٥ سلاسل كتب بنرشحهملك يحببوا طفلك في القراية

16/06/2020

القراية من الهوايات اللي ممكن تفرق كتير في مصير أي شخص، والناس الأكثر حظًا هما اللي بيتعلقوا بيها من وهما صغيرين، لأنك لما بتحبها على كبر فيه حاجات كتير بتبقى فاتتك وانت صغير صعب ترجع تبدأ تقراها، لكن هيبقى عظيم جدًا لو لحقتها في وقتها وشوفت هي ممكن تغير في حياتك قد ايه!

سلاسل الكتب من أهم الحاجات اللي ينطبق عليها الكلام ده، لأن بالنسبة لطفل هو بيتعلق بعالم وشخصيات وأماكن ويحس بالألفة ناحيتهم وإنهم أصحابه هو بالفعل، ده بيخليه يتعلق بقراية كل حلقات السلسلة، ويهتم بالبحث عن اللي مش موجود، ويحب يعرف أكتر عن الحاجات اللي هما بيتكلموا عليها واللي بتوديه لمعارف أكتر وكتب تانية مختلفة ومن هنا بتبدأ رحلته مع القراية!

عشان كده بنرشحلك هنا سلاسل مازالت صالحة إنك تخلي أولادك يقروها وممكن تبقى سبب في تعلقهم بالقراية وتغيير حياتهم!

1- المغامرون الخمسة

إلى حد ما هي غنية عن التعريف لأنها اتحولت أكتر من مرة لمسلسل كرتون اتعرض في التليفزيون، لكن أي قاريء جرب يقراها هيعرف إنها ماكانتش من قريب أو من بعيد بمستوى القصص، لذلك فهي تستاهل تدي لأطفالك تجربة إنهم يقروها.

السلسلة اسمها "قصص بوليسية للأطفال" منها بيخرج أكتر من سلسلة لأبطال تانيين غير المغامرين الخمسة، لكن الأكبر في العدد وأكتر في الشهرة هما الخمسة: نوسة، لوزة، تختخ، عاطف، ومحب، من تأليف الكاتب محمود سالم، وهما خمس أطفال عايشين في حي المعادي فضولهم بيدفعهم باستمرار للتورط في قضايا جارية والاشتراك في حلها، ومعاهم كلبهم "زنجر" وفي مواجهة مع "الشاويش فرقع" الغاضب دايمًا منهم، والمفتش سامي اللي بيظهر دايمًا في الوقت المناسب.

2- رجل المستحيل

للكاتب نبيل فاروق وبدأت سنة 1984 وامتدت لحد سنة 2009 لما صدر آخر عدد منها، بالإضافة لـ 14 عدد كانوا أعداد خاصة نزلت فيما بعد.

السلسلة بتحكي عن رجل المخابرات أدهم صبري اللي بيجيد كل فنون القتال وبيقدر يستخدم عدد ضخم من الأسلحة وبيتدخل في قضايا استخباراتية بتهدد أمان بلده، وكان بتصدر ضمن "روايات مصرية للجيب" لأن حجمها صغير ممكن تاخده في جيبك.

3- ما وراء الطبيعة

للكاتب أحمد خالد توفيق، وبطلها رفعت إسماعيل طبيب في أمراض الدم بيحكي عن علاقته بعالم الخوارق وشخصيات بيقابلها خلال رحلته، صدرت لأول مرة في 1993وانتهت في 2014.

4- هاري بوتر

ممكن تكون  انت أو اطفالك اتعرفتوا عليها قبل كده من خلال الأفلام، بس مشاهدتها السينمائية لا تغني عن قرايتها، خصوصًا إن على الرغم من دسامة الأفلام وطولها إلا إنها اختصرت في أحداث كتير او غيرت في الطريقة اللي مشيت بيها الأمور.

5- أجاثا كريستي

كاتبة إنجليزية متخصصة في كتب الجريمة والتشويق، رواياتها مشهورة عالميًا، وحسب ويكيبيديا اتباع منها أكتر من 2 مليار نسخة، وده رقم مش بينافسها فيها غير كتب ويليام شكسبير، متوفرة باستمرار بالعربي في المكتبات، ورغم إنها مفيهاش صفة استمرار نفس الشخصيات في كل رواياتها، إلا إن فيه عدد من الشخصيات بالفعل اتكرر في سلاسل مختلفة وكان سبب في تعلق أو كره الناس لهم في كل أنحاء العالم، والأكيد إنها كانت سبب في تعلق ناس كتير بالكتاب والقراية!

Comments: