ممكن يحبك إنتي بس وماتبقيش طفسة.

Comments: