٩ نصايح لمواجهة موجة الحر أثناء الصيام سواء كنت ملتزم بالحجر أو بتنزل

14/05/2020

أعلنت هيئة الأرصاد إن هيكون فيه ارتفاع تدريجي في درجة الحرارة وإن مصر هتواجه موجة حر شديدة الأيام الجايه وقال إن الموجة هتبدأ يوم الخميس 14 مايو 2020 وهتستمر لحد يوم الأتنين 18 مايو وممكن كمان تستمر لنهاية الأسبوع.

وبالرغم من إن أغلب المصريين قاعدين رمضان ده في البيت وبيشتغلوا من البيت عشان الحجر الصحي والوقاية من فيروس "كورونا" إلا إن فيه قطاع كبير برضه بينزل في النهار عشان شغله أو عشان يقضي مشاويره، عشان كده خلينا نقولك شوية نصايح تعملها لو نازل من البيت في موجة الحر دي وإنت صايم أو حتى لو قاعد في بيتك وإنت صايم وحران وهما:

1- حاول على قد ما تقدر تخلص مشاويرك قبل الساعة 11 الصبح عشان ماتتعرض للشمس في الوقت من الساعة 11 صباحاً لحد 6 مساءاً.

2- البس ملابس قطن أو كتان واسعة وتكون ألوانها فاتحة عشان تعكس الحرارة 

3- في الفترة اللي بين الفطار والسحور اشرب كميات كبيرة من المياه والسوائل حوالى 3 أو 4 لتر  لإن ده هيساعد إن جسمك يبقى بارد أكتر أثناء فترة الصيام عن طرق إن السوائل دي جسمك هيفرزها في صورة عرق 

4- تجنب الأكل الدسم اللي فيه دهون كتيرة والأكلات المحمرة لإن هضم الدهون بيحتاج لكميات مياه كبيرة وده ممكن يسبب لك عطش شديد.

5- وفي أكلك برضه تجنب اللحم الضاني خالص وقلل اللحوم على قد ما تقدر، وحاول تقلل كمية الملح في الأكل وتتجنب المخللات.

6- حاول تاكل الحلويات أو أي حاجة مسكرة بعد الفطار على طول وقللها في الفترة اللي قبل السحور وفي السحور نفسه تجنبها.

7- كتر من أكل الفواكه والعصاير الـ"فريش" اللي زي البطيخ والكنتالوب والموز والفاكهة عموما.

8- لو بتمشي قبل الفطار أو بتمارس رياضة في بيتك حتى، حاول تخلي ممارسة الرياضة بعد الفطار،  ولو هتمشي تبقى الساعتين اللي بعد الفطار وقبل الحظر.

9- كتر من الاستحمام أثناء فترة الصيام عشان تحس بالانتعاش في الحر.

Comments: