أكثر من 40 سنة من موسيقى سوبرمان

11/06/2020

كتب: كابتن بسلة

"يوم سوبرمان" أو SuperMan Day هو يوم 12 يونيو من كل سنة وتم الإعلان عنه لأول في سنة 2013 من شركة DC Comics للترويج لعرض فيلم Man Of Steel وهو النسخة الأحدث للشخصية من بطولة هنري كافيل وكانت Reboot لقصة أشهر سوبرهيرو على الأرض وقائد فريق العدالة "سوبرمان" والفيلم اللي عمله المخرج زاك شنايدر والمنتج كريستوفر نولن لقصة وشخصية سوبرمان كان نقلة كبيرة في حكاية حدوتة البطل ده حقق نجاح كبير وإشادة بالسوبرمان الجديد "هنري كافيل".

وفي التاريخ الطويل لشخصية سوبرمان اللي تجاوز الـ 87 سنة من بداية نشأتها اتعمل أفلام كتير لسوبرمان والأفلام دي كان دايمًا بيتعملها مزيكا وموسيقى تصويرية ما تتنسيش، واحتفالاً بسوبرمان النهاردة دي بعض التراكات اللي ممكن تسمعها وتحتفل مع الملايين من محبي الشخصية باليوم ده.

1- موسيقى فيلم سوبرمان 1978:

الفيلم السينمائي الأول اللي يقدم شخصية سوبرمان وبطولة "كريستوفر رييف" أشهر سوبرمان، الموسيقى كانت من تأليف العبقري جون وليامز

2- موسيقى كارتون سوبرمان 1996:

هي موسيقى مسلسل كارتون سوبرمان "superman the animated series" اللي بدأ إنتاجه في سنة 1996 وانتهى سنة 2000 وهي من تأليف Shirley Walker

3- موسيقى Man of Steel:

وننط 13 سنة لقدام مع فيلم Man Of Steel في سنة 2013 واللي تم اختيار Hans Zimmer عشان يعمل الموسيقى التصويرية للشخصية الجديدة لسوبرمان وزي ما قدر يرسم شكل جديد لشخصية باتمان في ثلاثية باتمان مع كريستوفر نولن وكريستيان بيل بموسيقى تصويرية بقت من علامات السينما قدر يرسم لسوبرمان شكل جديد وموسيقى أكتر قوة تناسب شخصيته بألبوم يمزج بين الطابع الخارق لسوبرمان في قوته بكل شيء والجانب البشري له.

وظهرت عبقرية ده في التراك المعروف باسم Flight وهو تراك بيحكي بالمزيكا كأنك بتتفرج وحاسس بشعور البطل تجربته الأولى في اختبار قوة الطيران ومقاومة الجاذبية الأرضية والتخبط والتعثر لحد الإنطلاق بحرية وقوة كاسر كل الحواجز الفيزيائية.. خلونا نسمعها وكفاية كلام عليها

ودي قايمة كاملة بألبوم الموسيقى التصويرية للفيلم لمحبي النوع ده المزيكا.

4- موسيقى فيلم باتمان VS سوبرمان:

في سنة 2016 عُرض فيلم Batman v Superman: Dawn of Justice وبرغم إن الفيلم كان مُخيب للآمال ولكنه على مستوى الموسيقى التصويرية كان مبهر وقدر يحافظ هانز زيمر على اللي بناه في فيلم Man of Steel في 2013 وبالتعاون مع Junkie XL قدر يطلع ألبوم موسيقى تصويرية قوي جدًا يليق بمواجهة بين أتنين من أقوى السوبرهيروز وهو باتمان وسوبرمان، وفي الألبوم ده هختار تراك واحد يعبر عن سوبرمان ومن أجمل الموسيقى اللي اتعملت بتعبر عن الجانب الإنساني لابن كوكب الأرض البار ووريث كوكب كريبتون الأصيل وفي المشهد الأخير له وهو بيضحى بنفسه لإنقاذ الأرض، اسم التراك This is my World وده لينك له عشان تسمعوه.


ودي برضه قايمة كاملة بألبوم الموسيقى التصويرية للفيلم.

نتمنى لكم سماع رايق للبلاي ليست دي وحالة نوستالجيا لطيفة تفكركم بلحظات حلوة مع بطلنا المفضل "سوبرمان" 

Comments: