مواصفات العزل المنزلي وأدوية وجرعات علاج "كورونا" للحالات البسيطة

03/06/2020

من أيام ذكرت وزارة الصحة والسكان المصرية  في بيان لها إن إجراءات العزل المنزلي للمصابين بفيروس كورونا من الحالات البسيطة بتتم بعد ما يتم الكشف على الحالة وتشخيصها بالمستشفى الأول عن طريق دكاترة ومتخصصين، وبعدها بيتم تسليم المريض حقيبة مستلزمات وقائية وأدوية تشمل البروتوكول العلاجي سواء للكبار أو للأطفال.

وحددت وزارة الصحة والسكان المصرية البروتوكول العلاجي لمصابين كورونا وقالت إن الحالات اللي بيسمح لها بالعزل المنزلي هي الحالات اللي مفيش أعراض ظهرت عليها مطلقاً أو الحالات اللي بتظهر عليها أعراض بسيطة.

وهدف البروتوكول العلاجي اللي حددته وزارة الصحة هو متابعة تحسن الحالة وعدم انتقال العدوى لباقي أفراد الأسرة ومتابعة المخالطين، وأضافت وزارة الصحة كمان في البروتوكول مواصفات المنزل القياسية لتلقي علاج الكورونا وهي بتشمل:

1- وجود غرفة مستقلة للمريض 

2- وجود حمام خاص بالمريض 

3- عدم وجود أغراض في غرفة المريض غير ضرورية للاستخدام الشخصي

وأضافت كمان مواصفات المنزل المقبولة وهي:

1-  وجود غرفة مستقلة للمريض 

2- وجود حمام مشترك مع وجود مطهرات 

3- قرب غرفة المريض من الحمام المشترك 

4- عند خروج المريض للحمام لازم يلبس كمامة

وكشفت وزارة الصحة والسكان كمان عن تفاصيل الجرعات الدوائية اللي بيتلقاها مصابين كورونا في العزل المنزلي، وقالت إن المريض بيحصل على "هيدروكسي كلوروكوين" 200 جم بكمية 16 قرص، وده لمدة 6 أيام، في اليوم الأول بياخد قرصين كل 12 ساعة وبداية من اليوم الثاني وحتى اليوم السابع بياخد قرص كل 12 ساعة يوميا، و فيتامين سي 1جم بكمية إجمالية 7 أقراص بيحصل فيها يوميا على قرص واحد لمدة 7 أيام، وكمان بياخد زنك 50 جم بكمية إجمالية 7 أقراص بياخد قرص يوميا لمدة 7 أيام.

ومن ضمن الأدوية اللي بيتلقاها المريض في العزل المنزلي كمان "لاكتوفيرين" أكياس بكمية إجمالية 14 كيس وبياخد كيسين يوميا لمدة 7 أيام، وبيحصل المريض على "أستيل سستايين" 200 جم بكمية 21 كيس وده 3 مرات يوميا لمدة 7 أيام، و"باراسيتامول" 500 جم  وتابعت وزارة الصحة بإجمالي 10 أقراص بيحصل عليها المريض عند ارتفاع درجات الحرارة، وبالنسبة للأطفال بيحصلوا على "أزيثرومايسين" شراب و"باراسيتامول" شراب.

وقالت وزارة الصحة إنه بيتم وضع علبة هاند جيل و5 ماسكات وترمومتر زئبقي لقياس درجة الحرارة، وأكدت وزارة الصحة إن الأدوية والجرعات والعزل المنزلي بتكون لعلاج الحالات البسيطة بس.

ومن ضمن الإرشادات اللي أعلنت عنها وزارة الصحة للشخص الخاضع للعزل المنزلي:

1- بقاء المريض طول فترة العزل بغرفته الخاصة واللي بتمتد لـ 14 يومًا بعد انتهاء الأعراض، وفترة العزل للأشخاص اللي ماظهرتش عليهم أعراض لـ 14 يومًا برضه من يوم تأكيد الإصابة.

2- وجود أدوات شخصية لتناول الطعام مخصصة للمريض، وتناول الطعام بحجرة العزل.

3- وجود تهوية طبيعية وعدم استخدام مروحة السقف.

4- تحديد فرد واحد من الأصحاء (ويكون غير مسن ومابيعانيش من أي أمراض مزمنة) يقدم الأكل للشخص المصاب، والمستلزمات التانية زي المطهرات والكمامات وبيسبها على باب المريض وبيخبط على الباب ويتحرك من قدام الباب.

ولازم الشخص المصاب قبل ما يفتح باب غرفته يعمل الاحتياطات التالية:

1- في حالة وجود حمام خاص بالمريض، يجب غسل اليدين بالماء والصابون لمدة ماتقلش عن نص دقيقة، وفي حالة عدم وجود حمام خاص يتم فرك الايدين كويس جدا بالكحول.

2- يرتدي المريض الكمامة وبياخد الطعام وبيرجع لغرفته.

3- عدم الخروج من حجرته وفي حالة ضرورة الخروج للحمام المشترك يرتدي الكمامة.

4- عند جلوس المريض بغرفته لوحدمش لازم يلبس الكمامة، وعند وجود بلل بالكمامة يتخلص المريض منها بكيس مخصص لده، وبرضه نفس الكلام مع المناديل اللي بيتم استخدامها في الكحة والعطس وبيتم تغيير الكمامة يومياً.

5- عند امتلاء الكيس إلى نصه بيربطه المريض كويس عشان يخرجه.ي

6- يجب غسل الأيدي كويس جدا بالماء والصابون لفترة ماتقلش نص  دقيقة بعد دخول الحمام ويراعى استمرار السلوك ده حتى بعد انتهاء فترة العزل المنزلي.

7- ضرورة الحضور للمستشفى اللي تم ِتشخيصه بها أول مرة عند انتهاء فترة العزل المنزلي، وفي الموعد المقرر من القائم بالمتابعة لعمل المتابعة والتحاليل عشان يتأكد من الشفاء تماماً.ِِ

Comments: