إزاي لونك المفضل ممكن يعكس شخصيتك!

28/05/2020

عمرك تخيلت إن لونك المفضل ممكن يعكس شخصيتك وطباعك.. أخصائين علم النفس على مدار السنين درسوا علاقة تفضيلات الألوان المختلفة بصفات متعلقة بالشخص نفسه.. وإن كل لون بيعكس طباع معينة في شخصية الإنسان، ووصلوا للتحليلات دي

اللون الأسود:
اللي بيفضلوا الأسود بيكونوا شخصيات مستقلة، بيركزوا جداً في تفاصيل ممكن ناس كتير ماتشوفهاش أو تديها اهتمام، شخصيات عملية بامتياز، بيتفوقوا في كل ما له علاقة بالأرقام والحسابات، شخصيات كتومة و حريصة على إخفاء مشاعرها، شخصيات شكاكة وده اللي بيخلي
دايرتهم المقربة محدودة جداً.

اللون الأبيض:

اللي بيفضلوا الأبيض بيكون عندهم الشجاعة للتعبير عن أفكارهم وآرائهم من غير خوف، وبيمتازوا بالصدق مع نفسهم ومع غيرهم، بس صعب تقدر تقنعهم إنهم غلط، وبيكونوا شخصيات ناقدة بطبعهم، ومن مميزاتهم إنهم شخصيات مخلصة لاحبائهم.

اللون الأزرق:

  اللي بيفضلوا الأزرق بيكونوا شخصيات عاطفية وصبورة ومسالمة، وعلى الرغم من انهم  شخصيات منفتحة، لكن صعب تكسب ثقتهم بسهولة، وبيميلوا إنهم يراقبوا سلوك الشخص اللي قدامهم لفترة طويلة قبل ما يقرروا يثقوا فيه أو لأ،  بيعبروا عن مشاعرهم بحرية وتلقائية،  وبيقدروا يكشفوا المشاعر الحقيقية للناس اللي حواليهم بسهولة، حتى لو كانت مخفية

اللي بيفضلوا الدرجات الداكنة من الأزرق زي اللون "الكحلي"  بيكونوا شخصيات مزاجية وبتميل للحزن والتشاؤم إلى حد ما.

اللون الأخضر:

 اللي بيفضلوا اللون الأخضر بيكونوا شخصيات حساسة وجديرة بالثقة، وبتحب دايماً تساعد اللي حواليها وده بيكون مصدر سعادة ليهم، عادة بيكونوا منظمين في حياتهم، وعندهم القدرة على التعامل مع أي موضوع  بنظرة حيادية وموضوعية، وده اللي بيخليهم  متميزين في وظائف زي المحاماة، أو اي مهنة يقدروا يقدموا فيها دعم ومساعدة للناس بشكل مباشر.

اللون الأحمر:

اللي بيفضلوا اللون الأحمر بيتوصفوا  بإنهم شخصيات قوية وكتلة من النشاط، اجتماعيين ومبدعين بالفطرة، وعادة بيكونوا محط اهتمام ومحبوبين في محيطهم، عندهم سرعة بديهة، بس من عيوبهم التسرع في القرارات والمواقف، وإنهم بيغضبوا بسرعة، وصعب يعترفوا بغلطهم.

 اللون الوردي "البينك":

اللي بيفضلوا اللون ده بيكونوا شخصيات طفولية وحالمة، عندهم دايماً نظرة ايجابية للأمور ومتفائلين، دايماً  بيفكروا ويخططوا لكل خطوة في حياتهم حتى لو كانت خطوة بسيطة، الناس دايماً بتشوفهم شخصيات هادية وخجولة لكنهم بياخدوا وقت عشان يعبروا عن نفسهم للناس، لأنهم بيخافوا دايماً إنهم يتفهموا غلط.

اللون البرتقالي:

اللي بيفضلوا اللون ده شخصيات شجاعة وواثقة في نفسها، صعب يقعدوا في مكان واحد لفترة طويلة، بيحبوا يتنقلوا طول الوقت وبيفضلوا يقضوا وقت في الأماكن الطبيعية تحديداُ، وبيتمتعوا بصفات تؤهلهم يكونوا رياضين ناجحين، عادة مش بيتكلموا كتير، وبيدرسوا قراراتهم كويس وبيحاولوا ميكرروش اخطائهم ، أهدافهم في الحياة محددة وصعب يغيروها، وبيشتغلوا على تحقيقها طول الوقت.

اللون الأصفر:

اللي بيفضلوا الأصفر بيكونوا شخصيات قيادية بالفطرة، بيهتموا دايماً بالثقافة والإطلاع، شخصيات عنيدة بتصر على مواقفها وتقنع الآخرين بيها، بيخفوا شعورهم بالحزن بسبب خوفهم من إن اللي حواليهم يفسروه على إنه ضعف، بيحاولوا دايماً يظهروا بأنهم سعداء حتى لو ده عكس الحقيقة، بيفضلوا العزلة معظم الوقت والاعتماد على نفسهم.

اللون البني:

اللي بيفضلوا اللون البني عادة بيكونوا شخصيات صبورة جداً، بتشتغل على أهدافها وتحاول  حتى لو اتعرضت للفشل أكتر من مرة، عندهم قدرة تحمل هائلة، وبيميلوا للتحفظ في اختياراتهم وآرائهم في الحياة.

اللون البنفسجي:

 الشخصيات اللي بتفضل البنفسجي بتكون شخصيات حساسة جداً  ومتطرفة في مشاعرها سواء كانت المشاعر فرح أو حزن، شخصيات ودودة واجتماعية، واللي بيفضلوا الدرجات الداكنة من البنفسجي بيميلوا للحزن والتشاؤم أكتر.

اللون الرمادي:

الأشخاص اللي بيفضلوا اللون الرمادي  بيكونوا شخصيات حكيمة وذكية جداً، من أكتر الشخصيات تحفظاً ومابيحبوش يظهروا حقيقة مشاعرهم أو أفكارهم  وآرائهم، وبيكون من الصعب على الأشخاص المحيطة بيهم إنهم يكونوا عنهم انطباع لأنهم بارعين في التخفي.

Comments: