ترشيحات لسهرة أفلام الأبيض والأسود كما يجب أن تكون!

23/06/2020

كتبت: نوران عاطف

بما إن قعدة البيت مطولة، والصيف دخل، والتغيير مطلوب، بعيدًا عن المنصات الإليكترونية الحديثة وإنتاجها الحديث الضخم، هنرشحلك شوية أفلام أبيض وأسود، سواء كنت محب للأفلام العربي يبقى هنفكرك بيهم، أو مالكش فيها يبقى هنعرفك عليهم.

عشان ما نطولش عليك، الترشيحات بيجمع بينها إنها مثالية لسهرة لطيفة من اللي التليفزيون والسينما اتعملوا عشانهم، وهي قصص هتحس إنك ممكن تبقى بطلها أو أبطالها حواليك لكن رحلتهم ومشاكلهم ومواقفهم سينمائية، بطولات لكن مش خارقة، بطولات حياتنا العادية ما تديناش فرصة نعملها او نثبتها، أفلام مش بتتفرج عليها عشان قضية معينة، هي رواية.. ممكن نقول عليها تجارية بس على قديمه، من ناحية تانية هيجمع بينهم البطولات الجماعية ودسامة القصة اللي بيقدمها فنانين كبار.

ملحوظة:

لو فصلت دماغك وما حاولتش تنّظر على كل حاجة، وتشغل دماغك بفرق الزمن، وسذاجة المشهد الفلاني، واندمجت مع الرواية، النتيجة هتكون كويسة.

1- ارحم حبي

اختين، واحدة ملتزمة والدنيا مستهترة بتخطف من أختها شخص كانت معجبة بيه، وبتخونه بعد ما بتتجوزه، وبتدور الأحداث بين التضحيات والاعترافات والمواقف القدرية، بيقدمها ألمع نجوم المرحلة في عز مجدهم، وهما وشادية، مريم فخر الدين، عماد حمدي، وكمال الشناوي، وإخراج بركات

2- ارحم دموعي

ملحمة عاطفية اجتماعية بتحكي عن واحدة بتحب قريبها الطماع اللي بيتخلى عنها لما بيعرف إن عيلتها فلست فبتتجوز واحد تاني ما بتحبوش، بيطلع الشخص الأفضل على الإطلاق، لكن طبعًا بعد فوات الأوان.. الفيلم الحقيقة ميزته إن مفيش حاجة فيه بتيجي بسهولة أو بدون موقف عاطفي بطولي.

3-لن أبكي أبدًا

واحدة غنية مرفهة هتحب مهندس مستواه أقل منها، قرايب عقارب بيوقعوا بينهم، العيلة بتفلس والمرفهين بيحاولوا يبدأوا من جديد، فتى الأحلام بيظهر تاني، مشاكل من ماضي الأب بتظهر.. انت متخيل كام قصة ومرحلة بتحصل في الفيلم؟ دول ممكن يتقسموا تلات أربع أفلام! بس انت هتوفر على نفسك وتشوف تلك الجرعة الجميلة المكثفة من الدراما.

4- بائعة الخبز

تلفيق تهم، سجن طويل، أبناء بتتفرق، ويكبروا والصدف تجمعهم، بتشابكات جديدة، جيلين من الفنانين الكبار، وفي الآخر كله يظهر مرة واحدة، عن طريق صدف غريبة مابتحصلش غير في السينما، والشرير ياخد جزاءه بردو بشكل ما بيحصلش إلا في السينما، فدي فرصتك تشوف الأمور لما تاخد المسار المباشر اللي عمرها ما بتاخده في الحقيقة!

5- من غير ميعاد

فيلم رقيق جدًا وهادي، ما بيطلعش عن إطاره الرومانسي الاجتماعي الغنائي، ولا بيشتتك بقصص فرعية، الفيلم بيدور حوالين سؤال واحد، مين أحسن.. اللي يحب ولا اللي بتحب؟ بتدور المواقف بين شخصيات مختلفة في وجهات نظرها وأهدافها من الحياة عشان تفكر معاك في إجابة السؤال، الفيلم بطولة سعاد حسني، نادية لطفي، خيرية أحمد، محرم فؤاد، محمد سلطان، وصلاح جاهين.

لو شوفت دول وعجبوك والفكرة وصلتلك ممكن تكمل القايمة بالأفلام دي كمان:

1- الليالي الدافئة

2- لا تطفيء الشمس

3- قلب من دهب

4- الزوجة العذراء

5- شاطيء الذكريات

6- موعد مع السعادة

7- من غير ميعاد

8- وداع في الفجر

9- نور الليل

10- معلش يا زهر

Comments: