ملخص قصة تهنئة "إنريكي أرسي" بطل مسلسل "لا كاسا دي بابل" لمحمد رمضان بعيد ميلاده

27/05/2020

من حوالي 4 أيام بالتحديد يوم 23 مايو احتفل محمد رمضان بعيد ميلاده ونشر صورة على الحساب  الرسمي بتاعه على انستجرام فيه صورة مع ولاده ومراته وكان من ضمن الناس اللي هنته بعيد ميلاده "لويس فيجو" أسطورة الكرة البرتغالي وقاله "كل سنة وإنت طيب يا صديقي"

النهاردة الصبح 27 مايو نشر محمد رمضان فيديو على حسابه الرسمي في انستجرام برضه فيديو للمثل الأسباني "إنريكي أرسي" بطل مسلسل "La casa de papel" وهو بيهنيه بعيد ميلاده وقال له في الفيديو "أهلا محمد رمضان دي رسالة من "إنريكي أرسي"  أنا عارف إنك عارفني وعارف إنك بتكرهني وعارف إنك ممثل شامل وأحسن ممثل في الوطن العربي، من صديقك كل سنة وإنت طيب بتمنى اشتغل معاك في يوم من الأيام، عيد ميلاد سعيد"

وعلق محمد رمضان على الفيديو وقال رسالة جميلة من الممثل انريكي ارسى اللي لعب دور "ارتورو رومان" في المسلسل العالمي "la casa de papel" .. شكرا يا صديقى"

لكن أغلب متابعين محمد رمضان خدوا بالهم من لوجو موقع "starzly" والموقع ده هو موقع بتدخل فيه تختار حد من المشاهير اللي متاحين عليه وتبعت له رسالة ويطلع في فيديو يقول اللي إنت كاتبه في الرسالة بالظبط وده طبعا بأجر ومقابل مادي، وأجر الممثل "إنريكي أرسي" على الموقع هو 1583.62 جنيه مصري.

لكن بعد ما عدد كبير من الجمهور خد باله من اللوجو وبدأوا يهاجموه نزل فيديو تاني لفان دام وهو بيقوله في فعاليات منتدى صناعة الترفية "Joy Forum 19" فى الرياض برحب بكل حب وحرارة بأخويا محمد رمضان، وبعدها رد المستشار تركي آل شيخ وقال له دي كوسة يا رمضان.

وبعد فيديو "فان دام" رجع تاني محمد رمضان ونزل فيديو لـ "إنريكي أرسي" على صفحته الرسمية على انستجرام وفيسبوك وهو بيوضح حقيقة الموضوع وبيقول إن "ريدوان" -وهو منتج موسيقي ومغني وموزع وكاتب أغاني مغربي-تواصل معاه وقاله عن محمد رمضان، وعمل له "فولو" على انستجرام وإنه عايز يشتغلوا مع بعض وإنه بيأمل يقابله في يوم من الأيام على الحقيقة، وختم الفيديو بجملة "عيد مبارك".

وبعد كده محمد رمضان عمل "شير" على صفحته الرسمية على الفيسبوك توضيح صوتي من "ريدوان" نشرته صفحة "ET بالعربي" بيوضح فيه حقيقة الجدل اللي حصل على فيديو محمد رمضان و"إنريكي أرسي" وقال إن القصة اللي حصلت بعض الناس افتكروها غلطة، وافتكروا إن محمد رمضان دفع فلوس لـ "أرتوريتو" عشان يقوله رسالة عن طريق ابلكيشن "starzly" هي قصة غلط وغير حقيقية.

وضاف كمان إن "أرتوريتو" هو صديق له ولما قال له إن صديقه هو النجم "نمبر وان" محمد رمضان وإنه عايزه يقدم له تهنئة بمناسبة عيد ميلاده، فهو صور الفيديو وقدم التهنئية بفرحه وكان مهتم بالموضوع".

Comments: