إزاي تعمل طيارة ورق في البيت وتتحدى زهق الحجر الصحي

07/06/2020

بسبب الحجر الصحي اللي بقاله حوالي 3 شهور في مصر أغلب الناس بقيت قاعدة في البيت سواء كانوا طلبة أو بيشتغلوا وده طبعا غير إنه مسبب فراغ بنسبة كبيرة فهو كمان مخلي الناس مابتشمش هوا براحتها، ولكن المصريين قدروا يتصرفوا مع الموضوع زي ما الإيطاليين كانوا بيطلعوا يغنوا من البلكونات، الشباب المصري بقى يطلع فوق سطوح بيتهم بالطيارة الورق بتاعته وبيضرب عصفورين بحجر بيشهم هوا ويتسلى وفي نفس الوقت يضيع وقت في لعبة كانت قربت تختفي.

لو إنت من جيل التمانينات وأول التسعينات غالبا هتبقى عارف أو فاكر بسيط الطيارة الورق بتتعمل إزاي عشان قضيت جزء من طفولتك في  الصيف معاها، بس لو إنت مواليد بعد كده أو لو مابتعرفش تعملها خالص أو عايز تفتكر تعملها موقع Wikihow قالنا إزاي ممكن تعمل طيارة ورق في البيت بالخطوات دي:

1- اعمل إطار:

في الأول هات عصاية سواء كانت خشب رفيعة أو بوصة، واعملها على شكل (+) بس أهم حاجة إن تخلي العصايا الأفقية أقصر من العصاية العمودية بحوالي 10 سم، وممكن تحط خشبة تالتة عشان تعمل شكل النجمة.

2- ثبت العصي:

ثبتهم سوا عن طريق استخدام الخيط والصمغ الأتنين، في الأول الزق العصايتين بالصمغ وبعد كده ابرم الخيط عليهم كذا مرة واعمل عقدة وقص الزيادة اللي في الخيط بعد كده عشان تبقى متثبتة كويس.

وبعد ربطهم لازم تتأكد إن العصاية الأفقية ثابتة بزاوية قائمة.

3- اعمل شقوق أفقية في نهاية كل طرف عصاية:

استخدم المقص في إنك تعمل شقوق أفقية في نهاية طرف  كل عصاية من الناحيتين ، وخلي الشقوق عميقة بما فيه الكفاية عشان تتناسب مع إنك تلف عليها خيط، ولو كنت بتستخدم عصاية رفيعة جدا وخيط رفيع ممكن تعمل ثقوب بدل الشقوق.

4- اربط الخيط على الأطراف:

بعد ما تعمل الشقوق، هات خيط ولفه على الشقوق اللي علمتها في طرف العصاية، وبعدها مد الخيط من الطرف للطرف اللي بعده وابرمه على شقوق الطرف التاني وهكذا لحد ما تعمل الأطراف كلها بنفس الخيط من غير ما تقطعه، ولما توصل للطرف اللي بدأت بيه لف الخيط عليه تاني واعمل عقدة وبعد كده اقطع الخيط بالمقص.

خليك متأكد إن الخيط مشدود بس مش ضيق عشان العصاية ماتتلويش.

5- هات شنطة بلاستيك:

أهم حاجة الشنطة البلاستيك ماتكونش أصغر من 100 سم، واقطع الأطراف بتاعتها اللي هما مكان ما بتمسك الشنطة منها، وقص الشنطة من الجنب وافردها، ولو عايز تزين الطيارة ممكن تستخدم أكياس بلاستيك أو ورق أو قماش تانية.

6- حط الإطار الخشب على الشنطة البلاستيك:

افرش الشنطة البلاستيك على سطح مستوي وحط عليها الإطار الخشب اللي عملته في نص الشنطة البلاستيك.

7- حدد الإطار بقلم ومسطرة:

هات قلم "ماركر" أو "فلوماستر" وبمسطرة حدد الإطار بتاع الطيارة عشان هتقص الشنطة البلاستيك على قد الإطار، ارسم خط بين الأضلاع بتاعت الإطار.

8- قص الشنطة البلاستيك:

بعد ما هترسم الإطار هتلاقي ظهرلك شكل ماسة، قص الإطار اللي رسمته، بس قص بعد الخط اللي رسمته بشوية صغيرين عشان لسه هتلف أطراف الشنطة البلاستيك على الإطار الخشب.

9- الزق الإطراف:

الزق الأطراف بتاعت الشنطة البلاستيك لجوا باستخدام الصمغ وممكن تستخدم برضه "سلوتيب" عشان تتأكد إنها لزقت كويس عشان أكيد مش هتحب الشراع اللي عملته من البلاستيك يطير في الهوا.

10- ثبت فيها خيط الطيران:

استخدم خيط مايقلش طوله عن 50 سم، واعمل ثقب صغير بالمقص في  المكان اللي بتتقابل فيها العصي في النص بالظبط، واسحب الخيط من ناحية العصيان للإطار الخارجي بتاع الطيارة اللي برا، واعمل نفس الكلام عند أضلاع الطيارة اللي في الجناب والضلع اللي فوق وسيب الخيط بعد كده.

11- اعمل ديل للطيارة بتاعتك:

ثبت الديل في الطرف السفلي من الطيارة، ولفة كذا مرة واربطه كويس، وعشان يتربط كويس معاك ومايتفكش استخدم خيط سميك أو شريط من القماش للديل ومهم كمان مايقلش طول الديل عن متر ويفضل يبقى أطول.

12- اربط قماش في ديل الطيارة:

اربط قطع صغيرة في ديل الطيارة ويكون البعد بينهم من 5 لـ 7 سم، عشان تحافظ على ديل الطياة يبقى متزن في الهوا والطيارة تطير بشكل مستقيم.

13- زين طيارتك:

في الآخر خلى الطيارة شكلها حلو على حسب ذوقك، وكل اللي عليك بعد كده تستنى وقت يكون فيه هوا قوي في الأول ولما تبقى الطيارة في الهوا لازم تنتبه للهوا والرياح المفاجئة، وطبعا مش محتاجين نقولك إنك تختار مكان مايكونش فيه شجر أو أسلاك كهربا.

وده فيديو ممكن يساعدك لو عطلت في أي خطوة من الخطوات اللي فاتت:

https://www.youtube.com/watch?v=-lmfwarW88E

Comments: