٥ صفات بتخلي محمد صلاح أب مثالي مع بنته 

20/05/2020

انتشر امبارح 19 مايو فيديو لمحمد صلاح مع بنته مكة تبع حملة إعلانية وهما بيتكلموا "فيديو كول" مع بنات وولاد بيعلبوا كرة تحت سن 11 سنة، ومن ضمن الحاجات اللي خلت الفيديو ينتشر أكتر ويعجب الناس على السوشيال ميديا إن مكة بنت محمد صلاح كانت على طبيعتها جدا وكانت تلقائية في ردود أفعالها وظهرت عليها شقاوة الأطفال.

ويمكن فيه عدد كبير من الناس استغرب لردود فعل محمد صلاح مع بنته لإنه ماعنفهاش وماكلمهاش بطريقة سيئة، بس من الواضح إن محمد صلاح أب مثالي.

خلينا نقولك إيه الصفات الموجودة في الأب المثالي وإزاي موجودة في محمد صلاح:

1- بيقضي وقت مع ولاده:

من صفات الأب المثالي إنه بيقضي وقت مع ولاده لإن ده بيأثر فيهم وفي نموهم وبيخلق نوع من الترابط بينهم، وده بان في كذا حاجة لصلاح مع مكة، وبتظهر معاه في مواقف كتير مش شرط أخر فيديو بس، ده غير إنه أكد في الفيديو الأخير إن من أهم الحاجات اللي لازم يعملها في إجازته إنه يقضي وقت مع عيلته.

2- قدوة مع أطفاله:

سواء الأب أدرك ده أو لا، فدايما الأب بيبقى قدوة لولاده، البنت اللي بتكبر مع أب بيحبها بتكبر وهي عارفة إنها تستحق إن حد يحبها ويحترمها وبتبقى عارفة كويس حقوقها مع شريك حياتها وبتعرف تختاره، ومن ضمن الصفات اللي في محمد صلاح إنه عارف يبقى شخص قدوة فعلا حتى كمان مش لبنته بس، هو قدوة لأغلب شباب جيله وللأطفال اللي كان بيكلمهم في الفيديو كمان.

3- بيخلي أطفاله يلعبوا:

الأطفال دايما بيتطوروا من خلال اللعب ولما بيخرجوا طاقتهم، وده طبعا بغض النظر عن الألعاب اللي على النت والـ"فيديو جيمز"، ومن الحاجات اللي بتظهر في محمد صلاح إنه بيسيب بنته تلعب مهما كان المكان حتى لو في وسط الملعب وتكريم له أو في تصوير فيديو هي طالعه فيه من غير ما يعنفها أو يزعق لها على اللعب ومن غير ما يسطر عليها.

4- بيحترم شريكته:

من صفات الأب المثالي إنه يبقى بيحترم مراته قدام أطفاله عشان ده بيخلي الأطفال يحترموا أهلهم وبيحسسهم إنهم مقبولين والأب والأم محترمينهم، وده اللي ظهر في أغلب مواقف محمد صلاح زي إنه بيحترم مراته قدام الناس وبتظهر معاه

5- يبقى بيصبر على أطفاله:

ممكن بسهولة جدا الشخص يبفقد صبره وثباته الانفعالي لما حد من ولادهم يتشاقى أو يعمل أفعال غلط، وعشان كده الصبر والتعامل مع الشقاوة أو الأفعال الغلط بحيادية بيبقى صعب ومش أي أب يقدر يسيطر على نفسه ويتعامل معاه بطريقة صح، لكن لما مكة بدأت تنفخ وكانت زهقانة من الفيديو محمد صلاح اتعامل معاها بهدوء وخد الموقف بهزار بعدين بدأ يفهم هي متضايقة ليه من غير أي زعيق واقترح عليها حلول عشان ماتبقاش زهقانة.

Comments: