ضوابط إعادة فتح المساجد: مصلية لكل شخص ومتر ونص بين الصفوف

23/06/2020

أعلن الدكتور مصطفى مدبولي رئيس الوزراء في 23 يونيو إعادة فتح المساجد مرة تانية بداية من السبت 27 يونيو بشكل تدريجي وده بعد إغلاق كامل للمساجد استمر 3 شهور في الصلوات الخمسة، ولكن مع استمرار تعليق الصلوات الرئيسية الأسبوعية.

وبعدها أعلن الدكتور محمد مختار جمعة وزير الأوقاف قواعد وضوابط إعادة فتح المساجد وقال إن هيتم فتح المساجد اللي هتحددها كل مديرية للصلوات الخمسة بس كمرحلة أولى مع استمرار تعليق إقامة صلاة الجمعة لإشعار آخر، وصرح بالضوابط وهي:

1- عدم فتح دورات المياه نهائي وغلقها إغلاق تام.

2- عدم فتح دور المناسبات، وعدم السماح بدخول الجنائز أو صلاة الجنازة، وعدم السماح بعقد القران أو أي مناسبة اجتماعية.

3- عدم فتح أي ضريح أو مقام وعدم فتح الأبواب المؤدية لها.

4- استمرار تعليق صلاة الجمعة لإشعار آخر.

5- عدم فتح مصليات السيدات.

6- عدم إقامة أي دروس أو ندوات أو مقارئ أو أنشطة.

7- من ضمن الشروط الأساسية ضرورة تواجد الإمام أو المسئول عن المسجد في كل الصلوات، وعدم ترك مفاتيح المسجد لأي شخص إلا في حالة إنه من العاملين في الأوقاف.

8- فتح المسجد قبل ميعاد الأذان بعشر دقائق بس، وتكون الإقامة عقب الأذان على طول، ويتم غلق المسجد بعد الصلاة بعشر دقائق وبوقت لا يتجاوز نص ساعة بعد الأذان في كل الصلوات.

9- المرحلة دي مقتصرة بس على فتح المساجد من غير الزوايا والمصليات، وفي حالة إن مافيش مسجد في المنطقة خلص هيتم فتح على قد الضرورة بعد موافقة كتابية من مدير المديرية وتحت إشرافها بنفس الضوابط اللي تم ذكرها. 

وذكر الدكتور محمد مختار جمعة مجموعة تانية من الضوابط اللي الشخص لازم يلتزم بيها داخل المسجد وهي:

1- ضرورة لبس الكمامة.

2- كل شخص لازم يكون معاه "مصلية" شخصية له.

3- هيكون فيه علامات تباعد بين المصلين، ونشرت الوزارة مخطط توضيحي لشكل الصفوف في المساجد، وشكل المخطط بيوضح إن هيكون فيه توزيع للمصليين بشكل متباعد بفاصل متر ونص بين كل شخص والتاني.

مصدر الصورة: القاهرة 24

4- متابعة التطهير والتعقيم المستمر.

5- الفتح في المرحلة الأولى للمساجد اللي فيها إمام أو تحت إشراف حد من خطباء المكافأة وتحت مسئولية 2 من العاملين في الأوقاف سواء كان إمام وعامل، أو خطيب مكافأة وعامل، أو مقيم شعائر وعامل، أو مؤذن وعامل، أو مفتش وعامل، أو مدير إدارة وعامل، أو رئيس قسم وعامل، عشان يبقوا مسئولين عن الالتزام بكل الإجراءات.

وحظر الدكتور محمد مختار من مخالفة التعليمات دي وقال إن هيتم إحالة أي مخالف للجنة القيم بالقطاع الديني، وقال كمان إن في حالة وجود مفاتيح أي مسجد مع أي حد من غير العاملين في الأوقاف، هيتم توقيع أقصى عقوبة على المتسبب، وأضاف إن في حالة عدم التزام المصلين بالضوابط دي يتم غلق المسجد على طول وهيكون فيه قرار بعدم فتحه لحد انتهاء أزمة فيروس كورونا.

Comments: