لو اتعرضت للتنمر الإلكتروني.. إزاي تحرير محضر سب وقذف عبر وسائل التواصل الإجتماعي

14/06/2020

بسبب التطور اللي وصلت له التكنولوجيا والإنترنت حاليا بدأت تظهر مشاكل ماكنتش موجودة قبل كده زي الابتزاز اللي بيكون بطرق مختلفة إلكترونيا، أو الشتايم والسب والقذف اللي بيكونوا عن طريق "كومنت"،  أو تهديدات عن طريق الرسايل مثلا. 

وبعد اللي حصل مع الفنان شريف لما نشر صور بناته على الأكونت الرسمي بتاعه على انستجرام، واتعرض هو وبناته لسلسلة من التعليقات المؤذية واللي بتحتوى على تنمر، وبعد ما حذف الصورة رجع نشرها تاني وقال إن مش الهمج والمتخلفين هما اللي هيحددوا ينشر إيه وماينشرش إيه، وده كان تحدي واضح منه للتنمر الإلكتروني اللي بيعاني منه أشخاص كتير مؤخرا وقرر كمان إنه هيقاضي كل المتنمرين أو اللي شتموه هو وبناته في التعليقات.

السب والقذف الإلكتروني هي جريمة عقوبتها  3 سنين بحد أقصى، وغرامة 200 ألف جنيه والهدف من الحكم القضائي إثبات الإدانة وممكن التعويض يوصل لمليون حنيه، ولو كان تشهير أو ابتزاز على الفيسبوك للحصول على منفعة مادية أو عينية أو جنسية ، فممكن العقوبة توصل لـ 5 سنين سجن، عشان كده خلينا نقولك لو اتعرضت للتنمر الإلكتروني أو للسب والقذف أو الابتزاز الإلكتروني ممكن تعمل إيه عشان تحرير محضر سب وقذف عبر وسائل التواصل الإجتماعي وتاخد حقك بالقانون:

1- اتصل بالإدارة العامة للمعلومات والتوثيق - وزارة الداخلية على رقم 0227921490

2- اطلب إنك تتواصل مع ضابط الاتصال واشرح مشكلتك.

3- روح لإدارة مباحث الإنترنت اللي تبع المديرية بتاعتك 

4- اعمل محضر بالـ"سكرين شوت" بالبوست أو الكومنت اللي اتسبب في إساءة أو أذى ليك، أو كمان ممكن تبلغ عن جروب أو أكونت.

5- في حالة إن الحاجة اللي هتبلغ عنها هي مشكلة أو "سكرين شوت" من الفيسبوك فبلغ مباحث الإنترنت أما لو كانت في الواتساب فبلغ في مباحث الإتصالات.

6- المحضر بيتم تحريره عن طريق الشخص الشاكي أو اللي حصل معاه المشكلة أو وكيل له، في مدة 3 شهور أقصى مدة.

7- بتقدم صورة بالـ "سكرين شوت" للي تم سواء كان سب وقذف أو ابتزاز وبيتم إيداع الفحص الفني وبعدها بيتم إحالة المحضر لقسم الشرطة المختص.

8- وبعد كده بيتم إرسال المحضر للنيابة العامة لاتخاذ الإجراءات القانونية.

Comments: