أبل أعلنت رسمياً عن "iOS 14" بمميزات جديدة 

22/06/2020

أعلنت شركة Apple  في مؤتمر "WWDC 2020" عن أحدث إصدار من نظام تشغيلها لجهاز أيفون وهو "iOS 14"، واللي هيكون سبب في أكبر تغيير حصل من سنين على شاشة iOS الرئيسية، وقالوا في المؤتمر إن التغيير ده هيكون فيه تعديلات في الأدوات وتنظيم التطبيقات ده غير إضافة الخرايط وتطويرات لـ Siri.

مؤتمر "WWDC 2020" كان "لايف" من غير أي جمهور أو حشد، وافتتحه الرئيس التنفيذي للشركة "تيم كوك" كلامه في أول المؤتمر واتكلم عن المساواة وقضية الأشخاص أصحاب البشرة السمرا، وقال إنه معجب بالأشخاص اللي وقفوا عشان يطالبوا بالتغيير.

وبعدها بدأ نائب رئيس البرمجيات في أبل "كريج فيديريغي" شرح تحديثات iOS 14 وقال إن الإصدار الجديد هيكون فيه تغييرات كبيرة وده من خلال طرح "widgets " جديدة واللي هتكون في مجموعة مختلفة من الأحجام وممكن الشخص يشوفها بسهولة، وهتسمح "Apple" بإضافة "widgets " للشاشة الرئيسية عشان يقدر المستخدم يستفاد بيها جنب التطبيقات، وهيكون فيه "معرض ويدجيت" جديد عشان المستخدم يقدر يضيفها فيه بحيث إن المستخدم يضيف الأدوات ويخصصها بكل سهولة، وهيكون فيه كمان أداة "Smart Stack" جديدة اللي بتعرض تلقائي التطبيقات اللي ليها علاقة بالوقت بتاع اليوم.

وأعلنت "Apple" كمان عن طريقة عرض "مكتبة التطبيقات" الجديدة اللي بتنظم التطبيقات تلقائي في مجموعات وقوائم، ومن خلال عرض مكتبة التطبيقات الجديدة دي بتساعد "Apple" المستخدمين إنهم يقدروا يخفوا التطبيقات من على شاشتهم الرئيسية، فهي بدرجة كبيرة شبه مجلدات التطبيقات اللي في أندرويد، ولكن مع بعض مميزات الذكية الإضافية.

وأصدرت "Apple" كمان في التحديث الجديد تطبيق للترجمة، بحيث يسمح للمستخدمين بالترجمة بسهولة بين اللغات وهو زي"Google Translate"، ويقدر المستخدم عن طريقه إدخال نص في الرسالة أو إملاءها، وبيتم ترجمتها لـ 11 لغة، ده غير إنه بيدعم اللغة الإنجليزية و الماندرين الصينية والفرنسية والألمانية والإسبانية والإيطالية واليابانية والكورية والعربية والبرتغالية والروسية.

والرسائل كمان اتضاف ليها مميزات جديدة في iOS 14، فهي بتمكن المستخدم من تثبيت جهات الاتصال والمحادثات المهمة في الجزء اللي فوق من تطبيق الرسايل عشان يقدر المستخدم يتكلم بسهولة في الشات، هيكون فيه كمان Emojis جديدة.

ده بالإضافة لتغيير كمان في الخرائط، اللي هيكون فيها اتجاهات جديدة ومنسقة من شركات زي "Zagat " أو "AllTrails" عشان تقدم نصايح أحسن للأماكن الجديدة، وفيها كمان دعم لركوب العجل، مع توجيهات مخصصة عشان الشخص ياخدها في اعتباره حاجات زي الارتفاع ومسارات العجل والسلالم والطرق، وده غير ميزة " EV EV" الجديدة، وهي عن شحن العربيات الكهربا، وعوامل زي الارتفاع والجو.

أما  بقى "CarPlay" التغيير اللي هيحصل فيه هو إضافة خلفيات مخصصة وتطبيقات جديدة زي تطبيقات وقوف السيارات وشواحن EV وتطبيقات الوجبات السريعة، وضافت "Apple" كمان دعم لمفاتيح عربية NFC مع iOS 14، مع مجموعة 2021 BMW 5 Series عشان تكون أول الداعمين للميزة دي.

وأطلقت "Apple" ميزة الـ "App Clips" الجديدة، وهي عبارة عن مقتطفات سريعة بتعتمد على البطاقة وبتسمحلك بالوصول إلى أجزاء صغيرة من التطبيقات لما تحتاج لها من غير ما يحتاج المستخدم إنه يثبت تطبيق كامل.

Comments: