١٣ حاجة مش هيفهمها غير الشخص البطيء

23/05/2020

الشخص البطيء يختلف عن أي شخص تاني ممكن يبقى عنده صفات تخلي الناس تشتكي منها، زي العصبي أو المتردد أو اللي صوته عالي..إلخ، لأنها عكسهم سلاح ذو حدين، زي ما صاحبها بيتأخر في إبداء رد فعل ويتعب أعصابك، هو كمان عنده وجهة نظر وفيه متعة ما بترجعله من السلوك ده.

عشان كده هنحط شوية نقط زي ما ذكرها موقع "Lifehack" مش هيفهمها غير الشخص البطيء واللي عارف هو حابب يبقى كده ليه! 

1- بيبقى متأكد إن كل حاجة صح لأنه أخد وقته في إنه يعملها وكان هادي من جواه فأخطاءه أقل.

2- بيبقوا عايزين كل حاجة كاملة متكاملة وفي الغالب نتايجهم بتبقى مبهرة أو على الأقل أفضل من غيرهم.

3- بيقدروا يستنوا الوقت المناسب لكل حاجة.

4- بيعرف يعني إيه "تركيز"، ممكن يكون بياخد وقت طويل عشان يرد على مكالمة أو على إيميل، ده لأنه ما بيحبش التشتيت وبيعرف يحط تركيزه في حاجة واحدة بيعملها، وممكن يقعد مرة واحدة عشان يرد على كل الحاجات المتأخرة دي.

5- مش شخص يقدر يعمل مهام متعددة في وقت واحد، بيفضل إنه يحط تركيزه كله في حاجة واحدة، وده ممكن يخليه مش اختيار مناسب إنك تكلمه لو عندك حالة طواريء، لكن هو مثالي إنك تتكلم معاه عن مشكلة عندك أو تحاول تفتحله قلبك.

6- بيختار كلامه بعناية فبياخد وقت طويل عشان يرد على حاجة، ده بيخلي الناس تفتكر إنه ما عندوش حاجة يقولها، لكن الحقيقة إنه بيكون لسه بيحاول يستجمع أفكاره عشان يرد، لكن زي ما عنده ميزة إنه ما بيقعش في فخ الغلط الكتير اللي بيحصل من الشخص المتسرع، هو كمان عنده عيب أو فخ ممكن يقعد فيه وهو التفكير زيادة عن اللزوم أو الغرق في أفكاره.

7- التفكير العميق ممكن يخليه مش الشخص المناسب إنك تنطلق معاه لكن نرجع لحتة إنك تفتحله قلبك، تفكيره الكتير ده هيخليه دايمًا يقولك ردود برة الصندوق وأبعاد ما فكرتش فيها للموضوع قبل كده

8- طبعًا في نفس السياق اللي فات هو مستمع جيد لأنه بيقدر يركز كويس ومش بيمل بسرعة من حاجة.

9- الهدوء والتركيز بيخلوه يقدر يحط في حساباته كل الاختيارات المتاحة ويفكر كويس في أبعاد أي قرار عايز ياخده مهما كان جريء أو مجازف.

10- بيستمتع بأكله كويس مهما الناس انتقدته إنه بطيء وآخر واحد يقوم من على الأكل.

11- ما بيملش بسهولة عشان كده بيقدر يحقق حاجة مهما وهو إنه ما يسيبش حاجة من غير ما يكملها ويجيب أخرها.

12- بيقدر يعيش اللحظة كويس، مهما الناس اشتكت إنه بيمشي ببطيء، بيسوق ببطيء...إلخ، هو بيقدر يستمتع باللي حواليه، بالمنظر والجو واللحظة اللي عايشها كلها.

13- بيحب يبقى في أمان، مهما كانت المتعة اللي في التهور والانطلاق هو دايمًا بيشوف العواقب اللي ممكن تحصل وده بيبقى كافي يخليه يستغنى عن الحاجة دي.

Comments: