٥ حاجات تعملهم لو الوحدة بتقتلك وإنت معزول في البيت

01/06/2020

الحجر الصحي وعدم النزول والتعامل اليومي مع الناس سبب في إحساس ناس كتير بشعور "الوحدة" وده عشان رتم الحياة اللي أصبح مقتصر على التعامل الأسري أو التعامل مع القريبين منك "أونلاين"، وبما إننا في الوضع ده بقالنا أكتر من شهرين فيه ناس فعلا بدأت تتأقلم على الوضع ده وفيه ناس مش عارفة ودوامة الوحدة بتسحبها أكتر وبيغنوا أغنية "الوحدة بتقتلني" طول اليوم.

ومهما كان الإنسان منطوي بطبعه إلا إنه لما يحس إنه وحيد واللي بيحبهم مش فاكرين أو هو مش فارق معاهم ده بيخليه حزين بشكل ما، ويمكن محدش ناقص يحس بأي مشاعر سيئة تاني زيادة عن التوتر والقلق اللي عايش فيهم بسبب الفيروس، وعشان تستمر الحياة في الفترة دي من الأفضل إنك تتخلص من أي مشاعر سيئة تقدر تتخلص منها.

خلينا نقولك إزاي تتخلص من إحساس الوحدة لو حاسس بيه في الحجر الصحي:

1- اعمل خطة ليومك:

حاول إنك تخلي يومك طبيعي بقدر الإمكان عن طريق إنك تتبع جدول معين ويبقى منظم، وابدأ كل يوم بخطة معينة وتابع خطتك لإن ده هيخلي يومك يبقى فيه إنتاجية أكتر، وقليل ما هتلاقي وقت تحس فيه إنك وحيد.

2- خليك متطلع على آخر الأخبار:

فيه دراسة اتعملت في الصين في 2020 بتقول إن الأشخاص اللي بيتابعوا آخر الأخبار خصوصا لو على معلومات صحية أو حتى لو حوادث برضه نفسيتهم بتشتغل بشكل أحسن، لكن خليك فاكر إن المعلومات الكتير ممكن تضر صحتك العقلية، عشان كده دور على مواقع موثوق وإنت بتقرأ معلومات.

3- خليك نشيط:

دي واحدة من أهم الحاجات عشان تحافظ على صحتك العقلية، خليك نشيط على قد ما تقدر لإن صحتك النفسية متعلقة بصحتك الجسدية، فجرب على الأقل تمارين في البيت أو جرب اليوجا أو ممكن تنزل تتمشى جنب البيت طبعا لو كان ده أمان ولازم تاخد وقايتك.

4- خليك على تواصل مع الناس:

مش معنى إنك فعلا مش عارف تشوف صحابك أو تقعد معاهم أو تخرجوا إنك ماتقدرش تتواصل معاهم ولو حتى عن طريق مكالمة أو "فيديو كول" أو رسالة على مواقع التواصل الاجتماعي.

5- خليك منتج:

عبر عن نفسك عن طريق أي هواية بتحبها الكتابة أو الرسم أو الكلام أو ممكن تروق البيت أو تظبط حاجات في بيتك كان نفسك تعملها بقالك فترة، او ابتكر أي حاجة جديدة لإن تقضية الوقت في توجيه مشاعرك لابتكار حاجة هي أصلا علاج من الوحدة.

Comments: