إزاي تقاوم رغبتك في تدخين سيجارة فورًا؟

31/05/2020

التدخين مش بس مشكلة حقيقية لصاحبها، لكن كمان هي مؤثر مزعج لكل اللي حواليه، سواء أهل أو أصدقاء أو أبناء، لكن الإقلاع عنها مش دايمًا حاجة سهلة، لأنك بترتبط بحاجات كتير فيها، زي نسبة النيكوتين، والتسلية المرتبطة بعملية التدخين نفسها! 

لذلك وعشان نساعدك لو بتحاول تبطل، هنقولك شوية نصايح للمرحلة دي، وبشكل خاص عشان تقاوم بيها شعورك اللحظي إنك محتاج سيجارة فورًا، ودي زي ما ذكرها متخصصين من موقع "very well mind" وموقع "smoke free".

1- انزل اتمشى، حتى لو حوالين بيتك، وشم هوا بعمق.

2- غمض عينيك وادي ذهنك أجازة لمدة خمس دقايق، فكر في حاجة بتحبها، أو حدث جميل حصل أو مستني إنه يحصل.

3- التنفس من الحاجات اللي بنعتبرها مفروغ منها لأنها بتحصل بدون تفكير منك، لكن لو ركزت مع عملية الشهيق والزفير لمدة خمس دقايق وحاولت تنظمها، هيفرق معاه جدًا في التحكم في رغباتك، وده تمرين مهم من تمارين اليوجا.

4- اشرب كوباية ميه كبيرة، كتير مش بنركز مع الوقت اللي جسمنا بيبقى محتاج فيه ميه، وده بيسبب قلق هيخليك محتاج تشرب سجاير.

5- اكتب قايمة بالأسباب اللي محتاج عشان تبطل سجاير، ده هيقوي عزيمتك ويفكرك باستمرار إن فيه هدف أكبر وأهم من مجرد رغبتك دلوقتي في التدخين.

6- اشغل نفسك بهواية سهل تبقى معاك في كل حتة، دلوقتي أبلكيشنز الموبايل بتقدملك كل أنواع الألعاب الذهنية أو حتى البسيطة اللي ممكن تسحلك معاها.

7- خلي عندك سناكس كتير صحية، لأن أحيانًا انخفاض مستوى السكر في الدم بيخليك عايز تدخن بشدة، وما بتعرفش تفرق بين الرغبة في السكر والرغبة في التبغ، فالأحسن في الحالة دي إنك تجرب تاكل فاكهة مثلًا أو كوباية زبادي، وتجنب المخبوزات والحلويات اللي بتكون فيها دهون مشبعة، أو شراب الذرة عالي الفركتوز أو الكربوهيدرات المكررة، لأن ده هيقلل نسبة السكر في الدم وهيخلي الرغبة أسوأ من الأول.

8- كلم أصدقائك اللي بتحبهم وبيحبوك، ده مش بس هيقدملك دعم، لكن كمان هيشتت ذهنك شوية عن رغبتك في التدخين.

9- كلم أرقام الدعم الموجودة في بلدك، تابع مع متخصص، أو اتعرف على ناس قدرت تبطل بالفعل ده هيفرق معاك إنك تقابل ناس نجحت بالفعل تعدي المرحلة دي.

في النهاية فكر في الهدف الأكبر اللي عايز توصله واللي أهم من رغبتك اللحظية في تدخين سجارة، وهي صحتك وصحة كل اللي حواليك، وحتى استقرار شهيتك للأكل، وحالتك المزاجية، وحاجات كتير بيأثر عليها التدخين بالسلب.

Comments: