٥ أسباب بتخلي كوباية الشاي هي الملجأ في الأوقات الصعبة

17/06/2020

الفنان حمادة هلال عمل أغنية كاملة عن مواقف كتير ومختلفة طول يومه وكان كل طلبه فيها كوباية شاي، يمكن مش حمادة هلال لوحده اللي بيبقى عايز يشرب شاي في المواقف اليومية الصعبة اللي بيقابلها في يومه وأغلبنا لما بيحس إنه متوتر، متضايق، بيفكر في حاجة بيدخل بشكل تلقائي يعمل كوباية شاي وكأنها سحر وحل لكل المشاكل اللي بنقابلها.

وبما إننا قاعدين الفترة دي في البيت وفيه وقت فراغ أكتر وفيه توتر أكتر استهلاكنا للشاي زاد، وبدأت تنتشر "ميمز" عن نوع الناس اللي بيشربوا شاي أول ما الدنيا تضيق في وشهم واكتشفوا إن عددهم كبير، وبالرغم إن فكرة كوباية الشاي هتخليك أحسن "كيليشية" شوية إلا إنها حقيقة فعلا.

موقع golden moon tea وموقع freeletics  قالوا الأسباب اللي بتخليك أحسن لما تشرب كوباية الشاي وهي:

1- الشاي بيحتوي على حمض "أميني" بيقلل من مستويات التوتر:

فيه دراسات كتير بتقول إن الأشخاص اللي بتناولوا مكملات الثيانين باستمرار مستوى الإجهاد عندهم بيبقى أقل، ولما بيتم الدمج بين الثيانين والكافيين ده بيساعد على تعزيز نشاط الدماغ والمزاج كمان، وعشان كده ده بيخلي الشخص يحس بالاسترخاء وبيقلل التوتر.

2- مادة الثيانين موجودة في الشاي:

الثيانين موجود في الشاي وفي أنواع نادرة من المشروم، وعشان كده الشاي فيه مكملات غذائية بشكل طبيعي، ومادة الثيانين بتزود الاسترخاء وبتفيد في تنظيم ضغط الدم وتخفيف التوتر وزيادة الطاقة.

3- الشاي مشروب ساخن:

بالرغم إن فيه ناس بتحب الـ"أيس تي" إلا إن في الأساس الشاي مشروب ساخن والناس بتحبه كده، ومن ضمن مميزات المشروبات الساخنة بتساعد إن الحلق والزور يبقوا أهدى ويمكن عشان كده أغلبنا بيحب المشروبات الساخنة وبيشرب على الأقل مشروب ساخن في اليوم لإن المشروبات السخنة بتهدينا وبتفكرنا بالشوربة الساخنة اللي كنا بنشربها وإحنا صغيرين.

4- الشاي فيه مضادات أكسدة:

الشاي مليان مضادات للأكسدة اللي بتساعد الجهاز المناعي على محاربة الفيروسات وخصوصا لو الشاي الأخضر لإنه بيحتوي على مضادة للالتهابات ومضادة للسرطان.

5- بيساعدك على التخلص من روايح الفم: 

الشاي فيه مستويات عالية من "الفلورايد " اللي بيساعد إن صحة فمك تبقى كويسة، بس لو خايف على سنانك من الصفار فممكن تشرب شاي أخضر بدل الشاي الأحمر، لإن الشاي الأخضر بيحارب البكتيريا اللي بتسبب أمراض اللثة والتسوس.




 

Comments: